Pembalesannja Kawanan Liangsan/Bagian katiga/Bab 6
VI
Doea kamanten idoep dengen manis.
Kirim soerat, mengoendang koela-
warga Hwa pinda ka Siamlokok.
Tatkala itoe negri Siamlokok mendjadi aman, berhoeboeng dengen pernikahannja Kiongtjoe pada panglima. Tay Song, baginda Siamlo tida koeatirken lagi bahaja paperangan jang inantia dateng dari itoe fihak.
Dalem sapandjang, waktoe itoe Ma Say-tjin ada merasa girang, sebab liat karoekoenannja itoe anak mantoe, jang betoel ada seperti ikan mendapet aer.
Bagimanatah tida dibilang begitoe? Kerna satiap hari itoe doea laki istri jang sahabisnja santap di kraton Tangkiong, laloe pergi ka taman boenga dimana marika pahamiken ilmoe silat dan bermaen sendjata. Tempo-tempo, iaorrng peladjarken memana. Dan lebi, lagi, Kiongtjoe poenja girang kerna Hoema poen ada mengindahi padanja.
Banjak kali iaorang bikin sairan jang bagoes-bagoes, dimana Kiongtjoe dapetakanjatahan, bahoewa Hwa Hoema boekan sadja ada saorang moeda jang gaga, hanja dalem ilmoe soerat poen ia panda sekali.
Siapatah istri jang tida girang mendapet soeami begitoe?
Djoega Hong-tjoen bisa sekali membawa diri. Kerna satiap pagi belon pernah ia tida mengadep pada baginda radja aken membri slamat pagi, kamoedian pergi ka kratonnja permisoeri, tanjaken ini orang toea poenja kawarasan.
Lantaran lakoenja jang seperti anak berbakti, maka radja poenja katjintahan pada itoe mantoe, ampir tida bedah seperti anak sendiri.
Boekan djarang radja menanja djoega pikirannja itoe mantoe dalem perkara-perkara jang berhoeboeng dengen oeroesan negri. Sasoeatoe pertanjahan jang radja tanja, belon pernah Hong-tjoen djadi goegoep boeat mendjawab.
Kerna sasoeatoe pikiran jang dinjataken oleh Hoema ada membawa kefaedahan bagi negri dan rahajat, maka radja merasa bangga betoel. Pada soeatoe pagi, waktoe Ma Say-tjin doedoek bersama permisoerinja radja berkata:
„Dengen dapetnja Hoema Hwa Hong-tjoen, boekan sadja ada membawa kabaekan bagi kita poenja poetri, tapi membawa kabaekan djoega bagi negri. Sasoenggoenja Hiantje poenja pemandangan ada tadjem sekali, bisa meliat orang."
Siauw Hoei djadi girang denger itoe poedjian.
Salagi radja berkata-kata, Hoema djoega bersama istrinja sedeng mengomong. Sabagimana biasanja satoe istri jang bertjinta, Kiongtjoe itoe berkata:
„Gakbo berdiam di Kimgo, soeatoe tempat jang dari sini ada terpisa dengan laoetan. Lantaran itoe djoega, membikin kita tida bisa penoehkan kawadjiban sabagi anak mantoe, boeat merawat mertoea. - Inilah jang membikin doeka hatikoe.
Dengen itoe perkatahan, njatalah bagi Hoema, bahoewa istrinja itoe ada saorang prampoean jang berbakti.
Sabelonnja Hong-tjoen menjaoet, Kiongtjoe telah berkata kombali.
„Pada Lie Gwanswe Hoema ada pernah apatah? - Apa ada kena sanak deket, dan kaloe terkena familie, dari fihak apatah?"
Atas ini pertanjahan, Hong-tjoen kasi taoe, bahoewa maski Hoenkangliong itoe tida ada kena sanak, tapi ada mendjadi almarhoem ajahandanja poenja sobat baek, jang tida bedah seperti soedara Kerna di waktoe ajahandanja itoe masi ada, perna angkat soedara pada Lie Tjhoen.
Djoega Hoema kasi taoe, bahoewa ajahnja di waktoe masi idoep ada mempoenjai saratoes toedjoe soedara angkat, djadi saratoes delapan bersama itoe ajahanda sendiri, semoea soedara-soedara angkat itoe ada orang gaga perkasa, jang sekarang sabagian telah meninggal doenia.
Lebi djaoe Hong-tjoen tjeritaken boedinja Lie Tjhoen, teroetama Gak Ho Tjiangkoen, jang soeda loepoetken dirinja dari kasoesahan besar. Tjoba kaloe tida ada itoe orang, pastilah ini hari ia tida bisa merasaken kasenangan dan kagirangan aken satiap hari hadepi Kiongtjoe.
Menginget keadahannja jang doeloe-doeloe. Hwa Hong-tjoen djadi sedi dan aer mata laloe mengetel.
Meliat begitoe, Kiongtjoe djadi kapingin taoe, bagimana ini soeami poenja kasoesahan pada waktoe doeloe-doeloe.
