Pembalesannja Kawanan Liangsan/Bagian katiga/Bab 7

by Tong Th. Fuctriorider

VII
Dengen pertoeloengan Lie Tjhoen, An To-tjwan terloepoet dari bahaja dan katemoe banjak sobat lama.

Brapa hari kamoedian, sigra djoega telah sampe di negri Siamlo. Djaoe-djaoe sabelonnja kapal itoe menempel pelaboean, djoeroekabar laloe wartaken pada Hwa Hong-tjoen, maka waktoe familie Hwa sampe, di pinggir pelaboean soeda ada kaliatan Hoema bersama Kiongtjoe dan pengikoet-pengikoetnja.

Kiongtjoe samboet mertoeanja dengen lakoe hormat dan djalanken peradatan agoeng, jang membikin Hwa Kiongdjin poenja hati sabesar goenoeng.

Hwa Hong-tjoen pimpin iboenja naek ka darat, jang satelah sampe, pengikoet-pengikoetnja poen samboet dengen segala kahormatan, menoeroet atoerannja hamba jang menjamboet permisoeri.

Tjin Kiongdjin djoega dapet itoe kahormatan jang tida berbedah, hingga inilah membikin girangnja itoe doea njonja bangsawan.

Sigra djoega dengen kandarannja radja, itoe koelawarga diadjak ka astana, dimana Radja Siam-lo bersama permisoeri Siauw Hoei soeda menoenggoe dan samboet datengnja itoe pembesar beserta. Tjin Kiongdjin, jang teritoeng djadi koelawarganja. Dalem ini pertemoean, radja dan permisoeri ada banjak mengomong manis-manis. Kamoedian diboeka perdjamoean sabagi membri slamat dateng.

Dari astana baroelah marika berangkat ka loteng Kwalauw, jaitoe tempat jang memang telah disadiaken boeat djadi tempatnja tinggal.

Hwa dan Tjin Kiongdjin laloe preksa itoe loteng, dimana kaliatan sagala apa ada rapi dan beres, hingga menjenangken sekali hatinja,

Hong-tjoen dan Giok-tji Kiongtjoe ada rawati, sabagimana pantesnja anak mantoe jang berbakti.

Tentoe sadja dalem ini pertemoean, itoe anak dan mantoe ada menanjaken ini itoe dan banjak bitjara perkara-perkara jang berhoeboeng dengen kasenangan. Tapi inilah tida perloe boeat ditoetoerken terlaloe pandjang.

Sasoeda melajani orang toea sendiri, Hongtjoen laloe doedoek di loear bersama-sama Gak Ho, dan ini Siok-siok laloe kasi taoe, bahoewa ia ada bawa doea panglima jang terdiri dari Lie Hoen dan Ko Tjeng, bersama limaratoes soldadoe boeat di tinggalken di sini aken mendjaga gedong Hoema sabagi pelindoengan.

Kamoedian dengen berbisik Gak Ho kasi taoe maksoednja jang bener dari dikirimnja itoe doea Hengte, dan minta Hong-tjoen lantas djalanken sigra pesenannja ini.

„Baek, sigra djoega Siauwtit nanti pegi ka astana boeat kasi taoe ini perkara,“ kata Hoema.

Dengen tida menoenda lagi hari, itoe lohor djoega Hoema laloe pergi katemoeken pada Radja Siamlo, boeat kasi taoe, bahoewa Lie Gwanswe jang mendjadi familienja ada kirim doea panglima bersama limaratoes soldadoe pengawa, boeat melindoengken dirinja, dan ini sadjoembla balatentara ia minta baginda kasi perkenan boeat ditempatken deket gedongnja.

„Betoel di sini djoega ada panglima perang dan soldadoe, dan troesa koeatir tida dapet pelindoengan tjoekoep,“ kata Hoema: „tapi kaloe pengiriman ini ditoelak, pasti membikin koerang senang hatinja Lie Pehoe. Sabaliknja kaloe ditrima, boekan sadja hal itoe bisa membikin senangnja, malah ada bergoena djoega boeat bantoe mendjaga ini negri. Kerna itoe doea Taytjiang poen ada orang-orang jang gaga perkasa.“

„Oh, itoelah ada baek sekali,“ kata baginda dengen girang, jang laloe briken perkenannja. Maka Hoema laloe oetjapken banjak trima kasi dan lantas moendoer kaloear dari astana, balik ka tempat sendiri.

Kamoedian Hong-tjoen boeroe-boeroe katemoeken Gak Ho dan kasi taoe, jang baginda tida ada kaberatan boeat trima itoe, kerna satelah dikasi taoe, sigra djoega radja membri perkenan sabagimana jang telah di-ingin.

„Bagoes! itoelah bagoes!“ kata Gak Ho dengen girang, kerna maksoednja njata bakal berhasil dengen senang.

„Dan sekarang, akoe haroes pesen pada kaoe, Siauwtit,“ kata poela itoe paman jang berakal boedi.

„Dengen senang hati Siauwtit nanti trima Siok-siok poenja pengadjaran,“ kata Hoema sambil membongkoki diri.

„Sabrapa bisa kaoe haroes berlakoe dan berboeat, jang bisa membikin hatinja baginda djadi girang,“ kata Gak Ho: „pada Kiongtjoe haroes berlakoe hati-hati, djangan bikin sampe timboel tjoeriga apa-apa, sedeng pada rahajat negri, kaoe haroes berlakoe moera, adil dan penjajang. Djangan taloekin orang dengen kakoeatan, hanja taloekilah hatinja dengen kaoe poenja priboedi dan kabedjikan. Pasang mata biar betoel, djangan berlakoe sombong dan tjongkak, jang bisa menerbitken orang poenja rasa ewah dan koerang senang.“

„Siauwtit perhatiken betoel Siok-siok poenja pesenan dan pengadjaran,“ kata Hwa Hong-tjoen.

Sasoedanja mengasi pesenan jang perloe, Gak Ho laloe balik kombali ka pelaboean dengen teranter oleh Hoema, kamoedian iaorang membri slamat tinggal dan kapalnja Gak Ho belajar teroes ka Kimgo.

Sasampenja di tempat sendiri, Gak Ho laloe mengadep pada Hoenkangliong dan kasi taoe: bahoewa itoe pesenan soeda disampeken pada Hong-tjoen, dan bagimana baginda radja tida bikin kaberatan boeat tempatken itoe doea panglima bersama limaratoes soldadoe di gedong Hoema.

Lie Tjhoen menjataken girangnja hati. Maka apa jang dibitjaraken lebi djaoe, tida perloe dinjataken di sini, kerna sigra djoega pembatja nanti dapet taoe.

. . . . . . . . . . . . . . . . .

Demikianlah moelai dari itoe hari, Kimgo poenja keadahan djadi samingkin mahmoer. Sebab oeroesan pamerentahan ada didjalanken dengen adil, maka tida ada lagi perkara-perkara pitenah atawa aniajahan, sabagimana doeloe di waktoe Swa Liong, sering terdjadi.

Dalem sapandjang waktoe jang berikoet, rahajat di Kimgo ada merasaken pengidoepan jang beroentoeng.

