Adoe Djangkrik

Dari Wikisource bahasa Indonesia, perpustakaan bebas
Lompat ke: navigasi, cari
Adoe Djangkrik
(1940) 
oleh Tjoe Siem Tjan

Di bilangan Djawa Tengah, kapan moesim djangkrik, tida sedikit orang Tionghoa jang adoe itoe binatang ketjil boeat kesenengan'nja. Ada djoega jang bertaroh besar²an.

Awal² ini abad, poesat² adoean djangkrik jang tarohan'nja tida ketjil adalah kota Magelang, Djokja dan Solo.

Saja kenal satoe famillie Lie di Magelang, siapa di waktoe moesim djangkrik, ada piara djangkrik² adoean sampe berpoeloeh-poeloeh dan pekerdjaken djongos² jang mengerti soal djangkrik boeat rawat itoe binatang kesenengan'nja toean Lie.

Menoeroet keterangan dari orang² toea, di dalem gedong itoe hartawan ampir saban hari dilakoeken adoean djangkrik, dan tida koerang „kawakan² djangkrik” dari loear kota dateng boeat tjoba peroentoengan'nja dengen itoe kesenengan.

Sekarang itoe matjem kesoekaan memang soedah tida populair, tapi toch boeat orang Tionghoa masih sadja belon linjap itoe, bahken mereka sampe kedjer ke laen kota sekalian bawa poeloehan ekor djangkrik boeat tjari itoe kesenengan „pat-sik-soet” (istilah Tionghoa boeat itoe matjem pertandingan)

Menoeroet toelisan'nja Dr Tjan Tjoe Siem dalem tijdschrift Djawa jang berkalimat „Krekel gevechten”, adoe djangkrik ada kesenengan pendoedoek priboemi di djaman doeloe.

Nama² djangkrik itoe menoeroet Djokja ada:

Dirabang, jaitoe djangkrik jang mempoenjai warna semoe merah.

Gepilo, Djangkrik semoe idjo koening dengen kepala merah.

Djeliteng, warna item seantero'nja.

Tresem, kleur'nja mirip trasi.

Ngambang tlasih, semoe² oengoe sebage kembang tlasih.

Oentoek daerah Solo ada nama jang berlaenan dari Djokja. Hal ini R.M. Soewandi ada toetoerken ia poenja boekoe jang berkalimat „Kasoekan aben djangkrik” seperti:

Gotang, seboetan boeat djangkrik jang ilang salah satoe kaki'nja.

Broemboeng soeling, jang warna'nja seperti kembang bajem.

Djragem, kleur'nja lebih gelap dari Broemboeng.

Boeat orang Tionghoa jang hartawan biasa'nja ada leverancier² jang senantiasa lever itoe binatang disaat-saat tertentoe. Oentoek meliat jang baek mereka kilik itoe binatang, djankrik jang mempoenjai moeloet lebar dan koeat pengawakan'nja itoelah jang geschikt (*tjotjok dan pantes) oentoek di perdjoeangken. Djangkrik pilihan itoe kamoedian di rawat baek², dikasih makan krokot, berikoet tjabe, tempo² ketjoeboeng, soepaia djadi galak dan nekat.

Waktoe djangkrik² diadoe di toelang (piranti temapt adoean) dan penonton ada di sekiter'nja namoen haroes diem, tida boleh keloearken perkata’an² jang keras soepaia sang djangkrik tida kaget.

Pertandiangan itoe hanja sebentaran sadja, jang kalah laloe melariken diri. Tetapi orang ada hak boeat lepasken poela laen djangkrik dalem toelang sesoedah di djantoer dan dirimbang aer.

Waktoe mendjantoer, biasanja orang menjanji sebage djampe'nja:

„Djantoer, djantoer, moengsoeh’moe gede doewoer, tjokoten ngasi andjoer.

Djanti, djanti, moengsoeh’moe ketjil belaga, gigitlah sampe mati”.

Entah kenapa setelah di djantoer biasa’nja itoe djangkrik lantas berani hadepin lawan'nja. Di zaman Z.H Hamengkoe Boewono VII di dalem keraton Djokja, di moesim djangkrik tiap selasa dan djoema’ah diadaken pertandingan, dan banjak pembesar² priboemi dan orang² bangsawan.

Saja poenja satoe sobat jang soedah ada oemoer, beritahoeken saja bahwa di Semarang di awal taon 1901 dikala pertarohan adoe djangkrik setjara besar-besaran, ada seorang Tionghoa jang bisa bikin djangkrik'nja kaloe di adoen selaloe menang, sebab ia mempoenjai satoe recept makanan djangkrik jang terdiri dari obat²an Tionghoa. seteroes'nja itoe djangkrik djadi bringas sekali kapan berhadepan moesoeh'nja, badan'nja keoat dan hawa toeboeh'nja panas. Moesoeh'nja sekali kena di gigit aken lekas lari tida maoe berhadepan lagi.

Ada orang jang penah tawar itoe recept 300 roepiah, tetapi ia tida maoe kasih. Ini recept kabar'nja sekarang di poenjaken oleh orang jang doeloe djadi ia poenja sobat kentel.

Copyright.svg Karya ini merupakan ekspresi budaya tradisional yang hak ciptanya dipegang oleh negara Republik Indonesia.
Copy, distribute and transmit the work
Karya ini memiliki hak cipta. Penggunaan harus memperhatikan nilai-nilai yang hidup dalam masyarakat pengembannya. Lihat Pasal 38 UU No. 28 Tahun 2014 untuk lebih jelas.
Flag of Indonesia.svg