-90-
peti mati jang baek, pakean mati jang berharga mahal, salaennja itoe, iapoenja djanda dan anak dikasi soembangan oewang tiga riboe tail perak. Tjhio Tjoe Boen jang mempoenjai banjak oewang poen, tida loepa kasiken persenan oewang pada marika jang mendapat loeka. Itoe begal-begal dari Tjhit seng nia jang memangnja tjoema kenal oewang sadja, soeda tentoe merasa sangat poewas dan sateroesnja iaorang aken membela dengen soenggoe-soenggoe hati pada Phoa Boe Liang dan Tjhio Tjoe Boen.
Tapi sabetoelnja Phoa Boe Liang dan Tjhio Tjoe Boen poenja maksoed boekannja maoe tarik hatinja itoe begal-begal dan Tjhit seng-nia jang tida mempoenjai ilmoe kapandean tinggi, hanja maoe mengasi tjonto bagoes pada Ban Boe Tek, Thio Kioe Nio, Biauw Seng Liong, Lauw Tiong Tjeng dan Bang Tay Loei, soepaja marika bisa membela dengen soenggoe-soenggoe hati.
Sasoedahnja iaorang bikin beres segala hal, rawat maitnja Nio Soei Kim dan obatin loeka-loekanja Nio Siong Kim, Tee Toen Lian dan Lim Poen Kim, Phoa Boe Liang adjak itoe djago djago jang mendjadi pembelanja berkoempoel di dalem satoe kamar tertoetoep, tapi dengen heran orang mendapat kanjatahan Biauw Seng Liong tida bisa di katemoeken, entah ka mana perginja.
„Dari doeloean poen akoe soeda bilang bahoewa Biauw Seng liong belon tentoe bisa mendjadi kita poenja kawan," kata Thio Kioe Nio pada soewaminja, „dan sekarang mendadak ia mengilang, djangan-djangan ia pergi katemoeken itoe kawanan tetamoe malem dan berfihak pada marika itoe.
„Djangan menoedoe orang dengen keboeroe napsoe," kata Ban Boe Tek; „siapa taoe kaloe ia pergi