Semoea pendoedoek, baek jang berdagang maoepoen jang bertani, ada bekerdja dengen ra- djin dan soenggoe hati. Di mana ada oetan-oetan atawa tana kosong, lantas diboeka dan dioesahaken soepaja bisa mengaloeraken hasil. Lantaran keradjinannja rahajat, dan prikeamanan tida terganggoe, maka orang-orang jang mentjari poen djadi senang.

Lantaran begitoe, hasilnja kas negri poen djadi bertamba lipat-lipat.

Ramsoemnja Kimgo tatkala itoe soeda seperti goenoeng, hingga tjoekoeplah boeat dipake dalem bebrapa taon lamanja.

Hoenkangliong jang mendjadi Gwanswe, satiap hari prenta orang adjar baris boeat dipake dalem waktoe jang perloe. Pasoekan perang, baek darat maoepoen di laoet, tida brentinja ditamba dan diperbaeki, hingga Kimgo poenja angkatan perang itoe waktoe djadi tegoe betoel.

Pada soeatoe hari, waktoe diboeka perhimpoenan pada sakalian Hengtenja, Lie Tjhoen ada berkata :

„Doeloe Song Kong-beng jang terkenal pande, dengen terbantoe oleh Gouw Hak-kioe dalem oeroesan paperangan dan tertoendjang oleh Louw Tjoen-gie, hingga Liangsan bisalah mengasi liat sikapnja jang angker. Tapi bagi keadahankoe, menilik kabodoan diri-sendiri, soenggoeh, dari bermoela tida sekali bisa didoega aken bisa bangoenken ini pakerdjahan besar. Dan kaloe sekarang pakerdjahan ini telah tertambah djoega, itoelah ada dari lantaran mengandelken Tjiongwi Hengte poenja pikiran dan tenaga, hingga kita-orang bisa djoega rasaken kasenangan, — ja, soeatoe kasenangan, jang tadinja tida lebi dari impian sadja.“

„Keadahan waktoe tida sama, keadahan ada gampang dan soeker,“ kata Gak Ho: „ini poelo di loear laoetan boekan ada itoe negri jang diseboet Tiongkok, pendoedoek di sini poen berbedah djaoe, kaloe dibandingken dengen bangsa kita. Orang-orang di ini tempat ada bodo dan djoedjoer, tapi rahajat di sana ada sabaliknja. Maka tidalah heran kaloe ini poelo gampang ditaloeki dan dibikin perobahan.“

Perkatahannja Gak Ho itoe membikin Hoenkangliong djadi tertawa dan akoeh, sasoenggoenja djoega apa jang dibilang itoe bener adanja.

Laen harinja Lie Tjhoen djalan-djalan ka poelo Tjingsoei, boeat sakalian mamereksa djoega keadahannja itoe tempat jang ada di bawah pendjagahannja ia poenja doea Hengte, dimana ia dapetken semoea ada baek, hingga menjenangken sekali hatinja.

Kerna tida ada apa-apa jang haroes dibikin perobahan, maka Lie Gwanswe laloe poelang kombali ka Kimgo. Tapi baroe sadja kapalnja sampe di moeloet moeara, koenjoeng-koenjoeng aer laoet berombak besar dan angin riboet lantas dateng dari koeliling fihak, hingga kapal jang maoe belajar djadi begojang pergi dateng, lantaran tertampar ombak-ombak jang besar.

Lie Tjhoen oeroengken berangkatnja di itoe waktoe, maka sigra djoega kapal itoe berlaboe kombali dan bernanti sampe angin dan ombak moelai sirep. Tapi tida lama ada kaliatan satoe kapal besar jang lagi belajar, dan ini kapal jang blakangan poen mendapet djoega ganggoean samatjem itoe.

Anak-anak kapalnja jang roepanja tida dapet prenta boeat brenti. telah djalanken teroes ka soeatoe tempat hingga kerasnja angin, maka satoe tiang lajar jang besar mendjadi pata dan kapal itoe terantjem bahaja.

Kamoedian kaliatan itoe kapal menoedjoe ka poelo Kimgo boeat dapetken perlindoengan.

Meliat begitoe, Hoenkangliong lantas prenta tentaranja mengasi pertoeloengan. Tapi sabelonnja orang-orang dari poelo Tjiangsoei sampe mendadak dateng poela ombak-ombak besar jang sagede goenoeng dan lantas timpa itoe kapal, hingga sakedjeb djadi miring dan lamboengnja mengenaken karang.

Sigra djoega kapal itoe djadi petja, penoempang bersama sekalian barang-barangnja tersapoe ombak dan aroes, hingga terpentjar ka sana ka mari. Beroentoeng tentara Kimgo kaboeroe sampe dan dengen gaga brani itoe sakalian soldadoe aer menoeloeng orang-orang jang teranjoet, hingga dalem sakedjeb bisa dipoengoet bebrapa poeloe orang jang dinaekin kadalem praoe. Tapi jang binasa lantaran tida kaboeroe ditoeloeng, djoega boekan sedikit djoemblanja.

Kamoedian praoe-praoe penoeloeng itoe balik kombali ka darat dan rebahken itoe orang-orang jang soeda djadi pangsan dan moentaken banjak aer, soldadoe-soldadoe Kimgo membri teroes pertoeloengan sabagimana jang perloe. Sasoedanja satoe-satoe orang itoe soeda ditoengingin soepaja aer jang ada di dalem peroet bisa kaloear lantas di kasi minoem obat dan kamoedian tidoerken.

Selang sedikit waktoe itoe orang-orang bertjilaka soeda tersedar.

Marika menengok koeliling dan kamoedian menanja pada itoe soldadoe, dimana marika dapet taoe jang dirinja masi idoep dan lantas oetjapken trima kasi.

Kamoedian dengen teranter oleh itoe soldadoe-soldadoe jang merawati, sala satoe dari itoe orang, jang dari pakeannja ada mengoendjoek saorang berpangkat, laloe mengadep pada Hoenkangliong. Dengen berlakoe hormat orang itoe djalanken peradatan dan oetjapken banjak trima kasi atas pertoeloengan jang telah dibriken, sebab kaloe tida ada ini Gwanswe, pastilah dirinja soeda binasa. „Soenggoe besar sekali Gwanswe poenja boedi,“ kata itoe orang, pada sasoedanja abis djalanken kahormatan: „maka boedi jang sabesar langit ini, jang telah reboet djiwakoe dan kawan-kawankoe, belon taoe sampe kapan bisa dibales.“

„Tapi kaoe ini orang dari manatah ?“ tanja Lie Tjhoen sambil memandang. „Apa jang akoe berboeat, itoe toch tida lebi dari kawadjibannja satoe manoesia, jang haroes toeloeng menoeloeng pada sasamanja,“ kata Lie Gwanswe sambil memandang teroes: „tapi kaoe ini orang dari manatah ?“

„Akoe ini pendoedoek di Tongking,“ saoet itoe orang dengen merenda: „jang oleh baginda diprenta pergi ka negri Kolekok dan sekarang hendak poelang kombali ka Tiongkok.“

„Oh, kaoe ini oetoesannja Sri baginda Song?“

„Benerlah, Gwanswe.“

„Sajang sekali akoe poenja soldadoe tida kaboeroe toeloeng semoea orang-orang jang dapet itoe katjilakahan, kerna ombak ada terlaloe besar. Hingga kaoe poenja kawan dan barang-barang sabagimana besar tentoė mendjadi korbannja laoetan.“

„Tapi akoe poenja kawan, jang djoega ada mendjadi oetoesan, njata telah dapet ditoeloeng djiwanja, kerna baroesan akoe liat ia masi rebah. Boeat pertoeloengan jang besar itoe, lagi sakali akoe haroes bersoekoer.“

Salagi marika berkata-kata, itoe satoe oetoesan lagi, jang tadi masih rebah, soeda bangoen dan mengadep pada Hoenkangliong boeat hatoerken trima kasinja. Dan atas pertanjahannja itoe Gwanswe, orang ini menjaoet, bahoewa ia ada pangkoe djabatan dokter besar dari baginda poenja kamar obat Tay-ie-wan.

