Pembalesannja Kawanan Liangsan/Bagian katiga/Bab 5
V
Boeat tetepken perdamian, diambil djalan merangkepi perdjodoan, dengen begitoe, doea negri terbit karoekoenan
Sasoedanja barang-barang makanan diangkat, permisoeri dapet satoe pikiran,dmakad dengen girang ia memandang pada radja jang lagi menarik napas, sambil senderken badan di atas koersi.
„Baginda troesa djadi koeatir,” kata Sianw Hoei sambil tersenjoem: „boeat moendoerken pasoekan Tay Song, ada satoe daja jang amat sampoerna.”
Ma Say-tjin emenoeleh ka samping dengen ogah-ogahan, roepanja seperti orang jang tida maoe pertjaja.
Daja apatah permisoerikoe telah dapet pikir?" tanja Radja Siamlo sambil memandang pada Siauw Hoei
„Boekantah Baginda sakean waktoe ada kenangken satoe mantoe jang berasal dari Tiongkok?” begitoe pemisoer balik menanja: „dimana Baginda sada harep soepaja kita poenja poetri bisa menikah pada orang bangsa kita djoega?"
„Ja, itoelah ada satoe kenang-kenangan jang soeda lama," saoet Radja dengen hati masgoel.
„Tapi apatah hal Hoema jang Hiantje maoe bitjaraken ?"
„Bener. toeankoe, itoelah jang hamba maoe omongin.
„Kaloe begitoe, baeklah ini oeroesan dibitjaraken sadja laen hari, se bab sekarang tida ada tempo boet omongin itoe. Kerna pertama kita-orang haroes berdaja boeat moendoerin moesoe Atawa, kaloe tida dapetken daja jang sampoerna, tida ada laen djalan dari seraken negri aken ber taloek."
Sahabisnja kata begitoe, radja lantas mengelah napas. Roepanja Ma Say-tjin tida dapet taoe kamana permisoerinja maoe mengomong. Tapi Siauw Hoei jang soeda menjaksiken apa jang telah diliat baroesan, tida perdoeliken baginda poenja. koerang senang, hanja berkata poela:
„Djoestroe apa jang hamba maoe omongken ini, ada membawa doea kabaekan pada toeankoe! Pertama ada boeat goenanja negri dan kadoea ada boeat kabaekannja kita poenja poetri.
Ma Say-tjin berpaling kombali.
„Apa baginda ada liat itoe panglima moeda, waktoe tadi siang kita naek ka atas kota?" menanja Siauw Hoei. „Ja, kami liat," saoet baginda: „itoe panglima ada gaga perkasa dan pande sekali dalem hal memana."
„Bagimana baginda pikir tentang ia poenja sikap dan keadahan?"
„Oh, saorang moeda jang gaga perkasa. Song Tiauw soenggoe beroentoeng ada mempoenjai panglima jang begitoe roepa."
„Kaloe seande ia mendjadi kita poenja Hoema?"
Radja djadi terkedjoet dan kombali mengawasi pada Siauw Hoei, sekarang ia mengarti jang ini permisoeri maoe bitjaraken halnja itoe panglima moeda, boeat diperdjodoken pada poetrinja.
Kerma Ma Say-tjin memang soeda lama ada mengharep bisa dapet satoe Hoema jang berasal dari tana aer sendiri, orang jang tjakep, moeda dan gaga perkasa, maka waktoe denger ini perkatahan jang paling blakang, pikirannja poen djadi terboeka.
Bermoelah, sekali-kali ia tida inget atawa tida pikir sampe ka sitoe. Tapi perkatahannja ia poenja istri, membikin ia djadi inget dan mengarti semoea.
„Oh, tentoe baek sekali kaloe ia bisa djadi kita poenja Hoema," kata radja seperti orang, jang ada dapet harepan baek: „tapi bagimana, sebab dia toch ada satoe panglima dari kita poenja moesoe ?" „Oh, baginda djangan kata begitoe," kata Siauw Hei jang dinega toeroet terboeka hati, waktoe liat radja ada timboel harepan: „apatah koerang moesoe jang menikah pada moesoe, dan achirnja membawa kabaekan bagi kadoea fihak?.
„Ja, memang ada ― Oh, kaloe kita poenja harepan ini bisa terkaboel, soenggoe beroentoeng amat. Pertama oeroesan panerangan tentoe bisa didam ken dengen lekas, kadoea kita poe ja poetri dapet djodo jang bertimpal betoel."
„Lantaran itoe djoega, maka hamba maoe bitjaraken pada toeankoe. Dan lagi, menoeroet pengliatankoe, itoe Siauwijiang boekan sembarang orang, kerna baek ia poenja sikap, baek ia poenja potongan atawa aer moekanja, njata ia ada toeroenan sate panglima jang termasoehoer. Maka boeat dapet taoe ini, soepaja apa jang kita maksoedken tida djadi kapıran, baek di hari esok baginda prenta satoe oetoesan boeat bitjaraken ini perkara."
„Oh, ituelah tida gampang. Tida gampang!"
„Kenapa begitoe?"
