Pembalesannja Kawanan Liangsan/Bagian katiga/Bab 18
XVIII
Di fihak Tenghoensan sasoeda dapet ka-
menangan, dengen akal mendapet
poela satoe kawan.
Wie Siauw-tjhit jang sasoeda melabrak moesoe di ini tempat, lantas menoedjoe ka tan gsinja Yoe Goan-beng.
Tatkala itoe ini Thongtjhie lagi sedang kabingoengan, maka dengen gampang Siauw-tjhit toeroenken tangan linjapken njawanja di sitoe djoega.
Tapi Yoe Djin ada lebi beroentoeng, kerna waktoe denger soeara riboet-riboet dan taoe jang moesoe lagi menjerang, lantas sadja ia naek ka atas koeda dan lariken binatang itoe sakentjang-kentjangnja, dengen dioebar oleh Soen Liep diri blakang.
Baroe sadja melaloei sedikit djaoe di sebla depan ada kadengeran soeara baledoer, dan berberbareng itoe kaliatan Tjo Loen bersama Bok Tjoen soeda mengandang sambil lintangin golok di tangan.
Yoe Djin tida ada taksiran boeat melawan, hanja lantas sadja kedoet les koedanja boeat ambil laen djalanan. Tapi sabelon bisa lari djaoe, Soen, Liep jang mengedjer dari blakang telah sampe dan tikem moesoe itoe, hingga djato dari atas koeda.
Tatkala itoe di fihaknja Tenghoensan ada dapet kamenangan besar, salaennja sendjata, ramsoem dan koeda, djoega banjak laen-laen barang kaperloean; sabelonnja hari mendjadi pagi, marika telah balik ka atas goenoeng dengen poekoel tetaboehan menang perang.
Sasampenja di goenoeng matahari telah pentjarken tjahajanja. Liauwlo-liauwlo semoea menerima persen dan perdjamoean poen tida loepa diadaken.
Di waktoe makan minoem masing-masing ada kaliatan girang dan beromong-omong tida soedanja. Boekan sadja Houw Seng tapi Tjio Keng poen mendapet poedjian tinggi atas pandenja medjalanken itoe akal.
„Sabetoelnja kita poenja tenaga ada kala djaoe pada fihaknja tentara negri,“ kata Loan Tenggiok: „dan inilah ada ternjata, jang kita soeda terkoeroeng satenga boelan lamanja. Tapi dengen datengnja Tjio Hengte ka mari, membikin Houw Hengte dapet satoe akal bagoes boeat tipoe moesoe.“
„Tjio Hengte memang ada satoe sastrawan jang telah loeloes dalem oedjian,“ kata Soen Liep: „djoega ia ada mengarti dalem pakerdjahan Boen dan Boe, maka tipoe ini gampang dilakoekennja.“ — Tapi dengen ini akal jang kita telah goenaken, boeat Oei Sin Koko ada satoe perkara jang tida enak.
„Boekan sadja_tida enak, malah boleh mendatengken satoe katjilakahan bagi dirinja,“ begi toe Soen Sin samboeng bitjaranja ia poenja soedara: „kaloe pamerenta dapet taoe ini perkara dan kira bener-bener Oei Koko jang berboeat begitoe, pastilah saroema tangganja bisa lantas dibelenggoe dengen tida ada pertanjahan lagi.“
„Ja, ja, itoelah betoel,“ kata jang laen-laen.
Kamoedian, boeat kabaekannja Oei Sin, marika laloe damiken tjara bagimana itoe Thongtjhie di Tjengtjioe bisa ditoeloeng dari bahaja.
Soen Sin menjataken pikirannja, daja satoe- satoenja tjoema panggil Oei Sin ka mari, baroelah bisa toeloeng kaslamatannja. Kaloe lambat sedikit sadja, pastilah Itoe panglima boleh dapet tjilaka.
Semoea orang moefakat dengen ini pikiran. Berbareng itoe Siauw Djian’ membri taoe, bahoewa ia maoe pergi ka Tjengtjioe boeat tjeri taken itoe perkara dan boedjoek aken Oei Sin dateng ka ini goenoeng.
„Kaloe kita berlakoe lambat, boekan sadja Oei Sia Koko poenja keadahan ada berbahaja, hanja. djiwanja saroema tangga belon tentoe bisa di toeloeng,“ kata poela Loan Teng-giok, jang mingkin inget bagimana itoe tipoe jang diatoer oleh Houw Seng, sasoenggoenja ada membahajaken itoe Thongtjhie, maka ia rasa tida boleh orang berlakoe ajal-ajalan aken mengoendang Oei Sin: „sabelonrija tentara dari Tengtjioe dan Laytjioe balik ka tempatnja, baek kita lantas pergi oendang.“
Semoea soedara-soedara, menjataken satoedjoe, maka esoknja Siauw Djian laloe berangkat ka kota Tjengtjioe dengen menjamar sabagi satoe sastrawan pelantjongan, dengen maksoed sabagimana jang di atas pembatja telah taoe.
Sabelonnja ini ahli menjoerat sampe ka itoe kota, baeklah kita liat ka laen fihak, dimana ada perloe djoega boeat ditoetoerken.
Itoe soldadoe-soldadoe jang toeroet menjerang Tenghoensan, sasoeda pembesarnja binasa, sabagian ketjil jaug bisa lolosken diri laloe poelang ka masing-masing tempatnja, dengen tjeritaken tentang itoe kakalahan, bagimana panglimanja dapet kamatian di medan perang dan bagimana Oei Sin dari Tjengtjioe telah membantoe moesoe, dan laen-laen poela omongan jang soldadoe itoe dapet liat di tempat paperangan.
Kerna itoe soldadoe tida taoe, kaloe orang jang dateng itoe ada Oei Sin palsoe, maka dalem tjeritanja marika kata: Oei Sin toelen telah berhianat wae negri. Ini warta ditrima dengen kaget. Maka masing- masing poenja pembesar laloe toelis soerat pada Djoebit dan seboet djoega apa jang itoe soldadoe petjoendang telah tjerita.
