- 36 -
sobat baek, pada siapa Bok Darmi bisa dapet ketrangan tjoekoep dari hal dia, laen dari dia, djoega Wedono di Tjomal, ia ada kenal baek hingga Bok Darmi djangan kira ia nanti kena seraken anaknja dalem tangan saorang jang tida kroean.
Bok Darmi dengerin itoe semoea dan roepanja ia merasa senang djoega, maka ia bilang, boeat itoe perkara, moesti dapet taoe doeloe begimana pikirannja Soekmi sendiri, sebab ia soeda kapok, ia koeatir nanti djadi lagi seperti doeloean, hingga perkara kawin djadi kapiran.
Tjan bilang dengen mendjoesta, hal itoe ia soeda bitjara dengen Soekmi sendiri, dan Soekmi poen soeka, tetapi maoe minta idjinnja sang iboe.
„Kaloe begitoe," kata Bok Darmi sesoedanja berpikir sedikit lama, „kaloe ia sendiri soeka, saja satoe iboe toch tjoema harep anak poenja beroentoeng."
Tjan djadi girang sekali.
„Kaloe begitoe." kata dia, „djadi Bok soeka kasi Soekmi boeat saja poenja bini? Trima kasi."
Dengen ini perkataan Tjan pegang tangannja itoe orang toea seperti salaman tanda soeka hatinja.
„Kaloe begitoe," kata teroes Tjan, „saja minta Bok toeroet saja ka Pekalongan boeat menetepken