„Kaloe kita kirim oetoesan boeat bitjaraken itoe perkara, pastilah Gwanswenja Tay Song boleh djadi tjoeriga, kerna ia kira, kita hendak goenaken tipoe aken pikat spadanja. Liat sadja pengatoerannja begitue rapi dan sampoerna, masatah begitoe gampang ia maoe trima kita poenja permintahan. Mendenger perkatahannja radja, Siauw Hoei djadi berdiam. kerna pikir betoel djoega. Tapi achirnja ia rasa, maski bagimana poen haroes ditjoba, sebab kaloe tida dibikin pertjobahan, manatah bisa kataoean jang itoe maksoed bisa berhasil atawa tida.
Ini pikiran, sigra djoega ia bertaoeken, dimana achirnja radja menjataken moefakat.
„Tapi, kendati begitoe, toch lebi doeloe kita haroes tanja djoega pikirannja Ongdji," kata Ma Say-tjin jang sasoedanja berdiam sakoetika lama: „apa hatinja ada satoedjoe atawa tida; dalem ini hal pastilah ia bisa membri penjaoetan jang tentoe, kerna itoe Siauwtjiang poen ia telah menjaksiken sendiri."
„Itoelah tida lebi dari pantes," saoet njonja radja dengen hati senang, dan kamoedian prenta satoe dajang panggil Kiongtjoe.
Tatkala itoe Giok-tji Kiongtjoe memang ada di samping kraton dan dengeri apa jang lagi dibitjaraken oleh orang toeanja. Begitoe iboenda soeri masoek ka dalem kratonnja Radja Siamlo, Giok-tji laloe koentiti dari blakang, dengen hati bingoeng-bingoeng.
Ini perasahan telah timboel dalem hatinja, ada begitoe mendadak, jaitoe sapoelangnja mengintip moesoe dan dapet liat parasnja itoe Siauwtjiang jang tjakep, latinja djadi berdebar-debar, kadang-kadang moekanja djadi mera, kaloe menginget itoe panglima moeda.
Parasahan itoe boekan laen dari pada permoelahannja tjinta. Tapi apatah itoe bisa djadi, begitoelah beroelang-oelang ia menanja pada hati sendiri, laloe mengiget jang panglima itoe ada mendjadi moesoe dari negrinja.
Pikirannja Giok-tji tatkala itoe ada koesoet betoel. Ia kapingin njataken apa-apa, tapi tida brani. Lantaran itoe djoega, maka waktoe Siauw Hoei masoek ka dalem kraton, ia mengikoeti dari blakang dan pasang koeping di samping djendela.
Alangkah girangnja ia poenja hati, satelah dapet denger apa jang dibitjaraken oleh itoe ajah boenda. Maka satelah denger hendak dipanggil, ia lantas boeroe-boeroe balik ka tempat sendiri aken menoenggoe datengnja itoe dajang.
Tida lama kamoedian Kiongtjoe ini telah sampe di hadepannja Radja Siamto, dengen poera-poera tida taoe ia laloe membri hormat dan tanja pada radja, apa jang maoe diprenta.
„Kami panggil kaoe boekannja maoe diprenta, Ongdji,“ kata baginda dengen soeara aloes: „hanja ada satoe perdamian jang hendak dibitjaraken.“
„Satoe perdamian? Perdamian dengen moesoe??“ kata Giok-tji jang belaga tida bisa artiken omongannja sang ajah. „Ja, kami maoe tauja kaoe poenja pikiran dalem oeroesan jang berhoeboeng dengen dirimoe, Ongdji.“
„Katakenlah pikiran apatah adanja itoe.“
„Sabetoelnja, saba. . .i satoe ajahanda, memang kami ada berkoeasa di atas dirimoe. Tapi sabagimana kaoe taoe, Ongdji, bahoewa kami sajang kaoe ada sabagi moestika. Maka maski poen ada berkoeasa, tapi kaloe perkara jang tida menjenangken hatimoe, kami tentoe tida tega aken berboeat.“
G ok-tji Kiongtjoe tinggal berdiam. Sebab perkara jang bakal dibitjaraken ia soeda taoe, maka moekanja ini poeti djadi berwarna mera.
Ma Say-tjin laloe kasi taoe atas maksoednja, bagimana baroesan ia telah damiken itoe pada Siauw Hoei. Lebi djaoe radja kata: dalem ini perkara, kaloe bisa kadjadian, ada membawa tiga roepa kabaekan Pertama adalah hoeat berdamian negri; kadoea: ada boeat kabroentoengannja sang anak; katiga: dapetlah maksoednja baginda jang sakean lama ada dikenang-kenangken.
Sakoetika lama Kiongtjoe tida menjaoet, hanja tjoema bilang, perkara menikah ada bergantoeng pada ajah-boenda poenja oeroesan, sabagi anak, ia tentoe tida brani membanta.
Tapi baginda tida merasa poewas dengen ini penjaoetan, hanja tegesken kombali: betoel dalem ini oeroesan ia ada berkoeasa, tapi kaloe Kiongijoe tida senang dan tida penoedjoe pada itoe orang jang bakal mendjadi Hoema, ia poen tida maoe paksa, hanja biarlah berperang teroes.
Achir-achir dengen roepa maloe Kiongtjoe menjataken penoedje.
Baginda djadi amat girang dan esoknja laloe diprenta orang memri labe pada moesoe, jang Radja Samlo ingin Tay Song kirim satoe oetoesan ka dalem kraton boeat bitjaraken perkara perdamian.