Djoebit satelah trima ini kabar, laloe toelis satoe soerat pada Thaysioe di Tjengtjio boeat petjat djabatannja Oei Sin dan lantas tawan.
Itoe Thaysioe ada saorang she Thio, satoe pembesar jang bermoela dipili dari kalangan examen, saorang pintar dan arif bidjaksana; boekan kawanan dorna jang dapetken itoe pangkat dari sogokan atawa pengaroe.
Satelah trima soeratnja Djoebit, Thaysioe djadi terkedjoet. Sigra djoega ia prenta orangnja oendang Oei Sin.
Waktoe Tongtjhie itoe berhadepan padanja, Thay-sioe menjataken ia poenja rasa heran dan kamoedian kasiken soeratnja Djoebit jang manitahken ia tangkep padanja.
„Soenggoe akoe tida mengarti sekali, bagimana boleh ada ini perkara," kata Thaysioe sambil mengawasi pada itoe Thongtjhie. Oei Sin jang sasoedanja membatja itoe, djoega tida koerang rasa kagetnja. Tapi sigra djoega ia berkata: Thaysioe sendiri tentoe taoe, sadari tenara negri menjerang Tenghoensan, lantaran dirinja terserng penjakit, hingga ia tida bisa membantoe Ouw Keng. Sedeng kaloear dari kota ia tida bisa, bagimanatah ditoedoeh ia telah berhianat pada negri dan bantoe brandal di itoe goenoeng.
„Djoestroe lantaran itoe, membikin akoe djadi merasa heran," kata Thio Thaysioe: „tapi, kaloe sekarang ada perkara begini, brangkali ini semoea ada tipoenja itoe brandal jang hendak menjoesaken padamoe."
Kamoedian Thaysioe itoea berdjandji ia hendak toelis soerat ka kota Radja pada Djoebit, boeat membri kapastian jang Oei Sin tida lakoeken itoe perkara jang ditoedoe. Hal ini ia brani membri sagala kapastian apa djoega, kerna ia poen taoe sadari itoe hari sampe sekarang baek Oei Sin maoepoen tentaranja tida ada jang kaloear dari kota Tengtjioe.
Oei Sin mengoetjap trima kasi atas pembesar itoe poenja kabaekan dan kamoerahan hati
Sasampenja di gedong sendiri, hatinja masi tinggal takoet dan bingoeng.
Soenggoe ia tida mengarti bagimana boleh ada perkara begini roepa.
Selang doea hari, salagi doedoek di kamar toelis memikiri itoe perkara, pengawal pintoe dateng membri taoe, bahoewa di loear ada satoe sastrawan jang minta bertemoe.
„Siapa?" tanja Oei Sin dengen kaget. Kerna sadari itoe hari, hatinja jang koerang enak djadi pengagetan sadja. „Siapa jang minta katemoe?“
„Siauw Sioetjay dari kota Radja.“
„Baek, silaken masoek.“
Waktoe si pengawal berlaloe Oei Sin beringet-inget, siapa adanja Siauw Sioetjay. Maski telah dipikir sakean lama, Oei Sin belon djoega dapet inget ada kenal pada Sioetjay.
Jang dateng itoe boekan laen iaitoe Siauw Djian.
Waktoe itoe ahli penjoerat soeda berhadepan padanja, baroelah ia kenalken.
Sigra djoega doea orang ini membri hormat satoe pada laen dan Oei Sin silaken sobatnja itoe doedoek.
„Ah, kiranja kaoe, soedara,“ kata Oei Sin, pada sasoedanja berdoedoek: „dari tadi akoe bingoeng memikiri, siapatah adanja jang diseboet Siauw Sioetjay.― Dan akoe harep kaoe ada banjak baek soedara.“
Siauw Djian oetjapken trima kasi dan Oei Sin laloe menanja kombali, bagimana dengen pakerdjahannja ini sobat lama, di kota Radja, apa ada banjak senang, hingga ada tempo boeat melantjong kamari.
Siauw Djian djawab dengen ringkes, jang lantaran karembet perkaranja satoe sobat, sekarang ia soeda tida mamegang poela itoe kerdjahan, hanja telah djadi orang boeron. Kamoedian balik menanja pada Oei Sin, apa dalem djabatannja ni sobat poen ada senang hati.
Oei Sin mengelah napas
„Ha, doeloe lantaran katarik dengen perkaranja Hwa Ti-tjoe, dan djoega lantaran Song Kong-beng poenja boedjoekan, akoe telah lakoeken banjak kerdjahan," kata Oei Sin sambil gojang-gojang kapala: „dan blakangan, sasoedanja menerima baginda poenja firman dan toeroet maloemken di sana sini, akoe dipakerdjaken di bawah prentanja Thio Thaysioe, saorang berboedi dan arif bidjaksana, hingga merasaken djoega tempo jang anteng. Tapi tida doega lantaran bergeraknja kita- orang poenja soedara-soedara di Tenghoen san, sampe akoe ditoedoe berhianat pada negri."
Lebi djaoe ia tjeritaken bagimana Djoebit soeda kirim soerat pada Thio Thaysioe jang menitah pembesar itoe tangkep padanja. Satoe persatoe ia tjeritaken terang dan kamoedian tanja, bagimana Siauw Djian pikir dalem ini perkara.
„Ini semoea sabenernja ada dari lantaran gelapnja di Tiauwteng poenja atoeran tjara mengatoer negri," kata Siauw Djian: „dan lantaran begitoe, maka sana sini terbit pemberontakan dan kaonaran. Kaoe sendiri tentoe telah taoe, Hengtiang, bagimana besar pahalanja kawanan Liangsan, tapi lantaran pengaroenja dorna, toch achirnja kita poenja soedara-soedara djadi binasa." Oei Sin tida menjaoet, sedeng Siauw Djian teroesken perkatahannja :
„Dari kadjahatan dan boeroeknja kawanan dorna poenja haloean, jang salaloe memandang renda dan djahat pada orang-orang jang doeloe djadi Hohan di Liangsan, maka perkaramoe akoe kira tida bisa didapetken poetoesan jang adil. ― Liat sadja boektinja, belon apa-apa kaoe maoe ditangkep dan dipetjat dari djabatan, dengen zonder diselidiki lagi bener tidanja."
