– 76 –
Lantaran Keng Hok kita itoe ada di klas jang paling tinggi dan dapet nomer satoe, maka ia poenja nama soeda di panggil lebi doeloe.
Tatkala mendenger namanja di panggil, si Keng Hok lantes bangoen dari tempat doedoek dan pergi ka hadepannja itoe lid-lid bestuur dan goeroe-goeroe sekola.
Toean Tan laloe seraken satoe boengkoes barang persenan pada itoe moerid jang paling pinter serta radjin.
Sasoedanja trima itoe barang persenan, Keng Hok laloe manggoetken kepalanja sebagi orang jang hendak mengoetjapken trima kasi, kemoedian laloe ia kombali di tempat doedoeknja.
Itoe lid bestuur panggil satoe persatoe namanja hakseng-hakseng jang moesti trima itoe bingkisan, dan setelah itoe paserdjahan membagi barang-barang pada sekalian hakseng-hakseng soeda djadi selese, di dalem itoe roewangan lantes terdenger soewara njanjian jang merdoe dan di sertaken dengen soewaranja piano Japan.
Koetika itoe roewangan soeda djadi soenji kombali, Toean Tan lantes berpridato seperti brikoet di bawa ini :
Saja ada sanget girang sekali atas kemadjoeannja hakseng-hakseng didalem ia orang poenja pladjaran, dan djoega saja banjak harep pada sekalian bakseng-hakseng dengen tambanja marika poenja oemoer bisa dapet pikiran jang lebi pandjang, soepaja marika nanti soeka bladjar lebi giat. Pada hakseng-hakseng jang moendoer dari pladjarannja lantaran dari marika poenja kemalesan, hingga goeroe-goeroenja tiada bisa kasi iaorang naek ka dalem klas jang lebi tinggi saja soeka kasi nasehat jang ia orang tida moesti djadi ketjil hati, malahan marika moesti bladjar lebi giat. Dan sekalian moerid-moerid moesti inget, jang kita orang soeda berdiriken ini roema pegoeroean dengen soesa dan boewang banjak
