Boe Beng Hiap Kek/Bab 3
III.
Boe Beng Hiap Kek moelai moentjoel.
Sesampenja di dalem kamar, Tan Kie Hou berdoedoek di satoe krosi, dan soeroe iapoenja boedjang berdoedoek djoega di satoe bangkoe, kerna ia bilang kaloe orang bitjara sembari berdiri djadi tida enak dan koerang laloewasa.
„Nah, sekarang akoe rasa kaoe boleh lantes moelai sama kaoe poenja kabar senang dan kabar girang" kata itoe madjikan moeda pada boedjangnja; „tapi hati-hati kaoe, djangan djaoeh-djaoeh dateng ka sini, mendjoeal segala tjerita gila".
„Apa siaoya masih inget oeroesannja Lie In dan anak-istrinja jang dikeniaja oleh The Tay Hou dan kambrat-kambratnja?" menanja Tan A Toa, jang roepanja tida ambil open madjikan moedanja poenja antjeman dengen maen-maen. „Masa tida inget!" berseroeh Tan Kie Hou, „itoe oeroesan poen baroe sadja terdjadi kemaren. Tapi, apa sebabnja kaoe timboelken itoe oeroesan, apatah The Tay Hou kombali djalanken iapoenja perboeatan boesoek dan kedjem?"
„Sekarang The Tay Hou tida bisa djalanken lagi iapoenja perboeatan boesoek dan kedjem...."
„E-'eh! mengapa djadi begitoe, apa brangkali ia soeda mampoes ditjekek setan pada tadi malem ?" memotong Tan Kie Hou.
„Kira-kira ampir sama djoega seperti ditjekek setan," saoet Tan A Toa, „tjoema sadja iapoenja kapala koetoeng dan ilang, tapi kamoedian orang katemoeken di atas medja pengadilan dalem kantoornja tikoan. Hoere! ternjata Thian ada sampe adil, sebab achir-achir ia menghoekoem djoega pada itoe manoesia boesoek dan kedjem."
„Ach, kaoe moesti menoetoer dengen lebih beres, jangan lontjat sana-sini begitoe roepa, hingga membikin akoe djadi bingoeng sadja."
„Baeklah; tapi akoe harep siaoya djoega djangan saban-saban potong akoe poenja bitjara, sebab dengen begitoe djoestroe membikin akoe djadi tida bisa menoetoer dengen beres. Tadi pagi koetika akoe disoeroe pergi membeli tembako tjoeihoen dan tjoalian oleh loya, baroe sadja akoe sampe di pasar, dengen lantes kadengeran rameh orang pada membitjaraken bahoea semalem The Tay Hou dan The Hoay Tjiong telah mati diboenoeh orang, sedeng bebrapa moeridnja The Tay Hou jang tinggal dalem itoe roemah, djoega semoeanja pada ilang koepingnja sabelah dan marika poenja koentjir semoea dipotong sampe djadi pada goendoel seperti hweeshio.
„Blakangan akoe pergi tjari taoe doedoeknja perkara jang terlebih terang, dari bebrapa orang jang banjak taoe dan denger itoe oeroesan dari boedjangboedjangnja The Tay Hou. Ternjata samalem kira djam sabelas, koetika The Tay Hou baroe sadja masoek tidoer, mendadak djendela kamarnja terpental terboeka dan berbareng dengen itoe berlompat masoek satoe bajangan item, pada sabelonnja The Tay Hou bisa berboeat satoe apa, iapoenja leher soeda ditabas poetoes oleh pedangnja itoe tetamoe malem, hingga kapalanja bergloetoekan djato dari atas iapoenja pembaringan, sedeng badannja jang baroe saparo terangkat bangoen, kombali djato menggletak ka atas itoe pembaringan.
