- 7 -
,,Goea maoe kasi loe tanda mata sebagi satoe peringetan dari kita orang poenja ketjintahan, soepaja loe tida djadi loepa sama goea !"
,,Tanda mata apa lagi, portret djoega soeda sampe tjoekoep!"
,,Barang begitoe engga ada harganja !"
,,Maskipoen engga berharga, tetapi toch ada lebi bergoena dari laen-laen barang !"
,,Tadi goea soeda bli-in satoe gelang mas sama satoe jintjin bla rotan, nipa dia nja ni !" kata si Keng Hok jang laloe kasi keloear itoe barang dari kantongnja.
,,Engko maoe pergi di tempat jang djaoe boeat apatah 'ngko boeang boeang doeit bli ini barang, toch tida lantaran ini barang To tjinta sama 'ngko, kan lebi baek 'ngko bawa oewang lebian boeat djaga di waktoe perloe pake !"
,,Itoe si perkara ketjil, kaloe goea perloe pake oewang, goea boleh dapet pindjem lagi dari Haktong, tetapi ini barang memang pantes goea moesti kasi pada loe, To!"
,,Trima kasi, Koh !" kata si Boto jang laloe samboetin itoe barang dengen roepa jang girang.
,,Nah, pake dong sekarang, tjoba goea maoe liat!"
Si Boto laloe masoekin itoe gelang di tangannja dan kemoedian ia masoekin djoega itoe tjintjin di djeridjinja.
,,Wah manis betoel loe pake ini barang, sajang sekali goea blon mampoe, kaloe goea ada banjak oewang tentoe goea bli-in loe gelang Liong dengen mata inten Brilliant!"
,,Barang periasan badan si perkara ketjil, kaloe oewang jang engga perloe di pake, baroelah boleh boeat bli itoe barang, tetapi kaloe kita sendiri masi perloe pake oewang, boeat apatah kita berlaga-laga seperti orang kaja," kata itoe anak gadis jang berpikiran betoel. Disini kita maoe kasi pembatja berladjar kenal adat dan hatinja Nona Boto, jang maskipoen roepanja ada begitoe manis, toch tiada begitoe tergioer dengen barang