Ini warta ditrima dengen girang oleh soldadoe-soldadoe, jang laloe samboet dengen tamptk soerak rioeh. Satelah pengawal jang denger itoe perkatahan lantas hoeroe-boeroe masoek ka barisannja, membri taoe ini kabar pada Lie Tjhoen.
Samoea panglima jang denger djadi tertjenggang Satoe pada laen maen saling liat-liatin, kerna tida taoe apa maksoednja Radja Siamlo minta fihaknja krim oetoesan.
Bebrapa Hohan jang sasoeda berpikir sakoetika lama, laloe berkata: boleh djadi dalem ini perkara Radja Sianlo hendak goenaken tipoe boeat pantjing marika poenja oetoesan, hingga dikoeatir bisa menerb itken bintjana.
„Lebi baek kita orang toelak sadja permintahannja itoe,“ kata bebrapa orang dengen lakoe getas: sebab kaloe memang ia maoe taloek,„ boekantah ada lebi baek kaloe ia pentang sadja pintoe kota dan kibarken bendera poeti, maoe apatah iaorang minta kita kirim oetoesan?"
„Boleh djadi permintahannja itoe tjoema ada soeatoe tipoe belakah," kata poela jang laen.
Tapi bebrapa orang lagi kata, brangkali betoel Ma Say-tjin hendak berdami, mana boleh taoe.
„Tapi akoe kira tida bisa djadi Radja Siamlo maoe goenaken tipoe," begitoe Gak Ho menjataken ia poenja pikiran: „kerna tjoba sadja Tjiongwie Hengte pikir, boekantah baginda tjoema minta fihak kita kirim oetoesan? Dan taroh ande kata bener itoe oetoesan diboenoe lantaran tipoenja, toch kita poenja angkatan perang tida djadi moendoer? Malah dengen itoe tipoe, kaloe bener-bener ia goenaken tipoe, ia bikin kita djadi lebi goesar dan sengit."
„Apatah Koko djoega tida pikir begitoe?" begitoelah achirnja Gak Ho menanja pada Hoenkangliong.
„Ja, bener," saoet Lie Tjhoen: „akoe poen rasa, tida bisa djadi dalem ini permintahan ada disertaken tipoe jang boesoek."
Mendenger itoe perkatahan, laen-laen Hohan jang tadi menjataken katjoerigahannja, lantas berdiam.
Gak Ho berkata poela:
„Sekarang baeklah prenta orang wartaken, bahoewa permintahannja baginda radja telah diloeloesken, jang sigra djoega dari fihak kita nanti kirim satoe oetoesan boeat denger pembitjara hannja."
„Sabagi oetoesan, biarlah akoe jang pergi," kata poela Gak Ho: „akoe poen kapingin taoe apa djoega jang Radja Siamlo maoe damiken. Sebab, kaloe-kaloe sadja bener ia maoe menaloek?"
„Ah, Hiante tida boleh pergi," menjega Lie Tjhoen: „hanja biarlah laen orang sadja, sebab kaloe bener-bener Radja Siamlo djalanken tipoe boesoek, boekantah soedara boleh djadi binasa. Dan kaloe soedara binasa, membikin akoe djadi ilang satoe tangan kanan."
„Ha ha ha!" tertawa Gak Ho, satelah denger perkatahannja itoe Hoenkangliong: „kaloe kita takoet masoek di gowa matjan, manatah bisa dapet anaknja harimau ? Tentang ini Koko troesa koeatir. Akoe sampe taoe dan nanti meliat gelagat."
Mendenger perkatahannja itoe soedara; Lie Tjhoen tida menjega lebi djaoe. Begitoelah satoe prenta laloe dikaloearken, dimana balatentara jang menggoeroeng dititaken balik kombali ka kapal, sedeng panglima-panglima poen pada moendoer, aken menoenggoe prenta lebi djaoe.
Tida lama Gak Ho kaloear dengen teriring oleh sapoeloe pengikoet, jang satelrh sampe di pinggir wates, Sinsiang Kiong Touw, atas prentanja Radja siamlo, dateng menjamboet. Gak Ho djadi girang satelah liat itoe ferdana mantri sendiri jang samboet padanja, kerna dengen begitoe, kentara jang ini semoea boekannja, tipoe, sabagimana ada didoega oleh Soedara-soedaranja.
Dari itoe tempat. satjara satoe sobai Kiong Touw laloe adiak Gak Ilo berdjalan menoedjoe ka astananja, dimara moesti meliwati pasar-pasar, jang diatoer satjara pasar di Tiongkok.
Roema-roema djoega ada bagoes. Maka sambil berdjalan Gak Ho laloe menjataken ini dan itoe, jang, didjawab oleh Kiong Touw dengen terang
Tida lama kamoedian marika telah sampe di deket pintoe astana. Djaoe-djaoe itoe ferdana mantri prenta pengikoenja pergi bri taoe pada baginda, bahoewa oetoesan Tay Song telah sampe.
Begitoelah waktoe marika toeroen dari koeda, kaliatan Radja Samlo sendiri kaloear menjamboet di blakangnja kaliatan banjak mantri-mantri.
