— 29 —
keloearken kartoe sembarangan sadja, soepaja di antara temennja tiga orang satoe orang kartoenja bisa lekas djadi sampe, dengen begitoe 'ntjim A Sie selamanja nanti djadi kala.
Seblonnja 'ntjim A Sie dateng si Isah temenin itoe tiga rampoean doedoek maen kartoe, soepaja tida djadi terialoe kentara tipoenja jang boesoek di matanja 'ntjim A Sie.
Setelah si Isah liat 'ntjim A Sie dateng, maka ia sigra bangoen, seraja berkata: „njonja doedoek disini sadja maen. lantaran koerang temen terpaksa saia moesti temenin, tapi sebetoelnja saia tida sempat ini hari.“
„Maen loewak brapa, Isah ?“
„Maen loewak lima, semata setalen njonja, doedoek da di sini !“
„Tji maen disini sadja da !“ kata sala satoe dari antara itoe tiga prampoean.
'ntjim A Sie jang ada bawa doeit doea poeloe ampat roepia, hatinja telah djadi besar, hingga ia soeda brani doedoek maen besar, kerna ia ingin menang maen boeat poelangken doeitnja jang doea hari ia telah kala.
Baroe sadja ia doedoek berdjoedi setenga djem, oewangnja sepoeloe roepia soeda terbang di djilat setan kartoe, jang mana membikin hatinja djadi lebi panas lagi.
Lantaran penasaran soeda membikin hatinja tida bisa djadi tetep dan pikirannja djoega djadi bingoeng, hingga ia soeda sembarangan boewang kartoe, perboeatan mana bikin lebi senang itoe tiga prampoean kedji dapetken maksoednja.
„Tji soeda kala brapa ?“ tanja sala satoe dari itoe tiga prampoean.
„Doea poeloe roepia, saja bawa doeit dari roema doea poeloe ampat roepia, sekarang tjoema ketinggalan ampat roepia !“ kata 'ntjim A Sie dengen roepa jang doeka.
„Ach ! abis ini sekali poetoes kita brenti adja, toe toewatj