Satelah mendenger itoe soeara dan liat roepanja itoe orang, Lie Tjhoen djadi terkedjoet. Sakoetika lama ia awasin dan kamoedian berkata:

„He, apatah kaoe ini boekannja An To-tjwan Sianseng?“

„Ja, benerlah,“ saoet itoe oetoesan sambil moendoer dan bales mengawasi, kamoedian berkata dengen soeara terperanjat:

„Apatah akoe boekan ada berhadepan pada Lie Tjhoen Twako ?“

„Hahaha!, inilah ada satoe pertemoean jang tida didoega,“ kata Lie Tjhoen sambil toeroen dari tempatnja doedoek dan pimpin itoe orang, jang sasoenggoenja boekan laen dari An To-tjwan, satoe thabib jang termasoehoer di Liangsan.

Koetika meliat jang kawannja ada kenal pada ini penoeloeng, itoe oetoesan jang satoe tinggal mengawasi dengen bengong, hatinja ada girang jang tertjampoer kaget. Sakoetika lama ia tida berkata-kata lagi, hanja tinggal doedoek dan mendengeri orang poenja omong.

Lie Tjhoen laloe menanjaken tentang keadahannja ini sobat jang soeda terpisa begitoe lama, dan sekarang ia dari mana, maka boleh dapet ini katjilakahan.

Atas itoe pertanjahan, An To-tjwan mendjawab: pada sahabisnja dimaloemken paperangan pada negri Liauw, ia dipakerdjaken dalem kamar obatnja baginda dan diangkat djadi dokter besar. Dan kaloe sekarang ia ada di sini, itoelah lantaran pada baroe-baroe ini radja kolekok ada kirim soerat pada Baginda Song, membri taoe penjakitnja ada terlaloe berat dan di Kole tida ada satoe thabib jang bisa semboehken penjakitnja, maka itoe radja taloekan minta dengen sanget Sri Baginda soeka toeloeng kirim satoe thabib jang pande dari Tiongkok, boeat toeloeng obatin padanja.

Ini permoehoenan ditrima oleh baginda, dimana ia bersama ini sobat, jang bernama Louw Soewat, dan djoega ada bekerdja dalem kamar obat terseboet, diangkat mendjadi oetoesan boeat temen pergi sama-sama ka itoe negri.

Dengen pertoeloengannja, begitoe An To-tjwan teroesken bitjaranja, Radja Kole telah semboeh dan sekarang ia maoe poelang kombali ka negri sendiri. Tapi tida doega, sasampenja di ini laoet dapet itoe katjilakahan. „Soenggoe beroentoenglah dapet Twako poenja pertoeloengan,“ kata An To-tjwan sabagi penoetoepnja: „kita-orang soeda bisa ditoeloeng, tjoema jang ilang barang-barang anteran dari Radja Kole, jang boeat disampeken pada Sri Baginda,“

Satoe persatoe tentang penjakitnja radja Kolekok jang ia soeda semboehken, To-tjwan tjeritaken terang. Maka Hoenkangliong djadi girang dan lantas soeroe bikin persadiahan boeat berangkat ka Kimgo, kaloe angin dan ombak telah moelai sirep.

Betoel sadja tida lama kamoedian ombak soeda moelai koerangan besarnja dan Lie Tjhoen laloe adjak ini kadoea oetoesan berangkat ka Kimgo, dan di sapandjang djalan itoe, Hoenkangliong tjeritaken, bahoewa ia bersama sekalian Hengte ada tinggal di itoe poelo boeat djadi tempat berlindoeng.

An To-tjwan djadi girang denger itoe katerangan. Maka satelah sampe, sakalian Hohan laloe samboet dan masing-masing menjataken girangnja hati atas ini pertemoean jang tida didoega.

„He Gak Hengte djoega ada di sini?!” kata itoe thabib dengen hati girang jang tertjampoer kaget, waktoe meliat Gak Ho dateng ka itoe roewangan: „kaoe di sini ada senang, tapi kaoe tida taoe apa soeda terdjadi dengen Touw Hin, berhoeboeng dengen kaoe poenja merat.“ Gak Ho djadi dan kamoedian baror berkata:

„Ada terjadi apakah pada Touw Hin?“

„Ia soeda menanggoeng banjak kesangsarahan,“ kata To-tjwan jang lantas tjeritaken, bagimana lantaran Soen Liep kirim soerat jang boeat disampeken pada Gak Ho, hingga Touw Hin soeda ditangkep dan terhoekoem boewanf. Blakangan, lantaran itoe perkara, sampe Lie Eng djoega kena terembet-rembet.

Satoe persator An To-tjwan tjeritaken dengan terang, hingga sekalian Bohan jang denger djadi merasa piloe.

„Ah, kasjan Touw Han jang djoedjoer, moesti alamken itoe perkara tida enak, lantaran dirikoe ini,“ kata Gak Ho sambil menghela napas.

„Tapi, toenggoe doeloe,“ kata An To-tjwan: „Akae belon tjerita abis.“

Kamoedian ia tjeritaken, begimana blakangan Lie Eng bergerak di Immatjwan, berhoeboeng dengen itoe perkara. Dan Touw Hin poen kabarnja sekarang ada di itow goenoeng, bersama sekawan orang-orang gaga, aken menjatakan berdiri sendiri.

Gak Ho merasa legah joega, sasoedanja denger jang itoe bahaja dirinja Touw Hin, bisa dapet disingkiri. Sedeng laen-laen orang gaga dari bermoela itoe tjerita ditoetoerken, tida ada saorang jang tida djadi mengelah napas, waktoe mendenger itoe.

Sasoedanja abis tjerita-tjerita, Lie Tjoen laloe prenta orang bikin makanan dan oendang ini sobat lama doedoek berdjamoe.

Sembari minoem Lie Gwanswe minta To-tjwan toetoerken keadahan di dalem negri, sedeng Lauw Soe-wat tinggal mendengeri sadja.

