— 475 —
sadja dari tengah laoet."
— „Kaloe begitoe, kaoe ada koewatir ijang api itoe djadi alamat djelek aken kita-orang?"
— „Boewat merasa koewatir, kita misti tjoba lihat doeloe, apa ada bahaja atawa tida."
— „Tjara begimana kaoe boleh lihat itoe?"
— „Sebentar toewankoe dapet taoe."
Habis bilang begitoe. Gaëtano berkata-kata sedikit sama matroos-matroosnja; kemoedian ija-orang robahken lajarnja, hingga praoe djadi mengambil haloean lain, dan sebentar lagi itoe api kelihatan seperti silam ka belakang boekit karang. Tida berselang lama lagi, sekalian lajar digoeloengken, matroos-matroos lantas goenaken dajoeng, dan itoe praoe mengamperi deket pada itoe poelo.
Semoewa itoe ada dilakoeken dengen diam-diam dan di dalem praoe itoe tida sekali ada ijang bersoewara.
Sekalian matroos ada sedia aken mendajoeng lariken praoenja, kaloe ada bahaja. Franz periksa ija sendiri poenja sendjata; ijang memang ada membawa doewa pistool bermoeloet doewa dan satoe senapan: ija isiï semoewa itoe, dan laloe doedoek menoenggoe.
Sedeng begitoe, Gaëtano melepasken pakeannja sendiri, gojangken tangan akan bri satoe tanda, ijang semoewa orang misti berdiam, laloe, toeroen ka dalem ajer dan teroes berenang dengen perlahan mengamperi pada daratan. Sigra djoega ija tida kalihatan lagi dari praoe.
Sesoedahnja berselang lama djoega, orang-orang di praoe dapet lihat póelah Gaëtano berenang mendatengi.
„Apa kabar?" kata Franz dan matroos-matroos, setelah Gaëtano itoe soedah dateng dekat.