Kamoedian Siauw Djian memboedjoek, jang katanja: ada lebi baek kaloe ini soedara dateng berkoempoel ka Tenghoensan.
Oei Sin menjataken satoedjoe atas ini voorstel, tapi lantaran Thio Thay-sioe ada begitoe, hatinja merasa berat boeat lantas tinggalken. Achirnja ia minta ini sobat soeka bernanti sampe bebrapa hari, boeat liat doeloe bagimana gelagatnja itoe perkara.
Siauw Djian jang memang kenal baek adatnja ini orang gaga, soeda manggoetken sadja kapala dan tida brani memboedjoek lebi djaoe.
„Tadi kaoe bilang, dirimoe ada karembet dengen perkaranja satoe sobat ?" tanja Oei Sin kamoedian: siapa adanja itoe sobat dan dalem perkara apa dirinja ada tersangkoet?"
Siauw Djian lantas toetoerken satoe persatoe tentang itoe perkara jang menimpa pada An To tjwan; satelah mendenger itoe, dengen mengelah napas Oei Sin kata; kaloe begitoe bener-bener ada katerlaloean sekali tjaranja pamerenta poenja kantoor pengadilan.
Kamoedian Oei sin silaken sobatnja itoe doedoek makan dan minoem sambil omong- omong perkara ini dan itoe.
Esok paginja ada dateng satoe panglima jang memake pakean perang dan pinggangnja tergan- toeng satoe pedang. Di blakangnja ada mengikoet kira-kira sapoeloe orang dan bebrapa antaranja mendorong satoe kreta persakitan. Satelah sanipe, dengen tida banjak bitjara ia lantas masoek ka dalem dan prenta itoe soldadoe-soldadoe menawan Oei Sin, jang lantas dimasoeki ka dalem kerangkeng persakitan.
Panglima itoe boekan laen dari Ouw Keng poenja mantoe, saorang she Goe jang diangkat djadi Tokhiam di kota Tjeetjioe. Satelah denger kabar jang mertoeanja telah binasa lantaran berhianatnja Oei Sin, ia djadi moerka dan dengen zonder minta perkenannja pamerenta, ia lantas bawa soldadoe dan dateng ka kota Tjengtjioe, sabagimana di atas telah terdjadi.
Ini penangkepan, sabentaran sadja telah sampe di kantoornja Thio Thay-sioe jang waktoe denger itoe kabar lantas boeroe-boeroe dateng dan kasi taoe apa jang ia sendiri ada taoe. Djoega ia minta Goe Tokhiam soeka bersabar sampe dateng poetoesannja Djoebit, dalem mana ia ada kasi katerangan tentang kabersiannja Oei Sin.
Tapi itoe panglima tida maoe ambil perdoeli, hanja kata: ia soeda denger itoe kabar terang sekali, hingga kadosahannja ini Thongtjhie tida bisa disangkal lagi.
Siauw Djian jang lagi berada di dalem, satelah denger itoe kabar, djadi kaget sekali. Sekarang ia rasa: djiwanja sobatnja tida bisa tertoeloeng lagi, kaloe tida lekas-lekas balik ka Tenghoensan dan bertaoeken ini perkara pada semoea soedara-soedara. Sahabisnja berpikir, boeroe-boeroe ia balik ka Tenghoensan dan djalan sabagi terbang.
Waktoe sampe ia laloe kasi taoe apa jang telah terdjadi, hingga Loan Teng-giok djadi kaget dan dengen goegoep laloe adjak Soen Liep, Wie Siauw-Tjhit dan Houw Seng aken pegat djalannja itoe kreta persakitan jang bakal liwat.
Dengen membawa limaratoes liauwlo ampat orang gaga itoe laloe menoeggoe di djalanan antara Tjengtjioe. Betoel sadja tida antara lama kamoedian, dari djoeroesan kota Tjengtjioe ada kaliatan sarombongan soldadoe jang lagi mengiringken kerangkeng persakitan, dan Wie Siauw- tjhit dengen gaga laloe mamegat djalannja itoe orang-orang sambil lintangin toembak di atas koeda. „Kaloe kaoe taoe atoeran, lekas bajar doeloe oewang tjoeke djalan baroe boleh liwat," treak ia dengen soeara keren.
„He, begal jang terkoetoek!" membentak Goe Tokhiam dengen soeara menghina: „apa kaoe tida kenalin siapa adanja akoe ini? Maka begitoe koerang adjar kaoe brani minta oewang tjoeke djalan !"
Siauw-tjhit bales lagi dengen bebrapa perkatahan sambil menjerang, jang sigra djoega ditangkis oleh itoe Tokhiam dan itoe waktoe kadoea- nja ini laloe serang menjerang dengen sengit
Soen Liep, Houw Seng dan Loan Teng-giok jang ada di samping, tentoe sadja ti da maoe tinggal diam. Marika itoe laloe geraken sendjatanja dan menjerang dari kiri kanan, hingga Goe Tok- hiam djadi kawalahan dan merasa keder.
Kerna koeatir diri boleh djadi tjilaka, panglima itoe lantas petjoet koedanja dan lari dengen tjepet ka djoeroesan kota Tjengtjioe. Itoe soldadoe- soldadoe jang menoenggoeken persakitan poen, satelah liat kapalanja soeda merat, lantas tinggalken itoe kerangkengan dan lari tertjerei-berei.