„Oh, keadahan dalem negri ini waktoe betoel-betoel ada terlaloe kaloet,“ kata itoe thabib: „boeroeng-boeroeng serwiti dan gredja, satoe kali bertempat dalem orang poenja roema, soeda lantas djadi seperti boeta pada behaja jang mengantjem.“

„Kaoe taoe, Twako, bagimana keadahan oeroesan negri?“ kata poela itoe thabib: „radja dan mantri, satiap hari tida mengoeroes laen dari pada bikin plesir dan tjari kasenangan hati, dan lantaran negri tida teratoer beres, hingga di sana sini djadi terbit pemberontakan dan pendjahat-pendjahat djadi meradjalela. Pembesar-pembesar berlakoe kedjem, keras dan hoekoeman didjalanken dengen keras, hingga satiap hari orang bisa denger keloeh-kesahnja anak negri jang dipidjit dan tertindes.“

„Ah, akoe tida bisa bilang, apa jang nanti terdjadi di kamoedian hari, kaloe negri jang berkeadahan begitoe roepa,“ kata itoe thabib sabagi penoetoepnja ia poenja penoetoeran: „ bahaja beibat soeda mengantjem di sans sini, hingga anak negri tjoema menoenggoe sadja waktoe tjilaka jang mengantjem padanja."

Hoenkangliong dan jang laen-laen, satelah denger itoe tjerita, lantas pada gojang kapala.

„Kaloe keamanan ada begitoe roepa, tentoelah bakal berachir dengen satoe kabinasahan," kata Gak Ho.

„Masa ka mana parannja," saoet jang laen-laen.

„Laen dari itoe," kata An To-tjwan: „akoe denger kabar Teng Koan soeda boeka djalan boeat Tio Liang-sih persembahken satoe tipoe daja jang amat berbahaja, jaitoe bikin persarikatan pada negri Kimkok, boeat melabrak pada negri Liauw."

„He, apatah maksoednja Tiongkok jang besar, bikin persarikatan pada negri Kimkok jang djaoe?" tanja Lie Tjhoen.

„Maksoednja poen boekan laen, hanja soepaja bisa ambil kombali tana-tana di bilangan Jan dan Hoen."

„Soeda terdjadi itoe persarikatan ?"

„Soeda beres."

„Tjilakalah kaloe begitoe."

„Inilah jang akoe seboet. Tida lama paperangan poen bakal dimaloemken antara itoe tiga negri."

„Soenggoe aneh betoel bagimana baginda poenja pikiran," kata Lie Gwanswe sambil gojang kapala, sedeng roepanja seperti orang berdoeka: „pergi bersariket pada jang djaoe, poekoel jang deket. Apa itoe boekan perboeatan jang gegaba? Ja, satoe perboeatan jang bisa datengken rasa menjesel di kamoedian hari!“

„Tentang itoe perkara, telah dapet didenger djoega oleh Radja Kole,“ kata An To-tjwan: „sabagimana Twako, itoe radja poen ada menjataken rasa koeatirnja, kaloe Tiongkok moesti bersariket pada Kimkok, jang ia doega, bakal mendatengken nasib djelek bagi kita-orang poenja negri. Maka lebi djaoe itoe radja minta akoe persembaken satoe nasehat pada Sri Baginda, kaloe akoe soeda sampe di Tongking.

„Tapi itoe perkara akoe kira bakal pertjoema sadja,“ kata Lie Tjhoen: „apa Anheng pertjaja kaloe akoe bilang begitoe?“

„Ja, akoe poen kira begitoe,“ saoetnja To-tjwan: „maski Radja Kole poenja nasehat ada baek, tapi akoe tida bisa sampeken pada baginda. Apalagi akoe sendiri tida ada niatan boeat dapet pangkat jang besar atawa keagoengan sabagi laen-laen mantri jang gemar dengen kamoeliahan, — Menginget diri sendiri poenja karendahan dan kabodohan, maka akoe tida maoe tjampoer-tjampoer dalem oeroesan pamerentahan. Betoel di sini akoe ada tjerita pandjang pendek, tapi itoelah tjoema pada Hengtiang sadja, tapi sasampenja di hadepan baginda, akoe nanti toetoep moeloet seperti satoe ikan.“

Waktoe orang berkata-kata, Louw Soe-wat tinggal mendengeri sadja. Tida ada satoe perkatahan jang ia oetjapken.

Samingkin denger To-tjwan toetoerken oeroesan negri, koepingnja dipasang terlebi terang, seperti koeatir, kaloe-kaloe ada perkatahan jang liwat tida dapet didenger.

Dari roepanja bisa diliat, bahoewa Louw Soe-wat boekannja saorang jang baek. Ia ini doeloe pada sabelonnja bekerdja di kamar obatnja baginda, sahari dengen sahari biasa membawa boengkoesan sambil kempit pajoeng masoek di kampoeng-kampoeng aken mendjoeal obat-obatan boeat dapetken sedikit oewang. Tapi blakangan, atas pertoeloengannja Tjoa Keng, ia laloe dipakerdjaken sabagi pembantoe dalem kamar obat Thay-ie-wan, di bawa prentanja An To-tjwan.

Begitoelah waktoe baginda titahken itoe thabib pergi ka Kole, Louw Soe-wat djoega diprenta toeroet bersama-sama,

Dalem pakerdjahannja di itoe kamar obat, satelah dapet taoe jang An To-tjwan ada lebi pande dari dirinja dan mempoenjai pengartian lebi loewas dalem hal mamereksa penjakit, hatinja djadi seperti mengiri. la kapengin sekali bisa laloeken ini thabib, soepaja tempat kadoedoekannja sabagi thabib besar ia bisa gantiken.

Tapi tida ada djalan boeat lakoeken itoe kawan jang djadi saingan.

Begitoelah sekarang, satelah denger itoe omongan-omongan dan dapet taoe, jang An To-tjwan ada bersobat pada ini orang-orang gaga, ia lantas pasang koeping, kaloe-kaloe dari sini terboeka satoe djalan boeat singkiri itoe orang jang hatinja ada merasa tida senang.

„Kita poenja tempat kadiaman, maski poen tjoema satoe poelo dan kaliatannja masi seperti oetan beloengkar,“ kata poela Lie Gwanswe jang masi landjoetken bitjaranja pada itoe sobat lama: „tapi dalem segala perkara ada senang dan laloewasa, sedeng pengasilan jang terdapet dari ini poelo, djoega tida koerang. Maka berhoeboeng dengen Hiante poenja perkatahan jang baroesan, jang tida ingin tjampoer lebi djaoe oeroesan pamerentahan, maka akoe harep kaoe soeka tinggal sadja di sini bersama-sama kita-orang, soepaja pagi dan sore kita-orang santiasa bisa berkoempoel. ― Bagimana kaoe poenja pikiran ?“

„Atas Twako poenja katjintahan, sasoenggoenja akoe haroes hatoerken banjak trima kasi,“ saoet An To-tjwan: „tapi lantaran pergikoe ada dengen firmannja baginda Keizer, maka wadjiblah kasoedahannja dari perkara jang akoe ada dioetoesken, lebi doeloe haroes dilaportken dan boeat berkoempoel di sini, ada perkara di blakang, kaloe kawadjiban soeda dilakoeken selesih."

,,Itoelah akoe tida moefakat," kata Lie Tjhoen: ,,betoel satjara atoeran moesti begitoe, tapi kaloe seandenja tadi tida kaboeroe ditoeloeng dan djiwamoe binasa di laoet, apa itoe djoega haroes ada jang merapport ?"

,,Kaloe sampe terdjadi demikian," kata jang laen:,,pastilah baginda tida nanti iboekin boeat prenta orang tjari Anheng poenja mait, hanja paling moedjoer poen disembajangin, laen dari itoe maoe apa lagi?"

