— 78 —
„Barang persenan dari sekola!”
„Bagimana Koh boleh dapet persen ?”
„Loe boekan anak sekola si tentoe loe engga taoe, baeklah goea kasi loe mengarti, didalem sekola di adaken doea kali papreksahan didalem satoe taon, siapa jang bisa loeloes dari itoe papreksahan, nanti di kasi barang bingkisan !”
„Kaloe begitoe enak do, saja djoega kepengen sekola!”
„Kaloe loe pergi sekola, abis disini, siapa jang djaga waroeng!”
„Ja memang soesa boeat orang miskin, masi ketjil-ketjil soeda moesti bantoein tjari doeit !”
„Ja trima sadja loe poenja oentoeng, To !”
„Tjobalah kasi saja liat, Koh !”
Keng Hok lantas toendjoeken itoe barang persenan pada ia poenja katjintahan.
„O! ada tempat tinta, pit bak dan hi, apa ini koffer djoega boleh dapet persen ?”
„Sama sekali boleh dapet persen!”
„Nah, kaloe begini senang djoega hati saja !”
„Goea djoega taoe, To ! bagimana moestinja boeat mentjari pengidoepan di kemoedian hari, maka itoe goea sekarang lagi sedeng giat bladjar!”
„Ja itoe betoel, Koh ! kan kita bisa idoep senang dikemoedian hari, kaloe 'ngko dapet gadji besar.”
„Eh! 'ntji Ros ko ada disini ?”
„Loe baroe liat, kan soeda dari kemaren doeloe dia ada disini!” sahoet si Manis.
„Kenapa ia tida tinggal lagi di Gang Trate ?” „Kan dia soeda bertjere !”
„Kenapa boleh djadi bertjere ?”
„Sebab dia tida bisa idoep roekoen satoe sama laen ?”
„Ja! kesian! orang begitoe moeda soeda djadi djanda !”