„Istrinja The Tay Hou lantes mendjerit sakeras-kerasnja minta pertoeloengan, entah dengen tjara bagimana, satoe kali itoe hiapkek menoeding padanja, lantes sadja itoe prampoean djadi seperti orang kasima, boekan sadja iapoenja moeloet tida bisa bertreak lagi, malah iapoenja sakoedjoer badan djadi kasemoetan dan tida bisa berkoetik lagi, hingga ia tinggal rebah tjelentang di atas iapoenja pembaringan dengen tida berdaja. Blakangan bebrapa boedjang dan moerid-moeridnja The Tay Hou lantaran mendenger soeara treakan minta toeloengnja The Tay Hou poenja istri, pada dateng memboeroe ka itoe kamar; tapi koetika iaorang baroe sampe ka depan pintoe kamar terseboet, lantes keliatan satoe bajangan item berlompat kaloear dari dalem itoe kamar, sabagi djoega gerakan satoe koetjing, jang tida kadengeran soeara tindakan kakinja.
„Itoe moerid-moeridnja The Tay Hou semoeanja membekal sendjata, dengen lantes iaorang menjerang pada itoe tetamoe malem, tapi dengen gampang sadja ia mengegos sana-sini atawa poen menangkis sama iapoenja pedang, berbareng dengen itoe, saban ia mendapet koetika lantes ia tiam moerid moeridnja The Tay Hou satoe per satoe, hingga achirnja, berikoet bebrapa boedjang lelaki jang dateng memboeroe, semoeanja tinggal berdiri sabagi djoega anak-anakan dengen tida bisa berkoetik, salaennja marika poenja mata terboeka dengen besar, dari mana mengaloearken sorot jang mengoendjoek pengrasahan takoet dan heran. Sebab itoe tetamoe malem sama sekali tida bisa keliatan bagimana potongan moekanja dan romannja, katjoeali iapoenja sapasang mata jang laksana kilat menjamber. Iapoenja sakoedjoer badan memake pakean ringkes serba item, sedeng dari bagian kapala, moeka dan teroes sampe di lehernja, tertoetoep sama satoe toetoepan jang tjoema dilobang di bagian kadoea mata dan idoengnja.
„Oleh kerna iapoenja keadahan tida berbeda sebagi satoe setan atawa iblis, soeda membikin itoe orang-orang djadi begitoe katakoetan, teroetama meliat ia poenja gerakan jang begitoe sebat dan tjepet, hingga soeker dipertjaja bahoea ia ada satoe manoesia. Sasoedanja semoea orang kena ditiam dengen tida bisa bergerak, dengen sabar tapi tjepet, itoe tetamoe malem iris sabelah koepingnja marika itoe, serta potong djoega marika poenja koentjir dan ramboet hingga djadi goendoel seperti tales jang baroe dikoepas. Tjoema anehnja, orang-orang jang diiris koepingnja, semoea ada moerid-moeridnja The Tay Hou, sedeng boedjang-boedjang lelaki jang dateng ka sitoe, tjoema dipotong sadja marika poenja koentjir dan ramboet. Sahabisnja melakoeken itoe pakerdjahan, dengen sebat ia berlompat naek ka atas genteng dan linjap di antara kagelapan.
„Itoe oeroesan tida djadi abis di sitoe sadja, sebab pada waktoe orangnja The Tay Hou pergi bikin pengadoean pada tikoan, sabegitoe lekas itoe perkara darah dilaporken pada kapala kampoeng, kombali dalem kantoornja itoe pembesar district terdjadi kakaloetan dan kagemperan, sebab bermoela orang katemoeken kapalanja The Tay Hou jang berloemoeran darah menggletak di medja pengadilan, kamoedian toekang djaga kamar tjap kabesaran dengen tersipoe-sipoe mengasi taoe bahoea tjap kabesarannja tikoan telah linjap, entah ka mana perginja. Itoe tikoan dari Ankhee jang lagi enak tidoer sama iapoenja goendik, moelanja merasa tida senang diganggoe begitoe roepa, tapi koetika mendenger prihal itoe kapalanja The Tay Hou dan ilangnja iapoenja tjap kabesaran, iapoenja sakoedjoer badan seperti digoejoer oleh satahang aer dingin.
„Belon ilang iapoenja kaget, mendadak ada dateng lagi salah-satoe boedjangnja The Tay Hou, mengasi taoe bahoea The Hoay Tjiong, orang kapertjajahannja The Tay Hou poen, kedapetan mati di atas iapoenja pembaringan dengen mendapet doea tikeman djitoe di iapoenja oeloe-ati, hal mana lebih doeloe lantaran goegoep dan bingoeng, djadi tida kataoean dan tida dilaporken, tapi blakangan lantaran orang merasa sanget heran tida meliat pada The Hoay Tjiong, boeroe-boeroe orang pergi meliat ka iapoenja kamar, dan kedapetan ia soeda berloemoeran darah, menggletak di atas randjang dengen tida bernapas."
