— 106 —
Sehabisnja berkata begitoe ia lantas masoekin pedangnja ka dalem iapoenja saroeng dan berdiri menoenggoe dengen sikep sabar dan bersenjoem-senjoem. Itoe hal soeda membikin Tie Tjong Siansoe djadi sanget djengkel dan maloe, kerna ia anggep dirinja dipermaenken, maka sembari berseroeh seperti goentoer kerasnja ia berlompat menerdjang pada Boe Beng Hiap Kek dengen goenaken ilmoe silat Lo han koan, samatjem ilmoe silat tjabang Siao Lim Sie jang sanget tinggi. Boe Beng Hiap Kek lantes menjamboet itoe serangan sama itoe matjem ilmoe silat djoega, jang ia memang ada paham. Dalem sakedjepan mata sadja iaorang lantas bertempoer dengen seroeh sekali, satoe sama laen tida maoe mengalah dan berdaja boeat djatoken iapoenja lawanan.
Tapi dalem pemandangannja itoe prampoean jang dibahasaken istri oleh Boe Beng Hiap Kek, dan dari setadian teroes berdiri mengawasin dari satoe pinggiran, ternjata gerakannja Boe Beng Hiap Kek teroes sabar dan gesit sekali, sedeng gerakannja Tie Tjong Hweeshio sanget bernapsoe dan santar. Ia taoe achirnja iapoenja soeami jang aken beroleh kamenangan, biar poen sang soewami tida mempoenjai ilmoe khikang jang djaoe lebih tinggi dari itoe kapala goendoel. Samentara djika soeaminja maoe gerakin iapoenja ilmoe khikang, nistjaja dengen lekas ia soeda bisa djatoken pada Tie Tjong Siansoe.
Tjoema sadja Tie Tjong Siansoe poen mengarti iapoenja bagian jang lemah, maka sabisanja ia berdaja boeat singkirken tangannja djangan sampe djadi beradoe sama tangannja iapoenja lawanan, hanja ditoedjoeken sadja ka djoeroesan anggotanja iapoenja lawanan jang lemah, seperti iapoenja anggota resia, poeser dan mata; tapi Boe Beng Hiap Kek poenja