Gak Ho lantas boeroe-boeroe samboet hormatnja itoe, sedeng Ma Say-tjin jang berprangi aloes dan manis boedi bahasanja, laloe berkata:
„Lautaran oeroesan negri, sampe membikin oetoesan besar tjapeken hati."
Gak Ho bales perkatahan itoe dengen soeara mengiboer, dan sasoedanja satoe pada laen membri hormat, radja laloe oendang itoe oetoesan ka dalem astana, dimana soeda disadiaken satoe medja thee dengen djoeroe pelajannja.
Sasoeda djalanken kahormatan, masing-masing laloe berdoedoek menoeroet kahesarannja. Gak Ho doedoek di atas korsi seblanja baginda. djoeroe lajan laloe toewangken thee wangi di sasoeatoe tjangkir mas jang ada di ladepannja sakalian pembesar.
„Sadari kami doedoekin ini sapotong poelo ketjil jang soenji," demikianlah kata baginda dengen soeara aloes dan merenda: „kami belon merasa bikin kasalahan apa-apa pada Tay Song, sasoenggoenja kami tida taoe, kami ada melanggar atoeran apa, maka pamerenta agoeng dari negri besar soeda kirim pasoekan boeat membri adjaran pada kami?"
„Oh, itoelah boekan laen," kata Gak Ho dengen soeara lantjar: „hanja sabagimana jang baginda taoe, balioewa tana-tana di saloeroeh doenia ini, boekan haroes berada di tangannja satoe radja sadja. Dan lantaran itoe djoega, maka Tay Song soeda taloeki antero negri jang berdeketan pada Tiongkok, soepaja masoek mendjadi satoe binoewa."
„Baginda Keizer jang sekarang ada bertachta, ada berhati moelia dan adil," begitoe Gak Ho teroesken bitjaranja: „maka djoega pada negri jang soeda ditaloeki, ada dibri banjak kalonggaran dan dikasi permisi boeat tida oesah saban taon dateng sendiri ka Tiongkok boeat menjataken satia baktinja. Tapi djoestroe lantaran itoe kalonggaran, maka banjak radja-radja djadi loepa pada kawadjibannja aken kirim oe- toesan membajar oepeti, hingga Baginda Keizer terpaksa kirim sapoeloe laksa balatentara dengen beratoes panglima jang gaga perkasa, di bawah pimpinannja 1 jengtang Taygwanswe, djalan koeliling boeat peringetken pada radja-radja jang loepaken marika poenja kawadjiban.
Radja Siamlo djadi bengong, kerna ia rasa, ia belon pernah berboeat itoe kasalahan. Tapi sabelonnja berkata apa-apa, Gak Ho soeda ber- kata lebi djaoe:
„Pasoekan kita di perdjalanan soeda dapet kabar tentang kaboeroekannja Swa Liong poenja tjara atoer pamerentahan. Banjak rahajat telah dibikin soesa, ia pentjet orang-orang jang lemah dengen zonder merasa kasian. Kaloe perboeatan jang begitoe diantepin sadja, pastilah oeroesan negri bisa mendjadi kaloet, hingga di doenia ini tida ada lagi keadilan. Maka orang jang kedjem begitoe, moesti di kasi labrakan, sabagimana jang kita poenja pasoekan telah berboeat dan roba pamerentahan di Kimgo boeat djadi kasenangannja rahajat. Tapi baroe sadja kita poenja pasoekan brenti mengaso, dengen zonder tjari taoe lagi apa lantarannja, baginda siapken pasoekan perang jang dipimpin oleh baginda poenja panglima besar. Maka boeat kasi oendjoek jang Tay Song poenja Tjengtang Taygwanswe ada berhati adil, tjoema dibinasaken sadja baginda poenja djendraal Twan Giauw bersama antero pasoekannja, sedeng jang sabagian ketjil dibiarken poelang kombali ka negri Siamlo boeat membri taoe pada baginda apa jang telah terdjadi dengen itoe pasoekan.“
Ini perkatahan-perkatahan jang dioetjapken, membikin baginda dengen sakalian mantri-mantrinja djadi keder. Dan sabelonnja Ma Say-tjin bisa menjaoet, itoe oetoesan telah berkata lagi der gen soeara jang terlebi angker:
„Itoelah sebab-sebabnja, jang membikin kita poenja pasoekan djadi dateng ka mari. Sekarang kota-kotanja negri Siamlo telah terkoeroeng, sabetoelnja sadari bebrapa hari poen soeda bisa dipoekoel petja, tapi Taygwanswe jang pimpin ini pasoekan ada terlaloe moera hati dan tida maoe bikin binasa djiwanja banjak manoesia, maka sabegitoe lama ditinggal sadja sampe baginda djadi sedar. Njatalah kita-orang poenja harepan tida kliroe, kerna sasoenggoenja baginda oisa tersedar dan inginken perdamian. Maka sekarang bilanglah apa jang baginda poenja inginan, kaloe kahendak itoe bisa disatoedjoe, pastilah ini paperangan jang ditoenda, dibrentiken teroes?“
„Apa jang soeda terdjadi, biarlah tida oesah dibitjaraken lebi djaoe“, kata radja dengen soeara pelahan: „dalem ini perkara, sasoenggoenja moesti diakoeh, bahoewa lantaran kami poenja kalembekan hati, maka djadi tebit paperangan. Tapi kaloe pertempoeran ini tida dibrentiken, pastilah bakal membinasaken banjak djiwa manoesia, inilah kami tida ingin. Tapi boeat berdami, tentoe tida bisa dengen tjara begini sadja, sedikitnja pasti kami moesti serahken djoega ini tachta, boekan?“
„Itoelah ada dengen sapantesnja,“ saoet Gak Ho dengen soeara adem, sedeng hatinja merasa girang.
