― 52 ―
lagi, soepaja kita poenja barang dagangan mendjadi sangkep dan boleh dapet lebi banjak oentoeng. Kaloe ngai soeda senang betoel, masalah ngai tida bliken nji barang mas inten!“
„Soeda loe djangan banjak tjerita, soeda engga mampoe kasi goea pake mas inten, masi brani banjak omong !“
Baroe sadja ini bertengkaran moeloet sampe disini, itoe iboe jang doerhaka soeda moentjoel dengen berpakean sari-sari.
Itoe pakean jang saderhana soeda membikin lebi tetep doegahannja 'ntjek Hwa Hin, tapi sekarang ia soeda dapet satoe pikiran jang bagoes, maka ia tida maoe mananja lagi pada istrinja.
„Memeh begini hari baroe dateng, Ros soeda toenggoe lebi dari doea djem !“ kata sang anak, koetika meliat iboenja dateng.
„Tadi pagi goea soeda riboet lagi pada Asoekloe, ia selaloe maoe isep madat banjak-banjak, sedeng barang-barang di waroeng soeda ampir kosong sama sekali !“
„Biarinlah ia isep madat lebian, Memeh djangan berklai, kan kesian ia soeda toea!“
„Biar lekasan mampoes ada lebi baek, soepaja ia tida bikin berat lagi pada orang!“
„Memeh si hatinja kedjem betoel!“
„Ach oedalah loe djangan banjak mengobrol lagi, marilah kita orang brangkat; kaloe kita dateng terlaloe laat, nanti soeda dateng banjak tetamoe, djadi soesa boeat kita masoek ka dalem roemah orang mengawinin.“
Si Ros jang dapet taoe apa maksoednja itoe perkatahan, dengen tida kata satoe apa, ia soeda tinggalken soewaminja dan berdjalan menoedjoe ka itoe sarang djoedi.
Tatkala 'ntjek Hwa Hin meliat istrinja soeda pergi, ia lantes toetoep waroengnja, dan ikoetken dengen diam-diam ia poenja istri dari blakang.