Siauw-tjhit tida maoe oedak moesoenja, hanja boeroe-boeroe hamperi Oei Sin dan dobrak itoe kerangkeng, sedeng tiga Hoh jang laen boekain borgolannja, sambil berkata:
„Oei Koko ada dapet banjak kaget." Sembari oetjapken itoe perkatahan, satoe pada laen laloe membri hormat dan Oei Sin laloe ha- toerken trima kasi atas Hohan-hohan itoe poenja pertoeloengan. Tapi doea antaranja ia tida kenal siapa adanja.
Soen Liep laloe perkenalken Loan Teng-giok, sambil berkata:
„Ini ada Twako Loan Teng-giok, jang doeloe hari ada djadi familie Tjiok poenja Kauwsoe. Dan ini Hengte Houw Seng, jang ada djadi Kokonja Ittengtjeng Houw Sam-nio."
Oei Sin memanggoet sambi Imembongkokki badan, pada saban-saban Soen Liep seboet namanja itoe orang jang diperkenalken padanja. Lebi djaoe Soen Liep kata di atas goenoeng masi ada lagi bebrapa Hengte jang Oei Sin brangkali belon kenal. Kamoedian dengen lakoe hormat orang-orang gaga itoe oendang Oei Sin naek ka atas Tenghoensan, dengen teriring oleh itoe sakalian liauwlo.
Waktoe sampe di Tjhigiethia, bebrapa orang jang ada menoenggoe di sitoe, laloe kaloear samboet sambil oetjapken perkatahan-perkatahan manis. Kamoedian marika doedoek di itoe roewangan sambil beromong-omong.
Sigra djoega itoe orang-orang gaga laloe kasi taoe apa jang mendjadi lantaran hingga Oei Sin ditoedoe telah berhianat pada Ouw Keng. „Sebab keadahan ada memaksa boeat kita-orang lakoeken ini penjamaran," kata Soen Liep dan sadereknja:,,boekan kata tida taoe, jang lantaran ini Oei Koko boleh djadi tjilaka."
„Boekan sadja pada Houw Hengte jang soeda djalanken itoe tipoe, haroes dipoedji pikirannja," kata ei Sin, jang djoega kamoedian toeroet tertawa: „,tapi pada kaoe djoega, Tjio Hengte, jang soeda bisa djalanken itoe penjamaran dengen bagoes, haroes dipoedji tinggi sekali."
„Kaloe tida begitoe," kata Tjio Keng dengen kasi liat roepa jang girang: "bagimanatah Heng- tiang jang ada pangkoe itoe djabatan di Tjeng- tjioe dengen begitoe terindah, nanti maoe trima kita-orang poenja oendangan boeat dateng kamari."
Semoea orang pada tertawa dan benerken bitjaranja Tjio Keng.
Siauw Djian poen benerken itoe perkatahan, kerna ia kata: pada waktoe ia dateng dan soeda kaloearken djoega bebrapa perkatahan boeat mem- boedjoek, masi Oei sin tida maoe menoeroet dengen gampang. Tapi beroentoenglah dengen itoe tipoe jang diatoer, ini soedara tida mendapet laen bintjana, salaen dari itoe sedikit kakagetan,
Oei Sin samboeng perkatahan itoe dengen membilang kaloe dirinja tida dapet tjilaka, itoe lah ada dari kasebetannja sakalian soedara-soedara, jang soeda dateng menoeloeng begitoe tjepet. Maka sadari ini hari ia berdjandji aken tinggal teroes di ini goenoeng bersama sakalian soedara-soedara jang doeloe dan sekarang. Tjoema menjesel ia moesti siasiaken kabaekannja Thio Thay-sioe. Tapi sebab perkara maoenja begini, soeda apa-boleh-boeat.
Soen Liep, Houw Seng dan jang laen-laen laloe menghiboer. Kamoedian diboeka perdjamoean boeat mengasi slamat dateng. Dan itoe hari djoega diprenta bebrapa liauwlo dengen menjamar pergi ka kota Tjengtjioe boeat ambil koelawarganja Oei Sin jang masi ada di sana.
Sambil minoem An To-tjwan berkata: lantaran perkaranja, hingga Siauw Djian dan Kiem Tahy- kian soeda katarik-tarik, beroentoeng dengen pertoeloengannja sakalian Hengte di sini, marika bisa terlepas dari itoe kabintjanahan,
„Tapi kendati begitoe, masi tida enak sekali boeat Kimheng dan Siauwheng," kata itoe thabib lebi djaoe: „kerna marika tida bisa liat dan bertemoe pada koelawarganja jang sampe sekarang masi dititipken di roemanja Boen Hwan-tjiang. ―Dalem ini bebrapa hari ada terlaloe banjak kerdjahan, hingga akoe tida sempat boeat kaloearken perkatahan. Tapi ini hari, sasoeda semoea perkara djadi beres, akoe ingin minta Bokheng poenja ertoeloengan boeat pergi ka itoe tempat aken ambil koelawarganja itoe kadoea Hengte dateng ka mari, soepaja Kimheng dan Siauwheng djadi enak hati. Kaloe laen-laen soedara akoe salempang ada jang kenalin, hingga bisa mem- bikin kita poenja oeroesan djadi koesoet, tapi Bokheng orang tida kenal dan akoe poen boleh troesa merasa koeatir."
„Oh, lebi dari itoe poen akoe nanti lakoeken," kata Bok Tjoen dengen senang: "baeklah besok pagi akoe nantt berangkat ka tempatnja Boen Hwan-tjiang."
An To-tjwan bertiga Siauw Djian dan Kiem Thay-kian hatoerken trima kast.
