-4-
Pada soeatoe hari, ka roemahnja Yo Kok Hiong ada dateng satoe padri prampoewan nikoh, jang maoe minta derma, oleh kerna The-sie memang ada sangat mengindahken pada orang pertapahan, maka itoe nikoh ditrima ka dalem roemah boewat dioendang dahar. Pada sasoedania makan dengen setjara kabetoelan itoe nikoh liat itoe ampat gadis ketjil djoestroe mejakinken marika poenja iimoe silat di satoe taman jang terletak di sabelah blakangnja itoe roemah. Itoe nikoh manggoet maggoetken kepalanja sembari berkata:
„Sajang sekali ini ampat nona-nona boekannja orang lelaki, hingga apa jang sekarang ia peladjarken, di hari kamoedian iaorang tida nanti bisa goenaken boeat membela negri; tapi kaloe sadja ini ampat nona-nona maoe mendjadi bangsa hiapkek sebagi Niap In Nio dan Hong Sian Lie di djeman poerbakala, perloe sekali iaorang mendapetken lagi satoe goeroe jang mengadjar laen matjem ilmoe kapandean silat dari apa jang sekarang iaorang soeda paham."
Lian Eng dan Lioe Eng koetika mendenger itoe omongan lantas sadja mengawasin pada itoe orang pertapahan prampoewan, ternjata ini nikoh sekali poen oemoernja soeda ampir anampoeloeh taon, tapi iapoenja sikep masi tinggal gaga, koelit moekanja masi belon kisoet, sekali poen ramboetnja soeda ampir poetih seanteronja, sedeng iapoenja sorot mata ada begitoe berpengaroeh dan bisa bikin toendoek pada siapa jang kena diawasin. Ini doewa gadis sekali poen oemoernja masi sanget moeda, tapi iaorang poenja pikiran ada sanget pinter. maka itoe waktpe iaorang lantas mendoega kaloe ini nikoh tentoe ada satoe orang pertapahan jang mempoenjai kapandean iimoe silat tinggi, boeroe-boeroe iaorang madjoe menjamperin sembari membri hormat.