Laen-laen Hohan djadi tertawa.

,,Ja, kaloe sampe takdirnja moesti mati di laoet, itoe soeda apa boleh boeat," kata itoe thabib jang djoega toeroet tertawa:,,tapi sekarang kadjadiannja toch ada laen?"

,,Nah soeda, begini sadja," kata Lie Tjhoen: ,,sekarang biar Louw Soe-wat sianseng sadja jang balik dan kasi taoe pada baginda, bahoewa kaoe telah binasa dalem laoet, lantaran kaleboenja kapal. Dengen merapport begitoe, kaoe boleh tida oesah balik kombali ka Tongking. ―― Bagimana?"

,,Ah, itoe djoega tida boleh djadi," saoet An To-tjwan: ,,sebab kaloe orang masi idoep dibilang mati, boekantah kita djadi berdjoesta pada djoengdjangan, itoe djadi berdosa dan tida boleh dilakoeken.“

Mendenger jang To-tjwan tetep tida maoe berdjoesta pada baginda, dan maoe penoehken doeloe kawadjibannja, Hoenkangliong djadi merasa apa-boleh-boeat dan tida memaksa lebi djaoe, maski hati ada menjesel boeat berpisa kombali. Kamoedian thabib ini bilang, besok ia maoe berangkat kombali.

Ini permoehoenan jang blakangan Lie Tjhoen tida loeloesken, kerna ia kata: dari hal ini sobat tida lantas maoe toeroet boeat tinggal di Kimgo, dan ingin penoehken doeloe kawadjibannja sabagi mantri jang satia, ia soeda loeloesken. Tapi boeat berangkat bergitoe terboeroe-boeroe, inilah betoel ia tida bisa trima, kerna satida-tidanja An To-tjwan haroes menginep sapoeloe atawa lima belas hari, baroelah boleh berangkat ka Tongking.

„Kita toch soeda berpisa lama sekali, boekan?“ kata Hoenkangliong kamoedian: „masalah sekarang, baroe sadja bertemoe, Anheng soeda maoe lantas brangkat begitoe tjepet, inilah bener-bener tida memoewasken hati?“

Atas permintahannja itoe Twako dan laen-laen Hengte jang berada di sitoe, terpaksa An To-tjwan trima djoega boeat menginep lebi lama, tjoema Louw Soe-wat jang merasa sedikit koerang senang, kerna ia kapingin lekas-lekas sampe boeat katemoeken koelawarganja di roema. Tapi maski begitoe, ia tida brani bilang apa-apa.

Begitoelah sampe hari mendjadi sore, baroelah perdjamoean itoe ditoetoep dan masing-masing laloe masoek tidoer.

Esoknja pagi, waktoe doedoek berkoempoel, To-tjwan minta liat Lie Tjhoen poenja tangan, sambil berkata:

„Tentang noedjoem akoe ada mengarti djoega sedikit, maka tjobalah akoe liat Twako poenja tangan, soepaja akoe bisa petang-petangin sedikit.”

Hoenkangliong laloe angsoerken tangannja.

To-tjwan laloe meliat dengen telitie oerat-oerat tangannja itoe Gwanswe dari Kimgo, jang sahabisnja mamereksa, ia berkata sambil tertawa:

„Lebi doeloe akoe haroes hatoerken Kionghi pada Twako, bahoewa menoeroet oerat tangan jang akoe preksa, di kamoedian hari Twako bakal trima kasenangan dan kamoeliahan, aken doedoek sabagi pembesar agoeng jang mengadep ka Selamatan.”

„Aken doedoek sabagi pembesar agoeng ?” begitoe Hoenkangliong oelangi perkatahannja itoe noedjoem sambil tertawa: „hahaha!, enak betoel!”

„Ja, djangan kaoe koerang pertjaja, Twako!”

„Tapi, boeat akoe, sabenernja asal bisa dapet samangkok nasi dan sajoer aken meliwati hari, dan dapet satjawan arak boeat membasaken tenggorakan, itoelah akoe soeda merasa tjoekoep. Dan boeat dapetken kamoeliahan, kabesaran atawa keagoengan, sabagimana jang Anheng bilang baroesan, itoelah tida ada dipikir dalem hatikoe.“

„Maski bener begitoe, tapi kaloe peroentoengan moesti termoelia dan terbesar, toch satoe hari nanti dateng itoe waktoe.“

Semoea orang jang ada dalem itoe roewangan pada tertawa dan girang.

Sahabisnja beromong-omong, kamoedian Lie Tjhoen adjak marika itoe makan minoem, begitoelah sadari harian ia bertemoe kombali pada An To-tjwan, saban Hoenkangliong dan sadereknja liwatken tempo makan minoem dan bertjerita-tjerita.

Achir-achir datenglah itoe hari jang An To-tjwan tetepken boeat berangkat, jaitoe selang sapoeloe hari sadari ia dapet itoe katjilakahan.

Pagi-pagi orangnja itoe Gwanswe soeda sadiaken sagala apa jang perloe, dan barang-barangnja Radja Kole jang sabagian dapet dipoengoet, dibajar kombali. Waktoe maoe berpisa Lie Tjhoen dan sakalian soedaranja pesen poma-poma, djangan An To-tjwan loepa boeat dateng kombali ka ini tempat, kaloe soeda sampe di kota Radja. To-tjwan memanggoet dan membri slamat tinggal.

Tapi sabelonnja thabib itoe berangkat, Gak Ho lantas menhamperi sambil berkata:

„Anheng poelang ka Tongking tentoe mendarat di kota Tengtjioe, boekan?“

„Ja, bener,“ saoetnja.

„Kaloe dari Tengtjioe pergi ka kota Radja. tentoe bakal meliwati goenoeng Tenghoensan, dimana akoe maoe kirim satoe soerat boeat Tjihoe Soen Liep.“

„Oh, boleh sekali. Moestail amat akoe nanti menampak nasib sabagi Touw Hin, lantaran bawa soeratmoe ini ka Tenghoensan.“

Gak Ho tertawa dan kamoedian serahken itoe soerat jang memang soeda sadia.

To-tjwan trima itoe dan simpen baek-baek dalem sakoenja.

Kamoedian. sasoedanja satoe pada laen membri slamat tinggal, sigra djoega kapal jang ditoempangken itoe belajar dari Kimgo menoedjoe ka Tengtjioe.

Dalem perdjalanannja jang blakangan ini, tida ada oezoer apa-apa jang menganlangken, maka liwat brapa hari kamoedian, sampelah marika di pelaboean Tengtjoe, dimana ini kadoea oetoesan laloe toeroen dan berangkat djalan. Tapi sebab masi djaoe, maka iaorang laloe sewa djoli. Satelah sampe di saboewa goenoeng tinggi, An To-tjwan prenta toekang djoli liwatken itoe goenoeng jang kaliatan. Tapi itoe penggotong-pengotong laloe kasi taoe, bahoewa di sitoe ada banjak Hohan, maka tida boleh gegaba kaloe orang djalan di bawahnja.