Malemnja dari itoe hari, waktoe perdjamoean soeda ditoetoep, An To-tjwan laloe toelis satoe soerat boeat Boen Hwan-tjiang, sedeng Kim Thay-kian dan Siauw Djian poen masing-masing toelis satoe soerat boeat familienja jang dipanggit dateng. Itoe thabib bekelin saratoes tail perak boeat Bok Tjoen poenja ongkos pergi dan poelang. Lebi djaoe diterangken, behoewa Boen Hwan- tjiang itoe ada tinggal dalem doesoen Anloktjoen, jang ada kira-kira doeapoeloe li dari kota Tong- tjiang. Roemanja itoe orang toea berdeket dengen djembatan dan di pinggirannja kali ada satoe poehoen Bwe jang tjabang-tjabangnja melintasi itoe kali ketjil. Bok Tjoen manggoetken kapala dan trima itoe oewang bersama sakalian soerat-soerat. Esoknja pagi, sasoeda membri slamat tinggal ia lantas berangkat ka tempat terseboet.
Liwat bebrapa hari perdjalanan itoe sampe di watesnja kota Tongtjang. Dari sini Bok Tjoen teroes pergi ka desa Anloktjoen dan dengen tida banjak soesa ia dapet tjari roemanja Boen Hwan- tjiang.
Pada orang di itoe roema ia kari taoe, bahoewa kadatengannja ada membawa soerat dari An To-tjwan, Siauw Djian dan Kiem Thay-kian. Dan istrinja Siauw Djian berdoea Kiem Thay-kian satelah denger itoe warta, djadi amat girang dan boeroe-boeroe kaloear, kerna doea njonja itoe memang lagi kenangken pada soeaminja.
Waktoe satoe boedak membri taoe, Bok Tjoen laloe membri hormat dan kasiken itoe soerat, sambil kasi taoe maksoed kadatengannja.
Itoe doea njonja laloe bikin banjak pertanjahan jang berhoeboeng dengen keadahannja ia poenja soeami. Dan tanja djoega, siapa sabener- nja orang gaga ini.
Bok Tjoen kasi taoe satoe persatoe, dan tjeritaken bagimana perhoeboengannja pada Siauw Djian dan Kiem Thay-kian, waktoe masi di Liang- san; dan sekarang iaorang ada berkoempoel di Tenghoensan. „Oh, kiranja kaoe ini ada Bok Sioksiok,“ kata itoe kadoea njonja dengen giran: „ah, soenggoe akoe tida taoe, harep soeka dimaâfken. Kendati doeloe kita-orang ada tinggal di Liangsan, tapi lantaran tida pernah saling bertemoe, hingga akoe tida kenalin boeat ini harep Sioksiok tida djadi ketjil hati.“
Kamoedian marika djalanken peradatan seperti orang jang berfamilie.
Kadoa njonja itoe oetjapken banjak trima kasi, jang boeat kaperloeannja sampe Bok Tjonn tjapeken diri. Tapi ini orang gaga kata: itoelah memang ada kawadjibannja satoe soedara angkat, jang haroes saling toeloeng menoeloeng.
Sasoedanja berkata-kata Bok Tjoen tanjaken halnja Boen Hwang-tjiang, mengapa orang toea itoe tida kaliatan.
Istrinja Siauw Djian kata: Boen Hwan-tjiang baroe pergi ka Tongtjianghoe, brangkali sore baroe poelang.
Kerna doea njonja ini dipandang sabagi familie, maka marika ada sabagi toean roema dan laloe silaken Bok Tjoen doedoek di pertengahan dalem. Satoe boedak diprenta sediaken arak dan makanan.
„Harep Sioksiok tida djadi koerang senang jang boeat ini kedatengan ditrima tjara begini,“ kata nyonja itoe' jang lantas tinggalken masoek dan tinggal Bok Tjoen dahar sendiri.
Sasoedanja matahari silem Boen Hwan-tjiang jang papergian telah poelang kombali. Njonja Siauw Djian laloe perkenalkan satoe pada laen, dan kasi taoe maksoed kadatengannja ini tetamoe.
Kadoeanja itoe laloe membri taoe: An To-tjwan ada kirim soerat dan oewang. Sahabisnjn berkata ia laloe ambil dari dalem boengkoesan kasiken itoe pada toean roema.
Boen Hwan-tjiang trima dan boeka itoe soerat jang sahabisnja dibatja ia berkata:
„Soeda lama akoe denger Tjiokhe poenja nama, baroe ini hari beroentoen bisa bertemoe moeka. Kaoe poenja perboeatan laki-laki, jang salaloe soeka pada kabeneran, ada banjak dibitjaraken, soenggoe akoe girang sekali dengen ini pertemoean.“
Bok Tjoen menjaoet dengen merenda.
„Tapi,“ kata poela Boen Hwang-tjiang: „mengapatah An To-tjwan siangseng boleh kirim ini oewang?– Boeantah dengen berlakoe demikian, boekan berlakoe sabagi satoe kenalan lama?“
„Ah, itoelah tida lebih sabagi satoe pertandahan rasa soekoer dan penerima,“ saoet Bok Tjoen: „maka ini sedikit kiriman, harep nanti ditrima dengen senang hati.“
Mendenger itoe perkatahan, tambahan koeatir An Tjo-tjwan nanti djadi koerang senang, maka kiriman itoe ia trima dengen sagala senang hati. Ampir berbareng itoe, satoe boedak soeda sadiaken makanan beserta arak jang baek, dimana toean roema laloe oendang tetamoenja doedoek makan minoem sambil beromong-omong.
Atas pertanjahannja itoe orang toea, Bok Tjoen tjeritaken dirinja poenja perdjalanan doeloe doeloe hingga sekarang; kamoedian toetoerken keadahannja Siauw Djian berdoea Kiem Thay-kian di Liangsan, bagimana sekarang itoe soedara sekarang soeda berkoempoel kombali pada An To-tjwan.
Boen Hwang-tjiang jang denger begitoe djadi amat girang.
Kamoedian orang toea ini tjeritaken bagimana sadari familienja itoe doea orang tinggal di sini, keadahan roema tangganja dirasaken djadi lebi banjak senang dan beroentoeng. Njonja Siauw Djan dan Kiem Thay-kian, doea-doea ada orang prampoean terpeladjar jang berperangi aloes dan berboedi, jang ada begitoe baek pada anaknja.
