― 51 ―
dan sedari ia menika ia blon perna meliat istrinja riasken dirinja begitoe perlente.
Hatinja telah djadi tjemboeroean keras; permoela ia pikir, tentoe iboenja si Ros ada simpen satoe lelaki didalem roemanja, tapi kemoedian ia dapet inget poelah, bahoewa ia poenja mertoea doerhaka ada mempoenjai lagi doea anak prampoean, jang masi prawan di dalem roemahnja, maka tiada boleh djadi ia poenja istri di adjak ka roemah mertoewanja boeat maen gila sama laen lelaki.
Memang begitoe pembatja djika orang minika dengen satoe gadis boekan toeroenan orang baek-baek, ada banjak sekali bahajanja!
„Ach akoe edan, djika moesti pikir begitoe, tentoelah si toea bangka adjak istrikoe pergi ka laen tempat boeat bertemoe sama itoe lelaki, pada siapa itoe prampoean doerhaka soeda djoeal anaknja,“ berkata poelah 'ntjek Hwa Hin dengen soewara didalem leher.
Tatkala ia soeda berdiam sedikit lama, ia laloe moelai menanja pada istrinja dengen mengompes: „Sebetoelnja kemana si loe maoe pergi ?“
„Kapan Memeh soeda kata, ia maoe adjak goea ka roema orang kawin, boeat apa loe menanja begitoe melit djawab sang istri dengen goesar.
„Ja, lantaran goea liat loe poenja tingka lakoe ada beda sekali!“
„Tentoe! sedari goea kawin sama loe blon ada barang apa jang loe bisa kasi goea pake; loe poenja oewang selaloe loe koempoelin boeat bawa poelang ka Tiongkok. Goea taoe disana tentoe loe ada poenja bini lagi!“
Tida Ros, di Tiongkok ngai belon perna menika; loe toeh taoe sendiri, jang ngai tida ada poenja kapital besar, oewang kaeentoengan ngai poeterin lagi dengen bli barang-barang
