-23-
Jang kaloewar paling doeloe toeboenja tinggi ketjil, itoelah Lian Eng, dan jang kadoewa poen tinggi ketjil, ia ini ada Lioe Eng, soedara kembar dari jang baroe diseboetken; jang katiga bertoeboe djangkoeng dan sedikit besar, inilah Lee Na, dan jang kaampat tinggi langsing, dan ia ini boekan laen dari Lee Tjoe. Baroe sadja itoe ampat gadis rapatken pintoe kamarnja, mendadak kaliatan satoe bajangan itoe lontjat menjamperin dari sabelah depan, dan tida lama kamoedian lantas tertampak satoe setan jang toeboenja pendek ketjil, moeka dan koemis, begitoe poen djenggotnja semoewa merah, hingga banjak mirip dengen malaekat api Hwee Tek Seng Koen. Itoelah Ong Giok Kay jang menjamar.
Itoe lima orang tida mengaloewarken barang sapata perkatahan, hanja mengasi tanda satoe dengen laen sama gerakan tangan, kamoedian satoe per satoe lontjat naek ka atas genteng, sabagi djoega sakawanan iblis iaorang mengilang di antara kagelapannja malem.
laorang teroes berdjalan di atas genteng dengen mengaloewarken marika poenja ilmoe kapandean lompat dan mengentengken badan. Tida antara lama kamoedian iaorang soeda sampe di Sip-lie-toen, dan achirnja iaorang soeda berada di atas genteng roemahnja Tjhio Tjoe Boen. Ong Giok Kay di wadjibken pasang mata dengen mendekam di atas genteng, sedang itoe ampat gadis dengen terpentjar bikin penjelidikan ka segala djoeroesan.
Berselang lama djoega, kaliatan Lian Eng soeda balik kombali dengen menenteng satoe orang lelaki jang kaki tangannja diringkoes, dan dari sabelah barat ada mendatengin Lee Na dengen pondong satoe orang prampoewan, jang djoega kaki dan tangannja teringkoes. itoe doewa gadis mengasi tanda pada Giok Kay