Tan A Toa bitjara sampe disini lantes merandek sabentaran boeat bernapas, dan koetika ia maoe meneroesken bitjaranja, tiba-tiba satoe boedjang dateng masoek mengasi taoe bahoea makanan soeda sedia, dan semoea orang-orang djoestroe pada masoek ka kamar makan.
„Ja, baek dengen lekas akoe dateng," saoet Tan Kie Hou, „dan kaoe boleh berlaloe doeloean."
Sasoedanja itoe boedjang roemah sekola berlaloe, Tan Kie Hou lantes berpaling pada Tan A Toa: „Abis, apa pemboenoehnja dapet ditangkep?"
Tan A Toa golengken kapalanja sembari tertawa.
„Mana bisa ditangkep!" berseroeh ia. „Djangan kata bisa tangkep, sedang romannja itoe orang bagimana, tida satoe di antara itoe orang orang jang liat dengen kadoea mata sendiri bisa menerangken. Semoea tjoema bisa bilang sadja bahoea toeboenja itoe pemboenoeh sedikit tinggi dan langsing, tapi paras moekanja, bagimana, tida saorang jang bisa taoe. Tjoema ada soe toe pengoendjoekan, jang sedikitnja bisa mengasi katerangan bahoea itoe hiapkek ada paham ilmoe soerat dan toelisannja bagoes sekali, kerna di media toelis dalem kamar boekoenja itoe tikoan, blakangan orang telah katemoeken satoe soerat, jang tertantjep oleh satoe badi-badi pandjang, dalem mana ada dibeber tentang kedosahan dan kedjahatannja The Tay Hou dan The Hoay Tjiong, teroetama jang paling blakang terhadep pada Lie In dan anak istrinja, achirnja itoe tikoan sendiri poen diantjem bakal dipanggal batang lehernja, kaloe sadja ia tida maoe oeroes itoe perkara sabagimana moestinja ; sedeng perkara memboenoeh pada itoe doea orang djahat, seanteronja aken ditanggoeng oleh penoelisnja itoe soerat, jang memake nama Boe Beng Hiap Kek."
„Djadinja itoe gadis jang dirampas oleh The Tay Hou masih ada di dalem roemahnja itoe pendjahat? menanja Tan Kie Hou.
„Ja; sebab itoe gadis sorenja telah sembat satoe goenting dan toesoek iapoenja leher sendiri, kata Tan A Toa ; „tapi beroentoeng tenggorokannja tida mendapet loeka. Oleh kerna itoe djoega, The Tay Hou maoe menoenggoe sampe itoe gadis mendjadi sembuh dari loekanja, baroelah aken dipaksa boeat mendjadi iapoenja goendik jang ka'ampat. Inilah djoega sebabnja Lie Kiauw Tjia djadi terlepas dari tjangkremannja itoe orang boesoek. Kaloe boekannja begitoe, nistjaja kahormatannja soeda diperkosa."
„Akoe girang sekali mendenger kaoe poenja kabar jang memoeasken orang banjak poenja hati," kata Tan Kie Hou, „dan sekarang lantaran akoe maoe pergi makan, kaoe boleh poelang sadja ka roemah. Tapi djangan loepa, kaloe sadja kaoe mendapet kabar apa-apa lagi, dateng sampeken padakoe disini."
Tan A Toa manggoetken kapala dengen membilang baek, kamoedian ia membri hormat pada madjikan moedanja dan teroes berlaloe dengen tindakan tjepet. Sedeng Tan Kie Hou poen dengen paras moeka terang menoedjoe ka kamar makan sembari berlari-lari. Sesampenja ternjata semoea oerang soeda moelai makan, begitoe poen iapoenja goeroe, Tan Ko Wie, jang berdoedoek di satoe medja bersama ianja. Sang goeroe memandang moekanja iapoenja moerid, kamoedian keliatan satoe senjoeman jang ampir tida kentara di iapoenja moeloet; tapi sasa'at kamoedian kadengeran ia berkata pada moeridnja itoe dengen paras moeka soenggoe soenggoe:
„Kie Hou, ini hari boekan sadja kaoe bangoen laat, malah dateng makan poen ada laat dari biasanja. Tapi akoe denger kaoe poenja salah satoe boedjang dateng mentjari pada kaoe, apa ia ada membawa kabar apa-apa? Kaloe diliat dari kaoe poenja aer moeka jang terang, akoe soeda bisa mendoega jang itoe boekannja kabar djelek."
