-55-
goeroe beroelang-oelang soeroe marika balik poelang sadja.
Oleh kerna meliat kadoewa moeridnja tida djoega maoe balik poelang, Tay Pwee Hweeshio lantas bikin tjepat iapoenja tindakan, hingga terpaksa kadoewa moeridnja poen tjepatin marika poenja langkah, tapi biar poen Kong Liat dan Boe liat kaloewarken marika poenja ilmoe kapandean lari, toch samingkin lama sang goeroe tinggalin iaorang samingkin djaoe. Tida antara lama kamoedian itoe orang pertapahan lantas mengilang di antara satoe tandjakan jang mendjadi kakinja satoe goenoeng, dan koetika itoe doewa soedara mentjari ka sitoe tida bisa katemoeken marika poenja goeroe, salaennja satoe kertas merah jang tertoelis: „Lekas poelang; tida goena mengikoetin dan mentjari padakoe."
Kong Liat dan Boe Liat kenalin kaloe itoe ada toelisannja marika poenja goeroe, hingga dengen pengrasahan menjesel iaorang balik poelang ka roemahnja. Moelai dari itoe waktoe iaorang mejakinken ilmoe silatnja saban pagi dan sore, di waktoe jang laen-laennja iaorang membatja boekoe-boekoe klassiek dan hikajat, kerna 'ajahnja saban-saban menjomel jang iaorang tida maoe perhatiken ilmoe soeratnja, hingga kaloe bikin examen besar tentoe tida ada harapan boewat loeloes dan mendapat titel.
Tatkala Hong Bwee mentjari pada iaorang, Kong Liat dan Boe Liat djoestroe berada di dalem kamar boekoe, sabegitoe lekas meliat pada sang ade, itoe doewa engko lantas berseroeh dengen berbareng:
„Hola! Hong, tida sari-sarinja kaoe sempet dateng tengokin kita di sini."
„Apa akoe poenja kadatengan tida mengganggoe kadoewa engko poenja peladjaran ?" berbalik tnenanja
