— 453 —
dan laloe boeka dengen sigra, teroes batja boenjinja itoe, begini:
„Biarlah sekarang djoega kaoe lantas berangkat ka djalanan de Meilaan dan pergi ka roemah no. 15, minta penggawe roemah itoe koentjinja pintoe dari tingkat kalima, laloe kaoe masoek ka dalem kamar di tingkatan itoe, ambil di atas temboknja peräpian satoe kantong soetra merah, dan bawa itoe pada ajahmoe sendiri. Perloe sekali ija dapet trima itoe pada sebelonnja poekoel sebelas. Kaoe telah berdjandji aken toeroet pesanankoe; sekarang saja bri ingat padamoe djandjianmoe itoe.
SIMBAD ORANG PELAJARAN."
„Ha!" kata Julie dengen merasa girang laloe ija mengangkat moeka niatan menanjaken apa-apa pada orang ijang bawa soerat itoe; tapi orang itoe soedah mengilang di waktoe Nona itoe sedeng membatja. Kemoedian nona itoe melihat kombali pada soerat itoe aken batja lagi sekali, dan laloe ija mendapet melihat, bahoewa di bawah soerat itoe ada poela sedikit toelisan ijang demikian boenjinja:
„Perloe kaoe sendiri dan sendirian sadja pergi ambil itoe kantong; kaloe kaoe membawa teman atawa kaloe lain orang ijang dateng di roemah, itoe tentoe sekali itoe penggawe pintoe tida nanti kasihken itoe koentji."
Boenjinja sedikit toelisan itoe ada koerangken banjak kagirangannja Julie. Apa ija traoesah selempang nanti ada bahaja apa-apa? Tidalah orang berniat menjilakai padanja? Belon sekali ija taoe berboewat salah pada orang; mengapatah djoega nanti ada orang menjilakai padanja? Aken tetapi, boewat merasa takoet, tidalah perloe orang dapet