Boen Siotjia ada kaliatan senang dan roekoen betoel pada itoe doea njonja, hingga keadahannja tida bedah seperti familie sendiri. Di waktoe senggang marika soeka bikin sairan dan laen-laen peladjaran soerat, jang soenggoe ada menjenangken sekali pada hati.
Bok Tjoen dengerken itoe dengen senang. Sedeng Boen Hwan-tjiang teroesken tjeritanja, bagimana dalem waktọe blakangan ini ia dapet banjak kasoesahan hati, jang betoel-betoel amat mendjengkeli.
Atas pertanjahannja Bok Tjoen, kasoesahan apa adanja itoe, orang toea itoe laloe kasi taoe: bahoewa dalem ini doesoe ada tinggal satoe sastrawan nama Tiong Tjoe-he, jang padanja ada mendjadi sobat baek. Dari istrinja Tjoe-he ada mendapet satoe anak lelaki, jang kamoedian dikirim ka ini roema boeat beladjar soerat padanja, kerna anak itoe poenja iboe meninggal doenia.
Tapi lantaran tida ada orang jang mengoeroes roema tangga, blakangan itoe sastrawan menikah lagi pada satoe djanda familie Ouw, hingga moelai dari itoe waktoe pengidoepan dalem roemanja itoe sobat djadi kalangkaboet, kerna satoe pada laen ada tida roekoen Soepaja tida oesah memandang moekanja itoe istri jang blakangan, Tjoe-he telah berangkat ka Soetjwan dan bekerdja di sana pada satoe pembesar, sedeng anaknja jang lelaki dan baroe beroemoer anam-toedjoe taon, teroes beladjar di sini, tapi kaloe malem poelang ka roema sendiri.
Blakangan, waktoe ajahnja pergi, itoe iboe tiri jang diseboet Ouw Si, laloe panggil anaknja jang didapet dari soeami doeloean, sedeng anak tirinja dibikin sangsara dan koerang teropen, dan blakangan anak itoe sampe djadi mati.
Waktoe menjeritaken ini Boen Hwan-tjiang poenja mata mengembeng aer, soeatoe tanda hatinja ada merasa piloe. Kamoedian ia landjoetken tjeritanja, bagimana sasoedanja anak jang beladjar padanja mati, Ouw Si poenja anak jang bernama Tjiauw Bin-koei, jang soeda beroemoer brapa belas taon dan boekan sadja roepanja ada djelek, tapi kalakoeannja "poen sanget mendjemoeken, soeda kirim orang boeat minta gadisnja.
Itoe lamaran diberikoeti djoega dengen antjeman, jang kaloe ditoelak, katanja ia maoe dakwa di kota Radja, sataoe sama siapa, itoelah ia tida taoe. Tapi maski bagimana djoega, ia tida soedi boeat kawinken anak prampoeannja pada lelaki jang begitoean.
,,Hm, koerang adjar betoel!" kata Bok Tjoen, jang sasoeda denger itoe tjerita:,,di manatah roemanja orang kaparat?"
,,Tida djaoe dari sini," saoet Boen Hwan-tjiang. ,,Kaloe begitoe, biarlah sabentar malem akoe nanti paranin dan potes kapalanja......"
,,Oh, djangan! djangan Tjiokhe berboeat begitoe!" kata Boen Hwan-tjiang jang poetoesi perkatahannja itoe tetamoe: „akoe ada laen atoeran jang lebi sampoerna. Tapi dengerlah doeloe akoe poenja bitjara sampe abis." Sahabisnja kata begitoe, orang toea ini kasi taoe djoega: bahoewa benerlah Ouw Si itoe soeda masoekin pengadoean di kota Radja, dengen membilang : jang dirinja ada sakongkol pada An To-tjwan, terlepasnja Siauw Djian dan Kiem Thay-kian, ada dari lantaran perboeatannja. Tapi boeat itoe pengadoean ia tida koeatir, ia pikir besok maoe pergi ka kota Radja dan tjeritaken itoe pada Sioe Thay-wie.
,,Sabenernja doeloean djoega akoe soeda maoe pergi," kata poela ia: „tapi lantaran salempang dengen koelawarganja itoe doea orang jang tinggal di sini, maka niat itoe soeda tertoenda. Tapi sekarang, dengen datennja Tjiokhe jang hendak ambil itoe sakalian koelawarga, maka niat itoe teteplah dan akoe poen boleh troesa koeatir lagi. Dan kaloe itoe perboeatan jang kaoe bilang tadi diteroesken, toedoehannja Ouw Si djadi ada boektinja."
,,Kaloe begitoe, baeklah dan besok akoe nanti bawa doea Soso bersama sakalian familie ka atas goenoeng," kata Bok Tjoen: "tapi sasampenja di Tenghoensan, kaloe ini semoea akoe tjeritaken kombali, tentoe An To-tjwan Koko nanti prenta akoe pergi ka kota Radja boeat djaga Lohoe poenja diri dari kasoesahan."
,,Itoelah tida perloe, kerna di kota Radja akoe ada mempoenjai banjak sobat jang nanti melindoengi. Tjoema ada satoe perkara akoe maoe minta Tjiokhe poenja pertoeloengan."
,,Tjeritakenlah, apa jang akoe moesti berboeat?"
Boen Hwan-tjiang laloe kasi taoe, kerna gadisnja soeda bertjampoeran sakean lama pada itoe doea njonja, maka kaloe koenjoeng-koenjoeng itoe koelawarga diadjak pinda, pastilah nona itoe djadi merasa kailangan. Kaloe ia adjak ka kota Radja, boekan sadja ada terlaloe soesa boeat adjak-adjak anak prampoean ka tempat jang begitoe djaoe, malah disana ada terantjem dengen bahaja paperangan, sedeng kaloe ditinggal, ia koeatir dari fihaknja itoe djedjaka nakal nanti dapet ganggoean. Maka ia minta Bok Tjoen nanti soeka toeloeng bawa sadja nona itoe ka Teng-hoensan boeat noempang di sana sakean lama, sampe keadahan mendjadi beres.