„Tapi, maski boeat serahken ini tactha ada dengen atoeran pantes,“ kata Radja Siamlo dengen hati terharoe: „toch kaloe inget bagimana ini karadjahan ada warisan dari laloeloer, jang bermoela boeat dapetken ini ada begitoe soesa dan pajah, soenggoe kami poenja hati djadi merasa amat piloe. Sekarang, boeat pokohnja ini perdamian, haroes kami kasi taoe maksoedkoe jang sasoenggoenja.“
„Maksoed apatah itoe ?“ menanja Gak Ho.
„Kami poenja permisoeri, jang ada berasal dari anak prampoeannja saorang bangsawan di Tionggoan, tjoema melahirken satoe anak prampoean, jang sekarang telali beroesia anambelas dan bernama Giok-tji. Tentang roepanja itoe anak, tidalah terlaloe djelek, sedeng peladjaran, maski tida banjak, toch kawadjibannja prampoean ia mengarti baek.“
„Dan ?, apatah artinja baginda toetoerken ini ?“
„Denger doeloe kami poenja penoetoeran. — Menginget jang diri sendiri ada berasal dari Tiongkok, sedeng permisoerikoe poen ada berasal kalahiran Tionggoan, maka sakean lama kami ingin sekali dapetken satoe. Hoema jang berasal dari tana aer sendiri. Sabegitoe lama itoe pengharepan tida terkaboel, maka baroelah kamaren ini, waktoe denger warta tentara Tay Song mengoeroeng kota, kami soeda naek tembok kota memandang ka fihak moesoe, dimana kami telah liat djoega satoe panglima moeda jang bergegaman Hongtian Hwakek, dengen pinggangnja terselit boesoer, satoe panglima gaga dan tjakep, hingga kagagahannja itoe menarik sekali hatikoe.“
„Oh, panglima itoe tentoelah Hwa Hong-tjoen. Benerlah ia itoe ada satoe anak moeda jang gaga perkasa.“
„Apa itoe Tjiangkoen soeda mempoenjai istri “
„Hong-tjoen belon beristri.“ „Oh, itoelah kabetoelan amat. Boeat goenanja ini perdamian, kami ingin sekali ambil itoe Hwa Tjiangkoen mendjadi Hoema. Belon taoe, apatah kami poenja permoehoenan ini nanti ditrima oleh Taygwanswe?“
Mendenger ini perkatahan, Gak Ho djadi girang djoega, tapi ia kata: kaloe begitoe baek naginda kirim oetoesan mengadep pada Tjengtang Taygwanswe boeat bitjaraken itoe perkara, sebab sabagi oetoesan jang tjoema ada berkoeasa boeat bitjaraken oeroesan perang. ia tida brani poetoesken ini perkara djodo.
Baginda manggoetken kapalanja dan berkata, dengen senang hati dari sini nanti dikirim satoe oetoesan. Tapi kendati begitoe, dalem ini oeroesan ada diminta djoega Gak Ho poenja pertoeloengan boeat bantoe bitjara, soepaja Tay Song poenja djendraal soeka trima permoehoenanja.
Gak Ho berdjangdji saboleh-boleh nanti bantoe omongken, soepaja maksoednja baginda djadi terkaboel Djawaban ini membikin Radja Siamlo djadi girang dan lantas sadiaken banjak barang-barang permata moelia boeat dihadiaken pada Gak Ho, tapi ini orang gaga dengen manis soeda tampik itoe pembrian.
Selang sedikit waktoe, dari fihaknja Radja Siamlo dikirim Sinsiang Kiongtouw sabagi oetoesan, jang berangkat bersama-sama Gak Ho balik ka pasoekan Tay Song. Waktoe sampe, Gak Ho masoek lebi doeloe dan itoe oetoesan dititahken menoenggoe di loear.
Waktoe Gak Ho bertemoe pada Lie Tjhoen, ia laloe toetoerken satoe persatoe apa jang telah dibitjaraken pada Radja Siamlo, jang achirnja ingin ambil Hwa Kongtjoe boeat mendjadi Hoema, kaloe permintahannja ini ditoeroet, dengen senang hati itoe radja soeka menaloek.
Mendenger ini perkatahan, Hoenkangliong laloe berdami lebi djaoe pada laen-laen panglimanja. Lie Tjhoen kata, boeat poekoel negri Siamlo, maski soeda berbajang bisa ditaloeki, tapi kaloe lebi doeloe moesti berperang, sedikitnja djadi membinasaken djiwanja banjak soldadoe. Dau menginget kadoedoekan sendiri jang masi lemah, maka permintahannja Radja Siamlo, ia rasa baek sekali ditrima.