„Maski djalan di tempat jang djaoean poen,“ kata poela sala satoe dari itoe orang jang menggotong: „toch kita-orang moesti diam-diam, sebab kaloe rahajat dari itoe goenoeng dapet taoe ada orang liwat, tentoe kena dipegat.“

Louw Soe-wat jang memang berhati ketjil dan pengetjoet, satelah denger begitoe, lantas soeroe ambi laen djalan sadja, jang maski djaoean, asal slamat!

Tapi An To-tjwan kata: itoe semoea ada atas tanggoegannja.

„Hajoe, liwat teroes,“ kata itoe oetoesan pertama: „troesa takoet, kaloe ada apa-apa, kaoe lantas bilangin akoe.“

Dengen merasa apa-boleh-boeat, itoe toekang-toekang djoli toeroet djoega kainginannja itoe thabib, begitoelah iaorang liwat di bawahnja goenoeng terseboet.

Tapi, baroe sadja berdjalan sedikit djaoe, dari atas goenoeng lantas terdenger soeara gempar, jaitoe betoel sadja ada kaliatan banjak rahajat begal jang dateng mamegat sembari bertreak-treak minta oewang tjoeke djalan. Toekang djoli, dengen penoeh rasa takoet laloe bertaoeken hal ini pada penoempangnja.

To-tjwan laloe prenta brenti dan ia kaloear dari dalem itoe djoli sambil berkata: „He, kaoe-orang lekas naek ka goenoeng kasi taoe pada Soen Thaunia, bahoewa akoe orang dari Tongking dateng ka mari maoe katemoeken padanja!“

Satelah denger begitoe, itoe sakalian liauwlo laloe moendoer dan bebrapa orang lantas boeroe-boeroe naek ka goenoeng, bertaoeken hal ini pada Soen Liep, sedeng kawan-kawannja jang laen berkata:

„Kaloe Loja memang ada kenal pada Soen Taunia, baek naek sadja sama-sama.“

An To-tjwan manggoetken kapalanja dan sigra naek ka atas, menoedjoe ka pasanggrahan besar, dengen teriring oleh itoe sakalian Liauwlo.

Soen Liep dan kawan-kawannja, satelah denger itoe kabar, lantas kaloear, sedeng hati merasa heran, kerna belon taoe siapa orang jang dateng ka ini goenoeng.

Tapi, waktoe katemoe, girangnja boekan maen, kerna orang jang dateng ini poen ada sobat lama.

„Aha! Anheng,“ kata itoe Thaunia sambil menjamboet: „angin apatah ini jang manioep kaoe dateng ka mari?“ To-tjwan bersenjoem dan marika laloe naek teroes pergi ka Tjigithia, dimana ada berkoempoel laen-laen Holan, jang mendjadi sobatnja doeloe hari. Katjoeali Loen Teng-giok, jang ia tida kenal.

Tapi Louw Soe-wat, tida ada satoe orang dari itoe Thaunia-thaunia ada kenal. Maka sasoedanja membri hormat, masing-masing lantas pada berdoedoek.

Masing-masing menanjaken marika poenja keadahan jang sakean lama telah berlaloe, jaitoe pertanjahan-pertanjahan jang biasa dioetjapken oleh satoe sobat pada laen sobatnja jang baroe dikatemoe.

Kamoedian Soen Liep berkata:

,,Anheng di kota Radja ada banjak senang, belon taoe ini hari dateng ka mari ada apa kabar?"

To-tjwan djawab itoe sedikit, kamoedian kaloearken soeratnja Gak Ho dan serahken pada itoe orang jang haroes trima, sambil berkata:

,,Akoe ada bawa satoe soerat, tjobalah Soenheng preksa."

Soen Liep trima itoe dan lantas batja.

Boenjinja itoe soerat ada menbetoerken tentang berpisahannja itoe Bouwkoe dan Tjihoe, jang kamoedian Gak Ho tjeritaken tentang perdjalannja sabagi orang boeron, dan sekarang ia ada di Kimgo aken geraken peroesahan besar sama-sama Lie Tjhoen dan laen-laen Hengte jang namanja satoe persatoe diseboet terang Banjak lagi hal-hal jang ditoetoerken dalem itoe soerat, jang dari kapala sampe di achir.

„Kaloe begitoe iparkoe itoe ada di Kimgo, itoelah baek sekali,“ kata Soen Liep jang sasoedanja membatja abis itoe soerat: „pantas djoega sakeon lama akoe tida denger kabarnja.“

„Akoe poen soeda pernah liwat di Kimgo,“ kata Houw Seng: „itoe poelo betoel ada bagoes boeat djadi tempat pangkalan perang.

„Akoe poen rasa begitoe,“ saoet An To-tjwan jang samboeng bitjaranja itoe orang gaga; „djoestroe lantaran kabagoesannja itoe tempat, maka tida heran jang dalem sedikit waktoe Lie Twako soeda bisa taloeki negri Siamlo jang lebi besar.“

„Apa?, negri Siamlo telah ditaloeki oleh Kim-ga?“ menanja Soen Liep dengen heran, sedeng laen-laen soedaranja poen memandang dengen terperandjat.

„Ja, saoet itoe thabib jang lantas tjeritaken apa jang ia telah denger dari Hoenkangliong, tentang itoe poelo dan negri poenja oeroesan.

Ini bagian ditoetoerken pandjang lebar, sasoeatoe orang jang denger djadi amat girang, teroetama Wie Siauw-tjhit, jang sampe berdjingkrak-djingkrak,

An To-tjwan, tjeritaken dari bermoela sampe achirnja, dan bagimana sekarang Lie Tjhoen dengen sakalian soedara-soedaranja lagi koempoelken ramsoem dan koeatken angkatan perang, boeat menoenggoe waktoe jang baek aken madjoe lebidjaoe.

Semoea orang-orang gaga boekan sadja ada girang denger itoe Twako poenja pergeraken jang telah kaliatan hasilnja, malah memoedji djoega. Sedeng Siauw-tjhit dengen soeara njaring laloe berkata:

„Sabegitoe banjak kasenangan dan kagirangan jang akoe telah rasaken, belon pernah akoe merasa girang sabagi ini hari, waktoe denger An-heng poenja tjerita, hahaha! hahaha!“

Sasoeda brenti tertawa ia berkata lagi:

„Ja, belon pernah akoe merasa girang seperti ini hari, maka bolehlah dikata, jang ini kagirangan atawa kasenangan hati ada nomor satoe betoel, satelah denger kita poenja Hengte di laen tempat ada oesahaken tenaga seperti kita di sini."

Sahabisnja berkata, kombali ia tertawa poela

Lebi djaoe An To-tjwan tjeritaken djoega bagimana Touw-Hin soeda dapet tjilaka lantaran membawa soeratnja ini Soen Thaunia jang boeat disampeken pada Gak Ho, dan bagimana kamoedian Lie Eng poen terembet-rembet. Satoe persatoe, sabagimana jang waktoe masi di Kimgo ia tjeritaken itoe pada Gak Ho, sakarang To-tjwan tjeritaken djoega itoe pada Soen Liep.

