-85-
istrikoe kasi pikiran lebih baek iaorang dateng ketemoeken doeloe akoe di pendjara dan berdamiken tindakan apa jang moesti diambil. Begitoelah pada kemaren malem iaorang dateng ketemoeken akoe di pendjara, sesoedanja kita bermoefaketan bebrapa lamanja, akoe kasi pikiran soepaja engko Boe Tek dan enso Kioe Nio pergi ketemoeken doeloe pada tjihoe di sini, dan tanja apa jang kita moesti berboeat. Enso Kioe Nio tida satoedjoe dan berkeras maoe lepasken djoega akoe dari pendjara, tapi beroentoeng achirnja dapat diboedjoek djoega boewat pergi katemoeken tjihoe di sini........."
„Tapi pada itoe malem akoe tida ketemoeken ini sepasang soewami istri jang berharga,,, memotong Phoa Boe Liang, "malah di sini pada itoe waktoe ada terdjadi kekaloetan lantaran akoe kena disatronin oleh bebrapa tetamoe malem jang mengantjam padakoe boewat tarik poelang akoe poenja permintahan pada Tan Taijswee, sedang laen kawan-kawanja tjoeri akoe poenja oewang sepoeloeh riboe tail perak dan Seantero barang perhiasan jang berharga kapoenjahannja istrikoe. "
„Ja, itoelah akoe poen soeda mendapat taoe dari engko Boe Tek dan enso Kioe Nio, jang setelah berlaloe dari pendjara boewat dateng ka sini, tapi kira-kira berselang doewa djam kamoedian iaorang balik kombali dan mengasi kabar bahoewa koetika iaorang sampe di sini, kaadahan dalem ini kantoor djoestroe sangat kaloetnja, kerna baroe sadja disastronin bebrapa tetamoe malem begitoelah iaorang denger dari pembitjarahannja bebrapa oppas-oppas jang lagi riboet mentjari pada itoe tetamoe malem, jang sabetoelnja soeda menjingkir dengen membawa itoe tjap kabesaran, oewang dan barang-barang perhiasan berharga.
