— 32 —
berdjoedi, soepaja djangan kena di „potong“ oleh satoe kawanan penipoe, oleh kerna dagingnja dari satoe kerbo gemoek tentoe orang soeka makan. Lantaran „di potong“ orang bisa kala maen di dalem satoe malem wang poeloean reboe, lantaran saorang jang soeda kala maen banjak pikirannja soeda mendjadi bingoeng, hingga ia tiada bisa mendapet liat perboeatannja jang tjoerang dari itoe kawanan penipoe.
Pada soewatoe hari 'ntjim A Sie soeda di panggil oleh itoe orang moeda biadab.
„Tjim bagimana dari itoe oetang, tjim soeda lama sampe tempo, tapi tjim masi blon bajar djoega, malahan saban hari tjim maoe pindjem lagi !“
„Ja, Ba sebab 'ntjim maen selaloe kala sadja, dimana 'ntjim bisa bajar itoe oetang, 'ntjim minta tempo lah doeloe barang satoe doea hari !“
„Itoe djoega owee soeda menoenggoe sampe lama !“
„Kesianinlah pada 'ntjim, Ba !“
„Pekara lepas oewang panas, dimana boleh maen kesianin orang, kaloe owee berlakoe sabar sadja, boleh owee poenja doeit djadi ilang sama sekali !“
„Sekarang 'ntjim blon ada poenja doeit sih kaloe ada tentoe 'ntjim bajar !“
„Kenapa 'ntjim tida maoe gade 'ntjim poenja barang-barang mas inten ?“
„Ja Ba 'ntjim engga ada poenja barang jang berharga boeat di gade, kaloe ada seblonnja djoega Baba tagi, 'ntjim soeda gade !“
„Kaloe begitoe owee maoe minta satoe orang jang tanggoeng !“
„Entjim engga ada poenja kenalan orang kaja !“
„Entjim poenja anak prampoean boleh tanggoeng, ia poenja