Inilah adanja itoe permintahan.
Bok Tjoen menjataken girang, kerna ia kata: permintahan itoe, menjataken jang ini orang toea ada taro kapertjajahan besar atas dirinja. Maka tentoe sadja ia tida ada kaberatan dan nanti djaga hati-hati.
Sasoedanja pembitjarahan djadi selesih, orang toea itoe laloe bri taoe pada anaknja dan itoe kadoea njonja, jang dikirim-kirimken gadisnja. Itoe kadoea njonja dan si gadis djadi girang, jang dirinja tida bakal berpisahan. Dan itoe malem marika laloe boengkoes sagala barang-barang jang perloe dibawa, sedeng Boen Hwan-tjiang djoega antero malem ada bersadia-sadia.
Esok paginja kira-kira djam lima Bok Tjoen soeda bangoen, ampat kreta telah menoenggoe di loear roema. Sasoedanja membri slamat berpisa pada Boen Hwan-tjiang, Boen Siotjia bersama familie Siauw dan Kiem laloe naek ka atas itoe kandaran, dengen teriring oleh Bok Tjoen dari blakang.
Orang-orang itoe laloe berangkat ka Tenghoensan.
Salakoe pelindoeng, Bok Tjoen ada djaga itoe semoea kandaran dengen hati-hati. Sasoedanja berdjalan kira-kira saratoes li dan liat matahari ampir silem, orang gaga ini lantas tjari satoe tempat boeat bermalem.
Bok Tjoen laloe prenta koesir-koesir brenti di depan satoe roema menginep dan minta toean roema makan sadiaken anam kamar boeat orang-orang prampoean bersama sakalian pelajannja Siotjia, jang djoega ada toeroet bersama-sama.
Sabelonnja orang-orang prampoean itoe masoek, Bok Tjoen preksa dengen teliti di sasoeatoe kamar. Satelah dapet kanjatahan jang kamar-kamar itoe ada baek dan resik, baroelah ia titahken orang-orang itoe masoek.
Makanan boeat sore lantas disadiaken dan sasoedanja dahar, orang-orang prampoean tinggal teroes di dalem kamar.
Bok Tjoen doedoek di loear, sambil liatken orang-orang jang masoek kaloear di itoe hotel. Kerna letaknja ini roema menginep ada di tepi djalanan jang bertjabang tiga, maka orang-orang jang dari Hopak, Ilolam dan Swatang, kaloe kamaleman pada mampir di sini.
Boeat ilangken rasa iseng, Bok Tjoen minta disadiaken satoe piring daging dan sabotol arak.
Tida lama kamoedian ia dapet liat ada dateng satoe tetamoe jang beroemoer bebrapa belas taon, moekanja djelek dan di pipinja ada tanda-tanda bekasnja penjakit kotor jang baroe semboeh.
Njatalah tetamoe itoe ada satoe anak nakal, tapi pakeannja ada menjataken orang jang hendak berdjalan djaoe.
Waktoe tetamoe itoe sampe di pertengahan jang berdamping dengen tempatnja Bok Tjoen doedoek, saorang moeda laen jang djoega ada dalem itoe hotel, lantas seroehken padanja dan tanja: ka mana djedjaka ini maoe pergi.
Djawabnja maoe pergi ka kota Radja.
,,Hola, kaloe begitoe bener-bener kaoe adoeken itoe perkara ?" tanja tetamoe itoe dengen soeara kagoem: „soenggoe, akoe kira tjoema memaen-memaen sadja !"
,,Memaen, ho ?!" kata orang moeda itoe sembari prenta djongos taro boengkoesan di dalem kamar :„perkara jang akoe lakoeken boekannja memaen, sobat, hanja ada dengen sasoenggoenja."
„Tapi perloe apatah kaoe moesti tjapeken hati sampe begitoe ?" kata poela itoe tetamoe, jang njata ada kenal pada itoe djedjaka: „kaoe toch tida ada bermoesoe pada itoe orang toea, boekan ?"
Dari ia poenja kapala batoe, lakoe moesti kasi rasa," kata orang moeda itoe sambil bersenjoem, dan mesem itoe ada djelek sekali: „kaloe siang-siang ia trima baek akoe poenja lamaran, akoe tentoe tida nanti bikin begitoe roepa."
Bok Tjoen sambil minoem ada mendengeri itoe omongan. Dari pembitjarahan lebi djaoe, njatalahorang moeda ini ada Tjiauw Bin-koei, jang doeloean telah lamar gadisnja Boen Hwan-tjiang, dan sebab orang toea itoe toelak lamarannja, sekarang ia maoe bikin soesa dengen itoe pengadoean jang Boen Hwan-tjiang sendiri telah tjeritaken pada Bok Tjoen.
Hatinja itoe orang gaga djadi amat mendongkol. Diam-diam ia mengawasi pada Tjiauw Bin-koei dan berkata dalem hati:
,,Hm, hati-hati, ja......"
Tida lama djedjaka itoe masoek ka dalem kamar jang telah disadiaken. Preksa boengkoesannja dan sahabisnja santap ia lantas rebah-rebahan, sambil pikiri perdjalanannja jang aken diteroes esok pagi.
Parasnja Boen Siotjia jang tjantik dan jang hatinja kapingin dapetken boeat istri, telah berbajang depan matanja. Beroentoenglah ia tida taoe, kaloe itoe nona jang lagi dipikiri djoega ada dalem ini roema menginep tjoba kaloe ia taoe, tentoe gila basanja bisa membikin djemoe pada siapa jang meliat,
Esoknja pagi, sasoeda beresken pembajaran oewang makan dan menginep, Bok Tjoen lantas soeroe orang-orang prampoean bersadia boeat berangkat kombali, tapi dalem hatinja soeda tetep boeat lakoeken satoe perniatan.