Seande itoe permintahan dito elak dan M Saytjin djadi oeroengken niatannja boeat bertaloek, tentoe moesti dilakoeken satoe pertempoeran besar. Baek kaloe dengen gampang balatantaranja bisa masoek ka dalem kota, kaloe tida, boekantah djadi berabe. Laen dari begitoe, kaloe poelo-poelo sakiternja dateng membantoe, keadahannja poen djadi soesa.
Sasoedanja menimbang-nimbang doedoeknja perkara, Hoenkangliong kata: boeat itoe permoehoenan memang baek sekali kaloe ditrima tjoema belon taoe bagimana pikirannja Hwa Kong-tjoe.
Hong-tjoen jang ditanja laloe berkata: dalem ini perkara ia serahken sadja pada sakalian itoe Pepeh dan Sioksiok, jang sadari bermoela telah menoeloeng padanja. Kaloe dalem ini perkara, dirinja bisa berboeat kabaekan, djangan poela bakal dinikahken pada satoe poetri, sedeng maski disoeroe terdjoen ka dalem laoetan api djoega, masatah ia menampik.
Mendenger djawabannja itoe orang moeda jang menjataken priboedi besar, Lie Tjhoen djadi terharoe dan kata:
„Dalem ini perkara, boekanlah hendak digoenaken Siauwtit poenja diri boeat kaoentoengannja kita-orang, hanja, dalem sagala perkara poen, ada di-imbangken dengen Siauwtit poenja pengidoepan djoega. Dan kaloe hal ini telah ditanja djoega kaoe poenja diri, itoelah tjoema maoe taoe, apa Siauwtit satoedjoe atawa tida. Dan seande Siauwtit sendiri soeda satoedjoe, boeat oeroesan nikah toch moesti didamiken lagi pada Lingtong.“
„Hal ini, sasoenggoenja Siauwtit serahken sadja pada Pepeh dan sakalian Sioksiok,“ kata Hwa-Hong-tjoen: „jang tentoe ada lebi bisa atoer dari pada Siauwtit sendiri, jang masi tertaloe moeda dan belon bisa pikir djaoe.“
Sasoedanja bitjara lagi pada laen-laen Hohan, baroelah Hoenkangliong prenta pengawal pintoe panggil mengadep itoe oetoesan radja Siamlo.
Kiong Touw laloe masoek ka dalem dengen tida brani angkat kapala, tapi kendati begitoe, toch ia bisa liat, bagimana Tay Song poenja barisan ada teratoer beres. Ia berdjalan teroes ka dalem, sasampenja di depannja Lie Tjhoen, ia liat di sitoe ada berbaris banjak panglima-panglima jang gaga, hingga atoerannja keren sekali.
Sigra djoega itoe oetoesan membri hormat, jang lantas disamboet oleh Lie Tjhoen dan pahlawannja. Kamoedian Kiong Touw itap disilaken doedoek.
Sasoedanja soeroe pelajan bawaken thee wangi kahadepannja masing-masing, baroelah Lie Tjhoen berkata:
„Baroesan Gak Tjiangkoen soeda toetoerken tentang pertemoeannja pada Radja Siamlo, dimana ada dinjataken, jang baginda hendak ambil Hwa Tjiangkoen mendjadi Hoema aken dikawinin pada Giok-tji Kiongtjoe.“
Kiong Touw memanggoet, menjataken benernja itoe omongan, Sedeng Lie Tjhoen berkata poela:
„Permintahannja Sinsiang poenja radja, kita-orang soeda bitjaraken dan ditimbang, baek sekali boeat ditrima. Lantaran begitoe, maka teteplah kita-orang poenja perdamian. Maka begitoe lekas ini pasoekan perang kita nanti moendoerken.
„Trima kasi atas Gwanswe poenja kamoerahan hati,“ saoet Kiong Touw dengen hati girang, satelah denger jang permoehoenan radjanja telah ditrima baek.
„Sasoedanja ini pasoekan moendoer,“ kata poela Hoenkangliong: „dari Kimgo kita nant kirim barang-barang boeat pesalin dan oeroesan oepatjara pernikahannja Kiongtjoe dengen Hwa Tjiangkoen. Harep Sinsiang toeloeng sampeken pada baginda, bahoewa ini perdjandjian soeda djadi tetep dan djanganlah dalem ini perdjangdjian, ada digoenaken tipoedaja, jang sakedar bermaksoed soepaja kita oendoerken sadja ini pasoekan. Dan kaloe sampe terdjadi begitoe, pastilah kaloe ini pasoekan dateng kombali, kita tida maoe trima lagi sagala perdjandjian dan sagala apa jang ada dalem ini negri, tentoe mendjadi aboe.“
„Hamba brani tanggoeng, jang maksoednja baginda Siamlo, ada dengen satoeloesnja hati,“ kata Kiong Touw sambil toendoeki kapala: „masatah hamba poenja radja ada poenja hati jang begitoe roepa, dalem ini perkara harep Gwanswe troesa boeat selempang. Maka boeat Gwanswe poenja keadilan dan kamoerahan hati, jang telah trima permoehoenannja, haroes dihatoerken banjak trima kasi dan boedi itoe tida aken diloepa.“ Begitoelah sasoedanja bitjara-bitjara, itoe oetoesan laloe pamitan poelang, sedeng Hoenkang liong, itoe hari djoega moelai tarik sakalian angkatan perangnja balik ka Kimgo.
