-4-
Bole di bilang ia ada satoe istri, jang tiada kenal daratan dan tiada bisa oesoet toelang iganja.
Moedjoer djoega ia orang ada memoenjai ampat anak prampoean: anak jang pertama di panggil si Ros, soeda, beroesia doea poeloe ampat taon dan ia soeda menika pada satoe toekang waroeng di gang Trate ; anak jang ka doea bernama si Seroni, oemoernja doea poeloe doewa taon, dan ia poen soeda kawin pada satoe soedagar tita di Patoeakan: marika berdoea ada tinggal di roemanja ia orang poenja soewami, djadi tjoema doea anak prampoeannja jang tinggal didalem itoe roema, jaitoe si Manis dan si Boto ; sang ’ntji baroe beroesia doea poeloe taon, sedeng adenja poenja oemoer baroe delapan blas taon.
Saban pagi orang bisa dapet liat itoe doea gadis ada melajanin tetamoe-tetamoe jang doedoek minoen kopi di itoe waroeng, lantaran jang toenggoe itoe waroeng ada doea gadis moeda; maka itoe poen tida heran orang-orang moeda jang beridoeng poeti (orang-orang jang gila basa memang ada banjak sekali di koeliling tempat) lebi soeka dateng minoem kopi di itoe waroeng, kerna ia orang bisa memandang pipi aloes dan koende litjin; apa lagi si Manis, jang sekali bitjara tentoe moesti barikoetken satoe senjoem jang manis, menarik sanget hatinja ai poenja langganan-langganan jang gila basa. Boeat doedoek sadja di itoe waroeng orang tiada merasa roegi, djika moesti bajar sepoeloe cent ; apa lagi kaloe orang bisa maen-maen moeloet dan maen-maen mata sama si Manis maski orang moesti bajar doea poloe lima cent, toch orang tida merasa menjesel.
„Tji njalain api lekasan, sabentar kaloe memeh kita blon masak kopi, ia nanti mengomel ; memeh kamaren siang katanja ia kala maen sepoeloe roepia, kaloe sebentar lagi ia minta doeit kita tida bisa kasi tentoe ia nanti djadi
