I.
IBOE PEMENTOPAN DAN AJAH PEMADATAN
Pada soewatoe pagi didalem awalnja boelan Tjap Gwee, hawa oedara ada amat sedjoek, sedeng angin jang aloes telah bikin daon-daon poehoen bergerak djadi beradoe satoe sama laen, dan boeroeng-boeroeng diatas poehoen kasi denger lagoe-lagoe jang amat merdoe boeat toendjoeken marika poenja kagirangan hati. Roepa-roepanja itoe binatang ada bersoekoer dan menjataken trima kasi pada Allah jang soeda melindoengken dirinja dengen slamat di itoe malem jang telah liwat.
Mata hari baroe moelai terbit dari djoeroesan wetan boeat sorotken sinarnja jang gilang goemilang ka moeka boemi.
Maski pada itoe waktoe baroe djam anam setenga pagi, di Angke soeda banjak orang jang liwat moendar mandir, kerna wijk itoe berada pada saloe djalanan idoep antara Betawi dan Tangerang, katempat mana toekang-toekang sado atawa Boekang grobak selaloe pergiken aken kombongin koedanja.
Di antara roema-roema di Angke adalah satoe roema tjat idjo jang di tinggalin oleh 'ntjek A Sie, toekang kopi; ini Sianseng ada satoe pemadatan, jang ada memboeka satoe waroeng kopi, tetapi tida perna melajanken orang-orangjang dateng koendjoengken waroengnja, kerna itoe perkerdjanan ia selaloe seraken pada daewa anak prampoewannja, sedeng ia poenja istri poen antero hari tiada ada di roemah oleh kerna ia ada satoe pementopan besar jang ampir saban hari pergi pagi dan poelang sore boeat tangkep koetjing.