Ini kabar tentoe sadja membikin hatinja Soen Liep merasa koerang enak, kerna lantaran ia, sampe Touw Hin dapet tjilaka, lebi poela Lie Eng jang tida taoe soeatoe apa poen tatoeroetan menampak nasib tjilaka. inte ih leppnil legem

„Ah, soenggoe!, sabegitoe lama akoe tida denger kabar tentang itoe perkara,“ kata Soen Liep sambil mengèlah napas: „kaloe tida Anheng jang tjerita, akoe tida taoe sama sekali halnja Touw Hin dan Lie Eng.“

„Ja, kasian betoel,“ saoet laen-laen Hohan: „abis bagimanatah?“

To-tjwan laloe toetoerken lebi djaoe dan kata:

„Tapi apa jang baroesan akoe toetoerken belon semoea, beion sampe di achir. Itoe katjilakahan sekarang soeda linjap.“

Sahabisnja kata begitoe ia tjeritaken bagimana sekarang Lie Eng dan Touw Hin, jang sasoedanja bisa lolosken diri dari bahaja besar, lantas berkoempoel di Immatjwan dengen satoeroe orang-orang gaga, dan paling blakang telah lawan tentara negri jang dipimpin oleh doea panglima.

Ini tjerita jang blakangan membikin Wie Siauw-tjit djadi lebi berdjingkrak-djingkrak, kerna ia kata, bener-bener hatinja merasa amat girang dengen ini warta, kerna njatalah semoea Hengte jang ada mengoembara di sakóeliling tempat, ada bergerak sabagimana marika di sini lagi bergerak teroes. „Nah, kaoe liat, Gak Hengtiang soeda ada di Kimgo bersama-sama Lie Twako,“ kata Wie Siauw-tjit: „dan Touwheng berdiam di Immatjwan bersama Lie Koko, maka kaoe djoega sapantesnja moesti tinggal di sini bersama kita-orang, Anheng.“

„Benerlah, Anheng,“ kata poela laen-laen orang: „soepaja kita-orang bisa berkoempoel djadi satoe dan tida berpisahan lagi.“

Sabelonnja An To-tjwan sempet menjaoei, Siauw-tjit telah berkata lagi:

„Tenghoensan ada perloe sekali dengen satoe thabib jang begitoe pande seperti mkaoe, An-heng, apapoela dalem waktoe jang blakangan ini, akoe sering dapet sakit peroet. Kamaren doeloe poen, kombali ampir sadja akoe mati, kaloe tida kaboeroe katoeloengan.“

„Kaoe mengapatah?“ tanja To-tjwan sambil memandang, dan kira bener Siauw-tjit dihinggapi penjakit heibat.

„Oh, lantarannja poen boekan laen,“ saoet itoe orang gag: „hanja lantaran peroetkoe kamasoekan daging kerbo kaliwat banjak, tertamba dengen arak poeti jang masi baroe, hingga itoe malem akoe sampe menġlisa-menglisa.“

Semoea Hohan djadi tertawa, sedeng To-tjwan poen toeroet bersenjoem.

„Maka itoe,“ kata poela Siauw-tjit: „dari sèkarang, sasoedanja kita-orang bertemoė dan bisa berkoempoel, djanganlah berpisahan lagi.“

Louw Soe-wat jang dari satadi tjoema mendengerken sadja, dan liat Wie Siauw-tjit begitoe memaksa pada kawannja, hingga ia koeatir bener-bener An To-tjwan nanti toeroet, jang maski tida boeat lantas tinggal salamanja, tapi ia koeatir nanti menginep bermalem-malem, saperti di Kimgo.

Lantaran koeatir begitoe, maka ia laloe adjakin sadja ini kawan lantas berangkat kombali, dengen kata: soeda terlaloe lama boeat mampir-mampir.

„Kita-orang tida boleh terlaloe lambat di djalan,“ kata Louw Soe-wat; „hajoelah berangkat kombali, sebab kaloe sateroesnja maen menginep-nginep sadja, sampe kapan kita-orang bisa sampe di Tongking?“

Sabelonnja To-tjwan jang diadjaki bisa menjaoet, Siauw-tjit jang denger begitoe, djadi goesar dan lantas bangoen dari korsinja, ia pegang tangannja Louw Soe-wat, sambil berkata:

„Apa ?! Apa kaoe bilang?!“

Soe-wat djadi katakoetan dan merasaken amat sakit tangannja dipegang oleh itoe orang gaga.

„Kaoe koerang adjar, ja!“ kata poela Siauw-tjhit dengen mata mendelik: „kaoe taoe tempat apa di sini, begitoe brani maoe adjak Anheng terboeroe-boeroe! — Hm, hem, kaloe kaoe maoe djalan doeloean, baek, nanti akoe anterken kaoe djalan doeloean.“ Sahabisnja kata begitoe, ia angkat kepelannja dan maoe timpaken itoe dimoekanja itoe oetoesan.

Soe-wat mendjerit lantaran kaget dan katakoetan.

„Ampoen! ampoen! Thaunia!“ treak Louw Soe-wat sambil meringis-ringis, kerna ia poen belon kenal pada ini Oahgiamlo.

Berbareng itoe, laen-laen Hohan djoega dateng menjega dan mintaken ampoen.

„Tida! tida boleh dikasi ampoen ini orang jang begini matjem,“ treak itoe orang koeat jang belon ilang moerkanja.

An To-tjwan djoega mintain dengen berlakoe keras dan aseran, kerna Soe-wat tida taoe dan trima salanja.

„Sebab ia poen ada mendjadi djoega oetoesan,“ begitoe To-tjwan moelai memboedjoek itoe soedara: „maka hareplah Hengte pandang pada akoe.“

„Tida perdoeli dia djadi oetoesan,“ treak Siauw-tjhit: djangan kata baroe mendjadi oetoesan, kendati Hongte sendiri, kaloe brani begitoe koerang adjar dan tida taoe adat, tentoe akoe kasi labrakan.“

Loan Teng-giok dan jang laen-laen poen mintain lagi dengen omongan jang lemah lemboet, dengen begitoe, baroelah Siauw-tjhit oeroengken niatnja boeat melabrak oetoesan itoe sampe mampoes.

„Laen kali kaoe moesti inget dan djangan begitoe koerang adjar, mengarti?“ treak ini Oah-giamlo sambil lepasken Louw Soe-wat dari pegangannja, dan doedoek kombali di tempat sendiri, dengen roepa jang masi mara-mara, membikin Louw Soe-wat djadi mengkerat betoel-betoel.

Sahabisnja beromong-omong An To-tjwan disilaken makan minoem. Dalem itoe perdjamoean kaliatan Wie Siauw-tjhit jang paling banjak minoem, kerna teramat girang menden ger itoe kabar jang baroesan.

Esoknja pagi An To-tjwan membri slamat tinggal pada sakalian Hohan, kamoedian toeroen dari goenoeng Tenghoensan dengen teranter oleh sakalian Thaunia, jang sembari djalan ada mamesen, biar bagimana djoega harep ini thabib soeka dateng kombali di sini goenoeng boeat koempoel pada sakalian Hengtenja.

To-tjwan tida bisa berboeat laen dari pada manggoetken sadja kapala dan bilang baek, sebab kaloe kata tida bisa, atawa laen-laen, tentoe djadi menimboelken rasa koerang senangnja Wie Siauw-tjhit jang aseran.

Djaoe djoega, baroelah itoe sakalian Hohan berpisa, Louw Soe-wat menapas legah.

