-67-
ia ada satoe manoesia boesoek dan bertabeat rendah, ia asoet itoe tjongtok boewat berlakoe keras terhadep pada itoe kawanan tetamoe malem jang soeda begitoe koerang adjar brani mengantjam pada pembesar, hal mana kamoedian amat boleh djadi aken terdjadi djoega atas dirinja Tan Kian Wie sendiri, maka tida boleh ditinggal diam, hanja moesti diambil satoe tindakan keras.
Tan Kian Wie pikir omongannja Phoa Boe Liang ada benar djoega, dan ia sabagi satoe ambtenaar jang pangkatnja paling tinggi, biar bagimana djoega, moesti melindoengin pada iapoenja orang-orang sabawahan. Itoelah tida oesa diboewat heran, kerna oemoemnja satoe ambtenaar tida soeka kaloe kaangkeran dan kakoewasahannja dilanggar, maka ia lantas berdjandji maoe berdaja ambil satoe tindakan keras terhadep pada itoe kawanan hiapkek. Phoa Boe Liang hatoerken terima kasi dan berpamitan poelang.
Tatkala Tan Kian Wie masoek ka dalem, ia panggil kadoewa poetranja boewat dateng mengadep padanja. Kong Liat dan Boe Liat jang memang perhatiken apa jang terdjadi dalem kantoor ajahnja, soeda taoe kadatengannja Phoa Boe Liang, malah Boe Liat jang disoeroe oleh engkonja mengintip diatas gentengnja kamar boekoe, di mana ajahnja trima kadatengannja itoe liat tay gedjos, soeda denger terang semoewa penbitjarahan. Maka pada waktoe iaorang berhadepan sania sang ajah, iaorang soeda taoe tjara bagimana iaorang moesti mendjawab omongannja sang ajah.
„Kong-dji dan Boe dji, baroesan entjek Boe Liang ada dateng katemoeken akoe," moelai Tan Kian Wie, „dan ia tjeritaken jang samalem iaorang telah disatronin oleh bebrapa tetamoe malem, diantjem boewat