Tan Kie Hou tida djadi mengkeret koetika mendenger goeroenja poenja gegeran jang tida dioetjapken dengen perkatahan keras, sekali poen paras moekanja begitoe soenggoe-soenggoe. „Ja, sinshe, ini hari sasoenggoenja akoe merasa senang sekali, kerna akoe baroe denger soeatoe kabar jang sanget menggirangken akoe poenja hati," saoet ia dengen soeara bergoembira.
„Nah, kaloe begitoe, akoe taoe ini hari kaoe tentoe aken bisa makan lebih banjak dari biasanja," kata Tan Ko Wie sembari tertawa. „Sekarang boleh lantes moelai makan, sebab nanti sajoer dan nasinja djadi dingin."
Betoel djoega lantaran hatinja girang dan soemangetnja terbangoen. Tan Kie Hou bisa makan lebih banjak dari biasanja ; tjoema lantaran sadari lama ia soeda biasaken diri boeat makan dengen memake takeran jang tentoe, maka ini kali ia tjoema makan lebih banjak satengah mangkok nasi dari biasanja.
Itoe hari liwat dengen tida ada terdjadi apa-apa jang loear biasa. Di waktoe malem, lantaran tadi pagi Tan Kie Hou tida mejakinken iapoenja ilmoe pattwan-kim dan ie-kin-keng, goeroenja soeroe Tan Kie Hou mejakinken doeloe pat-twan-kim dari bermoela sampe pengabisan, jang sama sekali ada delapan bagian. Kamoedian lantes diadjarin lagi satoe bagian dari ie-kin-keng jang itoe botja belon peladjarken. Oleh kerna Tan Kie Hou ada satoe anak jang berotak terang, dalem sedikit tempo sadja ia soeda bisa pahamken dengen betoel, dan gerakannja boleh dibilang tida ada jang salah. Tan Ko Wie kasi tanda jang itoe perjakinan boleh brenti. Tapi sang goeroe roepanja soeda meloepaken sama sekali prihal itoe kabar jang menggirangken iapoenja hati, kerna sama sekali ia tida menanjaken lagi hal itoe. Oleh kerna ia ingin sekali tjeritaken hal itoe pada goeroenja, maka dengen tida tertahan lagi ia berkata: „Sinshe, ternjata sinshe poenja omongan jang samalem ada bener sekali, kerna Thian soeda oendjoek iapoenja keadilan, menghoekoem pada orang-orang djahat."
„Apa The Tay Hou soeda mendapet hoekoemannja Thian ?" berbalik menanja Tan Ko Wie. „Tjobalah kaoe tjeritaken bagimana hal itoe soeda terdjadi, sebab akoe poen ingin denger."
Tan Kie Hou lantes toetoerken apa jang tadi tengahari ia dapet denger dari iapoenja boedjang. Tan Ko Wie lantes bersenjoem. „Apa akoe soeda bilang samalem, boekantah Thian ada sampe adil dan bersifat moerah?" kata ia. „Selamanja orang-orang djahat tentoe pada satoe hari aken dapetken iapoenja hoekoeman jang satimpal sama iapoenja kadosahan, begitoe poen orang-orang baek, aken mendapet gandjaran dari iapoenja perboeatan jang berboedi pada sasamanja. Maka kaoe tida perloe merasa begitoe mendongkol lagi sebagimana kemaren, sebab kadjahatan dan kabaekan ada sabagi warna item dan poetih, jang dengen satoe kali liat lantes bisa kanjatahan; sedeng gandjaran dan hoekoemannja tjoema bergantoeng sadja sama sang tempo. Kaloe soeda sampe temponja, biar poen berdaja bagimana djoega, tida nanti orang bisa terlolos dari tangannja Thian."