― 46 ―
bisa dapet taoe apa jang istrinja soeda berboeat pada waktoe tadi; kerna pribasa poen ada kata:“ Ibarat Praoe djalan diatas aer, tida ada tandanja !”
Tapi orang moesti inget, jang asep tida bisa di toetoep, begitoe djoega dengen resianja si Ros tentang itoe perboeatan boesoek, jang nanti terboeka dan tersiar kasana-sini hingga sampe di koepingnja ia poenja soewami!
„Koh! saia maoe poelang sekarang, sebab saia takoet nanti saja poenja soewami dapet taoe !” berkata si Ros, sembari taro kepalanja diatas itoe lelaki djahanam poenja dada.
„Ja, nona manis boeah hati koe, masalah baroe ini sekali kita bertjinta-tjintahan, nona soeda begitoe lekas maoe brangkat poelang !”
„Kita toch masi bisa ketemoe lagi di laen hari, Koh !”
„Maski betoel begitoe, tapi blon tentoe kita bisa dapet lagi waktoe jang begini baek !”
„Kaloe Koh jang panggil tentoe saia moesti dateng!”
„Apa besok nona bisa dateng kamari lagi ?”
„Saia kira engga bisa koh, sebab kaloe saia keloear lagi besok, saia slempang, nanti saia poenja soewami djadi tjemboeroean, kaloe engga noesa adja saia dateng kamari!”
„Tapi saia harep nona djangan loepaken pada saia, sebab saia terlaloe tjinta pada nona, kaloe nona bikin begitoe, saja boleh djadi gila !”
Si Ros kira jang itoe anak moeda poenja omongan ada dengen sesoenggoenja hati, maka ia laloe mendjawab:
„Kaloe Engko sampe begitoe tjinta pada Ros, maski Ros boleh djadi bertjere pada Ros poenja soewami, Ros tida takoet!”
„Djadinja nona maoe poelang djoega sekarang ?”
„Ja! Koh !”