Di djalan An To-tjwan pesen pada itoe kawan, bahoewa apa jang terdjadi di Kimgo dan goenoeng Tenghoensan, harep djangan ditjeritaken lagi pada siapa-siapa. Djoega ia meminta dengen sanget, soepaja perboeatannja Wie Siauw-tjhit biar diloepaken sadja.

Soe-wat tjoema memanggoet, tapi hatinja orang tida taoe bagimana.

Tida brapa hari kamoedian ini doea oetoesan telah sampe di kota Radja. Tapi sebab itoe waktoe soeda siang dan baginda telah moendoer dari singgasana, maka An To-tjwan pergi mengadep sadja doeloe pada Tjoa Thaysoe, dengen toetoerken perdjalanannja pergi ka Kole, dimana itoe radja soeda dibikin semboeh dari penjakitnja.

Kamoedian ia tjeritaken perdjalanan balik, jang sasampenja di laoetan daerah Siamlo telah dateng angin riboet, hingga kapalnja kaleboe dan baek marika berdoea Louw Soe-wat tida binasa.

Tapi sabagian dari barang-barang jang Radja Kole kirim boeat Sri Baginda, telah abis disapoe aer, hingga tigapoeloe djiwa lebi dari matroes-matroes dan moeridnja jang ketjil, telah binasa dalem laoet.

„Ja, di itoe laoetan memang sering terdjadi bahaja angin riboet dengen koenjoeng-koenjoeng,“ kata Tjoa Keng, jang anggep perkara katjilakahan kapal ada bahaja jang loemrah sadja: „tapi beroentoeng djoega kaoe tida kenapa-napa.“

Kamoedian ini mantri besar kasi taoe, bahoewa ia lagi sedeng harep-harep datengnja ini thabib besar jang pande, kerna sadari brapa minggoe jang laloe sala satoe goendiknja jang paling ditjinta, ada dapet saroepa penjakit heibat, dan minta To-tjwan lekas preksa dan briken obat.

„Akoe harep kaoe nanti rawati sampe ia mendjadi semboeh,“ kata poela Tjoa Keng sembari panggil satoe boedak boeat anterken An To-tjwan ka kamarnja itoe goendik.

To-tjwan lakoeken itoe prenta, begitoelah bersama-sama itoe pengikoet ia pergia ka roema goendiknja Tjoa Taysoe. Satelah sampe, ia liat bahoewa roema itoe ada teratoer begitoe rapi dan netjis. Perabotannja semoa ada barang-barang jang berharga mahal, dan banjak boedak-boedak ada menoenggoe di sitoe boeat trima prenta.

Sedeng kamar tempat di mana goendik itoe berdiam, djoega dipadjang begitoe roepa. Tegesnja semoa perabot ada barang-barang jang tida moera, hingga ia doega, boeat rawati ini satoe gedong, boekan menelan sedikit ongkos.

„Hm, inilah ampir seperti astana ketjil,“ kata To-tjwan dalem hati, sasoeda liat keadahanja itoe gedong dan kamar: „kaloe boeat tempatnja goendik ada diatoer begini roepa, bagimana lagi tempat kadiamannja ia poenja istri kawin? ― Oh, liatlah semoea ongkos-ongkos besar jang dikaloearken satiap hari dan satiap boelan, jang meloeloe boeat djadi kasenangannja mantri-mantri, tapi ada mendjadi kasoesahannja rahajat negeri. Anak negri jang moesti bekerdja banting toelang dan mandi kringet aken membajar padjek goena ini semoea.“

Tida lama kamoedian ia telah sampe di itoe kamar dan laloe preksa dengen soenggoe-soenggoe penjakitnja itoe goendik jang sakit, dimana ia dapet kenjatahan, bahoewa sakit itoe ada dari lantaran hawa panas dan angin djahat jang mengeram dalem badan. Tertamba dengen kedjengkelan hati, itoelah sebabnja jang membikin penjakit djadi mengaloearken batoek-batoek.

Kamoedian ia toelisken satoe soerat obat, jang sasoeatoe toelisannja ada njata sekali dan gampang dibatja.

Sasoedanja itoe ia balik kombali pada Tjoa Thaysoe, jang lantas menanjaken, bagimana sakitnja ia poenja nona.

An To-tjwan djawab itoe dengen terang dan kasi taoe satoe persatoe dari apa jang ia telah preksa, dan kata: soepaja penjakit itoe bisa lekas semboeh, melingken hatinja orang jang sakit itoe moesti disenang-senangken.

„Kadjengkelan menambaken beratnja penjakit,“ kata itoe thabib jang toetoep bitjaranja: „tapi kasenangan membikin penjakit djadi lekas semboeh“

Tjoa Keng memanggoet, sedeng To-tjwan poelang ka tempat sendiri, sebab ia poen itoe waktoe memang belon poelang ka roema.

Ini mantri besar laloe masoek ka dalem roema dan katemoeken pada Louw Soe-wat, boeat prenta ini orang sadja aken mengambil itoe obat di kamar Thay-ie-wan, dan bikini sabagimana moestinja.

Soe-wat trima itoe recept sambil memanggoet, kamoedian pergi di kamar obat, sedeng hatinja ada timboel niatan djahat, sabagimana jang memang soeda lama ia mengharep kadoedoekannja itoe thabib besar di kamar Tay-ie-wan.

„Kaloe akoe tida maoe goenaken ini tempo jang bagoes, sampe kapan lagi,“ kata Louw Soe-wat sendiri-diri: „djoega kaloe An To-tjwan masi ada di sini, akoe poenja kadoedoekan salama-lamanja nanti tinggal di bawah sadja. Sekarang ada ini waktoe jang baek, kaloe akoe tida maoe goenaken soenggoe bodo sekali.“

Sahabisnja berpikir ia laloe ambil bebrapa roepa obat jang ada terseboet dalem itoe recept, tapi tidak ditimbang lagi. Kamoedian ambil saroepa barang jang mengandoeng ratjoen dan taro itoe sabagi tjampoerannja, jang sabenernja di dalem recept tida ada tertoelis sama sekali.

„Akoe perdoeli apa kaloe orang jang sakit mampoes,“ kata ia sendiri-diri sembari boengkoes itoe obat: „kerna kaloe tida begini, tjara bagimanakah An To-tjwan bisa dapet hoekoeman?“

Dengen bawa itoe boengkoesan obat Louw Soe-wat kaloewar kombali dan panggil satoe boedak ketjil jang memang ada mengikoet boeat ambil itoe obat. Pada ini boedak Soe-wat pesen tjara bagimana haroes dimasak dan diminoemnja, jang kaloe bisa, lebi baek diminoem salagi masi panas-panas, soepaja bisa kaloear kringet. Dan abis minoem moesti lantas tidoer.

Itoe boedak memanggoet dan lantas berlaloe.

Sedang sedikit waktoe sasoeda obat itoe mateng, djoeroe palajannja Naynay laloe bawa obat itoe ka dalem kamar dan soegoeken pada orang jang sakit, dan sekali-kali tida tjoeriga jang obat itoe tertjampoer ratjoen.

Naynay lantas minoem dan kamoedian rebahken diri di atas randjang.

Tapi itoe ratjoen jang diambil dari akar-akaran ada berdjalan dengen pelahan, maka tidalah begitoe makan, begitoe lantas merasa.