,,Kasoesahan bagimanatah jang Hoema dan Gakbo beserta sakalian familie telah rasaken ?" menanja Kiongtjoe: „tjobalah tjeritaken itoe, seande dari sitoe ada kadoekahan, biarlah kita-orang memikoel sama-sama."
Hong-tjoen oetjapken trima kasi atas katjintahannja ini istri jang manis. Kamoedian ia tjeritaken riwajat diri sendiri, jang terpitenah oleh Kwe Keng, kamoedian ditangkep dan bagimanal achirnja Gak Ho dateng menoeloeng, sampe kamoedian bisa ketemoe pada Lie Tjhoen.
Satoe persatoe ditjeritaken dengen terang, sabagimana dalem bagian kadoea pembatja telah liat.
Kiongtjoe djoega toeroet sedi, waktoe denger jang mertoeanja diperlakoeken begitoe roepa oleh Ong Swanwie dan Kwe Keng, maka waktoe soeminja menoetoerken itoe tjerita, Kiongtjoe merasa gemes pada itoe doea orang. Dengen perkatahan- perkatahan manis Giok-tji menghiboeri. Ia kata: sekarang itoe perkara soeda liwat, maka kaloe itoe kadjahatan jang orang telah perboeat tida bisa dibales dengen sendiri, biar serahken sadja pada Allah, jang tentoe nanti mengasi balesan tjoekoep.
,,Tjoema akoe menjesel jang Gakbo tida ada bersama-sama di sini," kata Kiongtjoe sabagi penoetoepnja: ,,|maka bagimana Hoema pikir, kaloe akoe kasi taoe pada Hoe-ong, soepaja dari sini diprenta orang ambil Gakbo bawa ka mari, soepaja kita-orang bisa tinggal bersama-sama?"
,,Boeat Kiongtjoe poenja katjintahan, akoe haroes hatoerken banjak trima kasi," kata Hwa Hongtjoen:,,soenggoe akoe merasa amat girang jang istrikoe poenja hati ada begitoe moelia."
Sahabisnja berkata-kata, Kiongtjoe laloe pergi ka kraton mengadep pada ajahanda, aken kasi taoe maksoednja, boeat ambil Hwa Kiongdjin dengen sakalian familie Hwa boeat diadjak pinda ka Siamlo.
Baginda dan permisoeri poen ada satoedjoe. Maka esoknja diprenta satoe oetoesan pergi ka Kimgo boeat ambil Hwa Kiongdjin.
Pada itoe oetoesan, Hong-tjoen ada kirim soerat pada iboenja dan pada Hoenkangliong, jang di itoe waktoe ada seboetken diri Tay Song poenja Gwanswe. Dalem itoe kadoea soerat tida perloe diterangken lagi, tentoelah tjoema membitjaraken sadja oeroesan familie poenja kapindahan ka Siamlo, dan minta itoe iboe bersama sakalian kaloewarga poenja berangkat.
Waktoe itoe oetoesan pergi, Kiongtjoe kaliatan repot mamerenta orang bersiken loteng Hwalauw, tambaken banjak perabot dan taroken roepa-roepa perhiasan boeat itoe mertoea dengen sakalian koelaw arganja jang aken dateng.
Oetoesan jang diprenta itoe, tida lama telah sampe di Kimgo dan lantas mengadep pada Lie Tjhoen, aken sampeken itoe soerat jang dibawa.
Hoenkangliong sasoedanja membatja itoe, laloe tanja pikirannja Gak Ho.
Gak Ho jang ditanja laloe menjataken pikiran, bahoewa kainginannja Radja Siamlo dan Hwa Hong-tjoen, itoelah tida lebi dari atoeran jang pantes. Kerna masatah anak di mana iboe dimana? Sebab itoe perpisahan jang djaoe, pastilah koerang menjenangken pada hati.
„Maski kita semoea Hengte ada orang-orang paperangan jang gaga,“ kata poela Gak Ho lebi djaoe: „Hwa dan Tjin Kiongdjin ada orang-orang prampoean jang berhati moelia, dengen bertempat dalem satoe roemą. sedikitnja ada menerbitken djoega rasa kikoek. Maka baek sekali permintahannja Radja Siamlo kita loeloesken, sebab itoelah ada berdasar pada peradatan.“ Laen-laen orang gaga djoega menjataken pikiran seperti apa jang Gak Ho baroesan menjetaken. Maka hal ini gampang sadja dipoetoesken.
Begitoelah sasoedanja berempoek, Lie Tjhoen laloe masoek ka dalem dan bertaoeken hal ini pada itoe kadoea Soso, jang djadi amat girang satelah denger itoe kabar.
Tjin Kiongdjin poen, jang dikasi taoe ini perkara, djadi amat girang. Kerna ini njonja djanda jang memang sadari di Tiongkok ada bertempat sama-sama dalem satoe roema, tentoe sadja aken toeroet pindanja Hwa Kiongdjin, kerna Hongtjoen poen marika pandang sabagi anak sendiri.