Dalem perdjalanannja itoe kapal-kapal perang di perdjalanan dari S amlokok balik ka Kimgo, troesa ditjeritaken, hanja dengen ringkes ditoetoerken jang Hoenkangliong soeda sampe di astananja.
Poelangnja ini ada disamboet oleh sakalian orang, dan sigra djoega Lie Tjhoen minta orang wartaken pada Hwa Kiongdjin, soepaja itoe njonja dateng kaloear boeat bitjara.
Hwa Kiongdjin jang belon taoe ada oeroesan apa, djadi tergoepoe-goepoe dan lantas kaloear. Sasoedanja berdoedoek, Lie Tjhoen dan Gak Ho laloe tjeritaken tentang paperangan jang dimaloemken di negri Siamlo, bagimana kamoedian itoe radja minta Hwa Kongtjoe mendjadi Hoema.
Satoe persatoe ditjeritaken dengen terang, hingga Kiongdjin jang denger itoe warta djadi amat girang, maka ia kata: dalem ini perkara menikahnja Hong-tjoen, biarlah ini Pehoe dan sekalian Sioksiok atoer sadja bagimana baeknja
„Tentoe sadja ini kabar beroentoeng, boekan sadja mengirangken bagi jang idoep,“ kata Hwa Kiongdjin: „hanja Ti-tje jang berada di tempat bakah poen, pasti nanti djadi girang hati dan bersoekoer pada Tjiongwie sakalian.“
„Kaloe Soso soeda moefakat,“ kata Lie Tjhoen: „sigra djoega nanti dikirim pesalin dan laen-laen barang ka negri Siamlo, soepaja Siauwtit Hong-tjoen poenja pernikahan bisa lantas selesih. Kerna dengen tergaboengnja perdjodoan antara Hong-tjoen dan poetrinja Siamlo, Kimgo poenja perhoeboengan pada itoe negri, djadi tetep.“
Sasoedanja bitjara-bitjara lagi sedikit, Hwa Kiongdjin laloe masoek ka dalem dan kasi taoe ini perkara pada Tjin Kiongdjin, jang samboet kabar ini dengen sagala kagirangan hati.
„Ah, beroentoeng, beroentoenglah,“ kata bitoe njonja bangsawan dengen hati girang: „liatlah, siapa doega, jang djodonja itoe anak ada di negri Siamlo?"“
Baroe sadja Hwa Kiongdjin dan Tjin Kiongdjin abis berkata-kata dengen girang, Hwa Kongtjoe jang baroe sampe dari kapal perang, laloe katemoeken pada itoe iboenda dan kasi taoe apa jang itoe orang toea soeda taoe.
Hal ini tida perloe ditjeritaken pandjang.
Sigra djoega Hoenkangliong prenta orang tjari hari jang baek boeat anterken Hwa Hong-tjoen pergi ka itoe negri, dengen sadiaken djoega banjak barang-barang permata, sortra-soetra dan sabaginja kaperloean boeat menika.
Hari jang ditetepken itoe sigra sampe, maka pada itoe pagi di moeara Kimgo, ada kaliątan satoe kapal besar jang ada bawa banjak penoempang, menoedjoe ka negri Siamlo. Ini kali berangkatnja kapal boekan lagi membawa alat sendjata dengen keren-kerenan, hanja membawa barang-barang pesalin boeat kamanten, dengen penoempang-penoempang jang kaliatan girang.
Kapal jang moeat Hwa Kongtjoe, dimana Lie Hoen Berdoea Ko Tjeng, jang kapalaken, berdjalan di sebla depan. Sedeng di blakangnja ada laen kapal jang moeat limaratoes balatentara pelindoeng.
Sebab kadatengan ini lebi doeloe soeda diwartaken, maka dari kamaren-kamarennja di palaboean Siamlo soeda ada banjak orang, antara mana adalah Kiong Touw jang dititahken menjamboet datengnja kemanten. Satelah meliat kapal itoe dateng, Kiong Touw laloe prenta orangnja, pasang meriam toedjoe kali, dan kapal lantas mendarat.
Hwa Kongtjoe ada dianter oleh Gak Ho dan laen-laen panglima, Kiong Touw bersama bebrapa amtenaar Siamlo ada menjamboet dengen lakoe hormat, dari pelaboean marika toenggang koeda menoedjoe ka astananja baginda radja.
Di sapandjang djalan dan kota-kota, pendoedoek jang telah denger ini kabar, pada kaloear nonton. Rahajat negri Siamlo merasa kagoem betoel dengen itoe oepatjara pernikahan tjara Tionghoa, teroetama sikapnja penganten lelaki jang tjakep dan gaga, rata-rata pada memoedji.
Perarakan itoe ada pandjang. Tida lama telah sampe di astana dan radja jang memang telah bersadia, laloe kaloear menjamboet dengen segala girang hati.
Astana Tangkiong ada disadiaken boeat djadi tempatnja kemanten lelaki.
Tetaboean ada terdengar rioeh sekali. Di roewangan kraton ada rame dengen ambtenaar besar dan ketjil jang dateng dengen barang-barang anteran.
Masing-masing membri slamat pada radjanja, jang mendapet Hoema berpasangan pada Kiongtjoe.