Koesir lantas djalanken kretanja. itoe wastes hari masi remang-ramang.
Sasampenja di satoe tempat Bok Tjoen pesen pada koesir, soepaja kandaran ini didjalanken teroes dan brenti di Sipliteng boeat toenggoe datengnja, kerna ia ada sedikit oeroesan jang maoe diberes doeloe.
Koesir trima prenta, lantas berdjalan teroes, sedeng Bok Tjoen tinggal berdiri dan saban-saban menengok ka tempat di mana baroesan ia liwati.
Tida lama dari itoe djoeroesan kaliatan saorang moeda jang gendong boengkoesan lagi menda tengi. Bok Tjoen angkat moeka dan kenali, bahoewa orang ini boekan laen dari itoe djedjaka jang samalem.
Tjiauw Bin-koei dengen tida tjoeriga laloe ber- djalan teroes, sedeng Bok Tjoen mengikoeti dari blakang. Sasampenja di satoe tempat soenji, ia kaokin itoe orang moeda, jang djadi heran dan lantas brenti.
Sasoedanja berhadepan, Tjiauw Bin-koei merasa tida kenal pada ini orang jang memanggil padanja. Sabelonnja sempet menanja, Bok Tjoen laloe angkat goloknja dan tabasken itoe di lehernja si kaparat, jang tantas roeboe dengen tida bernapas.
Maitnja lantas diboewang ka dalem soemoer jang ada di samping gredja, sedeng boengkoesannja ia ambil kamoedian soesoel itoe kreta jang menoenggoe di Sipliteng.
Begitoelah perdjalanan dilandjoetken lebi djaoe, jang tida antara lama telah sampe di goenoeng Tenghoensan. Dimana Siauw Djian dan Kiem Thay-kian jang denger familie telah sampe, djadi amat girang dan laloe kaloear menjamboet.
Tida oesah ditjeritaken bagimana girangnja itoe koelawarga jang sekarang bisa bertemoe kombali. Dalem perdjalanannja itoe jang moelai bebrapa hari, Bok Tjoen tjeritaken satoe persatoe dan kamoedian preksa apa adanja dalem itoe boengkoesan. Di sitoe ka dapetan sedikit oewang bersama satoe soerat pengadoean jang Tjiauw Bin-koei maoe kirim ka kantoor Kayhoenghoe, boeat adoeken itoe orang-orang gaga di Tenghoensan poenja perboeatan.
„Tjobalah liat ini soerat, haha! baeknja sadja," kata Bok Tjoen pada sasoedanja membatja itoe:
„ah, bener-bener manoesia kaparat itoe Tjiauw Bin-koei, njatalah tida sala kaloe akoe tabas batang lehernja."
Kamoedian ia kasiken laen-laen'soedaranja batja.
Loan Teng-giok pada sasoedanja membatja itoe, poedji atas kalakoeanja Bok Tjoen, jang katanja: dengen memboenoe Tjiauw Bin-koei, boekan sadja djadi linjapken satoe bahaja boeat Boen Hwan-tjiang dengen gadisnja, malah ada boeat kabaekannja djoėga bagi iaorang poenja perkoempoelan di Tenghoensan. Kerna dalem itoe soerat poen ada diatoer begitoe bagoes dan beres, membri taoe pada pengadilan tinggi atas kalakoeannja begal-begal di ini goenoeng. Kaloe meliat tjetjongornja itoe orang moeda jang amat djelek, orang tida bisa pertjaja ia bisa toelis soerat pengadoean begitoe rapi dan penoeh dengen alesan-alesan. Tapi boleh djadi, rekest boeat mendakwa jang Boen Hwan-tjiang ada bersakongkol pada Hohan di Tenghoensan, telah ditoelis oleh laen orang. „Soenggoe beroentoenglah," kata poela jang laen-laen, jang sasoednja liat boenjinja itoe soerat.
Boeat ini orang haroes bersoekoer pada Bok Hengte," kata Soen Liep dan An To-tjwan:,,tapi bagimanatah lantarannja, maka itoe Tjiauw Binkoei jang tida ada bermoesoean pada kita, dan tjoema maoeken gadisnja Boen Hwan-tjiang, boleh kirim pengadoean begini roepa, boeat mendjahati pada kita berame?"
Bok Tjoen lantas tjeritaken satoe persatoe, menoeroet sabagimana jang ia telah denger dari Boen Hwan-tjiang.
"Oh, oh, begitoe?" kata An To-tjwan: „baek djoega sekarang gadisnja dikirim ka mari."
Lebi djaoe Bok Tjoen tjeritaken, bagimana Boen Siotjia pada istrinja Siauw Djian dan Kiem Thay-kian ada berlakoe begitoe manis dan akoer, hingga satoe pada laen amat soesa boeat berpisa. Dan sebab koeatir nona itoe kailangan temennja, maka Boen Hwan-tjiang telah minta ia bawa sadja ka mari.
Siauw Djian dan Kiem Thay-kian jang denger itoe, djadi amat girang.
Sasoedanja beromong-omong, Bok Tjoen kaloearken soeratnja Boen Hwan-tjiang jang dikirim pada An To-tjwan, dalem mana itoe orang toea minta toeloeng diliat-liat gadisnja, salagi ia pergi ka kota Radja. Sedeng soerat jang dikirim pada Siauw Djian berdoea Kiem Thay-kian, djoega maksoednja ada ampir saroepa, jaitoe minta masing-masing poenja istri toeloeng liat dan pimpin sabagi anak sendiri.
Kadoeanja itoe djadi amat girang dan berdjandji dalem hati, nanti lakoeken itoe pesenan.
Kamoedian Loan Teng-giok prenta orang sadiaken makanan dan minoeman, boeat membri slamat jang Bok Tjoen soeda bisa boenoe Binkoei dan linjapken satoe halangan besar.
Bok Tjoen kata, itoe tjoema terdjadi dari kabetoelan sadja.