Sigra djoega orang lantas memberesken barang-barang, esoknja koelawarga Hwa laloe membri slamat tinggal pada sakalian Hohan dan familie prampoean, sedeng rasa soekoer dan trima kasi atas pertoeloengannja itoe sakalian Sioksiok, tida katinggalan.
Sabaliknja familienja Hoenkangliong djoega tida loepa oetjapken perkatahan-perkatahan manis dan membri slamat, dengen harep bisa lekas bertemoe kombali.
Waktoe doedoek makan minoem, itoe njonja-njonja semoea pada kaloear aer mata. Hwa Kiongdjin menjataken bagimana piloe rasa hatinja, boeat ini berpisahan. Tapi njonja jang mendjadi koelawarganja Lie Tjhoen dan Hoei Po, laloe memboedjoek dengen perkatahan-perkatahan manis, katanja: kendati djaoe orangnja, kaloe deket di hati, toch salamanja nanti merasa tinggal deket sadja.
Salagi orang prampoean doedoek berdjamoe pada satoeroenja, Gak Ho panggil itoe boedak toea jang satia, jaitoe Hwa Sien, jang sabagimana pembatja tentoe masi inget, jang dengen pembitjarahannja si kolot dalem itoe roema berhala, Gak Ho djadi dapet taoe bahaja jang mengantjem Hwa Kiongdjin dengen sakalian koelawarga: Dan kaloe sekarang Hwa Kiongdjin tertoeloeng dari itoe bahaja dan mendapetken kasenangan di ini waktoe, haroes dibilang ada atas pahalanja si kolot itoe.
Hwa Sien laloe dateng mengadep dengen hormat.
Gak Ho laloe pesen, harep Hwa Sien soeka berlakoe hati-hati aken mendjaga madjikannja jang bakal berdiam di negri Siamlo. Dalem sagala perkara, haroes berlakoe teliti.
Hwa Sien manggoetken kapalanja, dan berdjandji djoega, sabrapa bisa ia nanti penoehken kawadjibannja sabagi satoe hamba jang satia.
„Tjoema ini sedikit pesenan sadja jang akoe briken, dan sabagini poen ada tjoekoep boeat kaoe,“ kata Gak Ho.
Koenjoeng-koenjoeng ini orang gaga dapet inget apa apa jang berhoeboeng dalem Hoenkangliong poenja maksoed besar, maka sigra djoega ia katemoeken Lie Gwanswe dan kasi taoe, bahoewa pada Hwa Hoema ia ada djandjiken doea panglima dan tigaratoes soldadoe. Dan berhoeboeng dengen karadjahannja Radja Siamlo, ia lantas bisiki apa-apa di koepingnja Lie Tjhoen.
„Ja, bagoes, bagoes,“ kata Lie Gwanswe dengen soeara pelahan dan manggoet-manggoet.
Kamoedian laloe dikaloearken prenta, jang Lie Hoen berdoea Ko Tjeng boleh komendir limaratoes balatentara boeat menganter koelawarganja Hwa Kiongdjin, dan di sana ini doea panglima moesti berdiam sadja di gedongnja Hoema salakoe bala pelin doeng, sampe mendapet laen prenta.
Apa Gak Ho merasa koeatir nanti terbit satoe perobahan jang lebi doeloe tida didoega maka ia kasi pikiran pada Hoenkangliong boeat taro itoe doea panglima di gedongnja Hoema Hwa Hong-tjoen? Kerna dengen taro itoe doea panglima perang jang gaga perkasa, pengarang dari ini tjerita ada oepamaken: seperti djoega taro matjan di dalem oetan boeat mengawasi gerakennja laen-laen binatang ketjil; atawa: berdiamnja naga di laoetan boeat mengawasi sakalian oedang dan ikan-ikan.
Tapi dengen alesan, jang itoe doea panglima bersama limaratoes soldadoe, tjoema disoeroe menganter dan melindoengken koelawarga Hwa, djadi kaliatannja: ini orang-orang gaga di Kimgo ada tjinta betoel pada itoe familie.
Inilah soenggoe ada satoe taktiek jang bagoes sekali.
Sigra djoega Hwa Kiongdjin dan Tjin Kiongdjin bangoen dari itoe medja perdjamoean, hatoerken trima kasi dan slamat tinggal, teroes pergi ka kapal jang memang soeda bersadia boeat berangkat.
Gak Ho laloe silaken Lie Hoen bersama Ko Tjeng dan tentaranja naek ka kapal, kamoedian djangkar diangkat dan kapal itoe belajar.
Gak Ho poen ada toeroet dalem itoe pelajaran menganterken, kerna ia hendak pesen apa-apa pada Hwa Hong-tjoen, satoe pesenan jang moesti di sampeken oleh moeloetnja sendiri di koepingnja itoe orang moeda.
Itoe waktoe laoetan ada terang dan kapal belajar dengen dapet angin baek. Maka di sapandjang perdjalanan itoe, Hwa Kiongojin dan Tjin Kiongdjin ada dapet banjak pemandangan jang menjengken hati.
Dalem perdjalanan ini tida ada apa-apa jang perloe ditjeritaken.