— 75 —
„Sekarang goea goea maoe poelang Mina, loe sadja jang moesti mandoerin !” kata itoe anak moeda, jang laloe pake topinja dan brangkat pergi.
VI
KENG HOK TELAH LOELOES DARI PAPREKSAHAN
SERTA DAPET BINGKISAN DAN KEMOEDIAN
IA TELAH DJABAT PAKERDJAHAN
SEBAGI GOEROE SEKOLA
DI TEGAL.
Sebagimana biasa saban deket boentoet taon di boelan Tjap Dji Gwee, di dalem sekola T. H. H. K. di Patekoan ada di bikin papreksahan dari moerid moerid sekola poenja pladjaran. Hakseng-Hakseng jang radjin dan bisa bikin semoea pakerdjahan didalem itoe papreksahan dengen betoel, ia orang nanti di kasi naek klas, serta di bri djoega barang bingkisan boeat mengoembiraken marika poenja hati. Moerid-moerid jang dapet nomer satoe hingga nomer lima ada di kasi prijs jang loear biasa. Sasoedanja papreksahan telah djadi selese, bestuur-bestuur dateng koendjoengin itoe roema pegoeroean, boeat meliat masing-masing hakseng trima barang persenan.
Toean Tan, pengoeroes dari itoe roema sekola dan berserta goeroe-goeroe sekola berdiri di depan satoe medja pandjang jang penoe dengen segala roepa barang-barang, sementara sekalian moerid-moerid lelaki dan moerid prampoean telah doedoek di itoe roewangan, di pertengaan dari itoe roema sekola.