Kamoedian kadoea penganten djalanken-djalanken oepatjara perkawinan di depan kraton. Sasoedanja bersodja pada Toean Allah, baroe sembajang di aboenja laloehoer dan blakangan baroe pada radja berdoea permisoeri dan laen-laen familie jang pernah toea.
Oepatjara pernikahan itoe ada disoempa, bahoewa kadoea laki istri moestii bersatia satoe pada laen.
Sasoedanja dibikin persoempahan di hadepan Allah, kadoea penganten itoe dianter ka kraton Tangkiong boeat toekar pakean. Tetamoe-tetamoe ada doedoek di medja perdjamoean dengen senang hati.
Djoeroe lajan tida brentinja toewangken arak ka masing-masing tjawan, sedeng roepa-roepa tetaboean ada diboenjiken amat merdoe soearanja.
Radja Siamlo bersama Permisoerinja ada kaliatan girang betoel.
Selagi tetamoe bergirang-girang, Hwa Hoema jang masoek di kamar penganten tjoba melirik pada istrinja dan liat parasnja Kiongtjoe begitoe tjantik, hingga hatinja djadi terkedjoet, kerna belon perna liat orang jang begini tjakep.
Giok-tji Kiongtjoe poenja paras memang tjantik dan eilok, tambahan ini hari ada memake pakean penganten jang bergilang-goembilang, maka paras itoe djadi lipat ganda kailokannja, hingga ampir tida beda seperti bidadarie.
Bagimana girangnja Hwa Hoema, itoelah tida oesah dikata lagi, sedeng Kiongtjoe poen tentoe ada sama djoega, kerna ia poen telah liat bagimana sikapnja itoe orang jang bakal mendjadi soeaminja.
Pada itoe malem kadoea penganten ada kaliatan manis betoel, jang satoe ada lebi mentjinta dari jang laen. Sembari minoem marika itoe berkata-kata aken menjataken rasa tjintanja jang besar, dan bagimana rasa beroentoengnja itoe kadoea merpati, inilah ampir tida perloe ditjeritaken lagi.
Satoe malem telah berlaloe. Esok paginja, sahabisnja berpake-pake doea kamanten itoe pergi katemoeken radja bersama permisoeri, aken membri slamat pagi. Ma Saytjin dan Siauw Hoei jang meliat anak mantoe ada begitoe manis dan roekoen, djadi amat girang dan oetjapken bebrapa perkatahan-perkatahan jang menjataken senangnja hati.
Siangnja sasoeda balik ka tempat sendiri. Hoema trima kabar jang Gak Ho dateng mengoendjoengi.
Maka dengen lakoe hormat Hoema Hwa Hongtjoen laloe kaloear menjamboet dan silaken itoe Sioksiok doedoek minoem thee.
Di sitoe Gak Ho laloe kasi taoe, bahoewa sekarang sasoedanja tida ada apa-apa lagi jang aken dioeroes, esok ia hendak balik poela ka Kimgo kerna di sana masi banjak apa-apa jang moesti dikerdjaken.
Kamoedian paman ini mamesen, soepaja Hongtjoen biar roekoen bersama istrinja dan taro indah pada mertoea dan laen-laen amtenaar.
Hoema memanggoet dan hatoerkan trima kasi boeat itoe nasehat.
„Laen dari itoe akoe maoe pesen, kata poela Gak Ho: „bahoewa sasoedanja akoe berangkat, kaoe moesti berhati-hati mendjaga diri. Betoel kaoe soeda mendjadi mantoenja radja dan ditjinta oleh mertoea, tapi siapa taoe kaloe Kiong Touw jang ada bersifat dorna, nanti mengilik-ngilik kaoe poenja mertoea boeat membales sakit hatinja jang doeloe, Maka boeat mendjaga kaslamatanmoe, di sini akoe tinggalken doea panglima dan tiga ratoes serdadoe boeat lindoengken kaoe poenja diri.“
„Apa jang Sioksiok pesen, Siawtit nanti perhatiken betoel,“ kata Hoema: „dan boeat Sioksrok poenja katjintahan jang begitoe besar, sasoenggoenja djoega Siauwtit tida nanti loepaken.“
Sahabisnja beromong-omong Hong-tjoen laloe prenta orangnja sadiaken barang makanan boeat membri slamat djalan pada itoe paman jang gaga perkasa, jang telah menoeloeng banjak atas ia poenja diri dan pengidoepan.
Kamoedian, atas permintahannja Hoema, Giok-tji Kiongtjoe djoega kaloear membri hormat sambil hatoerken slamat djalan.
Esoknja pagi Gak Ho laloe djalanken poela kapalnja menoedjoe ka Kimgo, dan satelah sampe, ia lantas bertaoeken pada Hoenkangliong, Hwa Kiongdjin dan jang laen-laen, bahoewa pernikahan telah selesih dan bagaimana Hwa Hong-tjoen dengen Giok-tji Kiongtjoe ada idoep manis dan roekoen.
Tentu sadja ini kabar mengirangken sanget bagi Lie Tjhoen dan Hwa Hoedjin. maka hal ini sigra djoega dibertaoeken pada Tji Kiongdjin, jang djoega toeroet girang hati.