Pembalesannja Kawanan Liangsan/Bagian katiga/Bab 17
XVII
Orang gaga pada berkoempoel, Houw
Seng goenaken pikiran boeat
melawan Ouw Keng.
Meliat keadahannja itoe goenoeng jang diperlengkapan dengen begitoe sampoerna Tjio keng tida brani gegaba boeat madjoe teroes ka bawanja, hanja, laloe adjak Bok Tjoen ambil laen djalanan.
Sasampenja di djalan besar ada kaliatan satoe waroeng, maka kadoeanja ini laloe mampir boeat makan-makan, kerna peroetnja memang soeda lapar. Djoega di itoe tempat ada moendar mandir soldadoe politie, hingga menerbitken tjoeriga di hatinja marika itoe.
Sasoedanja berdoedoek, satoe djongos laloe dateng menghamperi dan tanja; apa itoe tetamoe maoe dahar atawa minoem. — Tjio Keng membri taoe, bahoewa ia ingin dahar daging bakar sama arak jang baek.
Tida lama kamoedian barang jang dipesen itoe telah sedia dan sembari minoem, Tjio Keng laloe menanja pada itoe djongos, mengapa di sini ada banjak soldadoe politie. — Apa memang begitoe biasanja. „Oh, tida,“ saoetnja itoe djongos sambil golengken kapalanja, „Doeloean tida begitoe, hanja baroe ini satenga boelan sadja.“
„He, apatah lantarannja ?“ tanja poela Tjio Keng dengen merasa lebi heran.
Itoe djongos laloe kasi taoe, lantaran perkoempoelan sakalian Hohan di goenoeng Tenghoensan, soeda membikin pamerenta agoeng dapet taoe dan lantas titahken Djoebit kirim satoe panglima besar membawa tigariboe balatentara. Salaennja dari ini, dari Tengtjioe, Tjengtjioe dan Laytjioe djoega ada kirim bantoean boeat poekoel ini goenoeng, jang kamariken soeda berdjalan doea minggoe lamanja.
„Lantaran terdjadinja ini perkara,“ kata djongos lebi djaoe: „banjak orang soeda tida brani liwat ka mari, hingga di ini waroeng djarang kadatengan tetamoe.“
„Apatah Hohan-hohan di Tenghoensan, ada jang bernama Soen Liep dan Wie Siauw-tjhat?“ tanja Tjio Keng.
Itoe djongos mengawasi dengen bengong, kamoedian tanja: ada kaperloean apatah maka ini tetamoe menanjaken itoe doea Hohan. ― Tjio Keng dengen tida bersangsi laloe menjaoet, bahoewa kadoeanja itoe ada ia poenja sobat baek. Jang kadatengannja ka mari memang maoe tjari padanja. Mendenger itoe perkatahan si djongos djadi amat kaget dan boeroe-boeroe membri hormat, dengen meminta maäf jang matanja soeda tida bisa kenalin Thaunia-thaunianja poenja sobat baek Kamoedian dengen kalakoean hormat ia silaken Tjio Keng berdoea Bok Tjoen masoek ka dalem dan doedoek di paseban blakang.
Meliat kalakoeannja ini djongos, kadoea Hohan ini lantas dapet taoe, bahoewa ini roema makan tentoe ada kapoenjahannja orang gaga di Tenghoensan, jang boeka ini sekedar boeat serep-serepin kabar dari orang jang djalan atawa liwat.
Waktoe dibikin pertanjahan, njatalah roema makan ini telah diboeka ada atas prentanja Khouw Thay-so, boeat serepin segala perkara jang berhoeboeng dengen kapentingannja ini goenoeng.
Njatalah doegahannja Tjio Keng tida sala.
Kamoedian Tjio Keng tanja pada itoe djongos, bagimana iaorang bisa naek ka atas itoe goenoeng, sedeng di sakiternja ada kaliatan soldadoe-soldadoe politie jang mendjaga begitoe hati-hati.
„Djiwi Hohan troesa koeatir, perkara ini ada Siauwdjin poenja tanggoengan,“ saoetnja itoe djongos: „sabentar kaloe matahari moelai silem Siauwdjin nanti anter naek ka atas, dengen ambil satoe djalanan jang tida didjaga oleh itoe soldadoe-soldadoe.“
„Baeklah,“ kata Tjio Keng jang lantas minoem dan beromong-omong pada Bok Tjoen sedeng itoe djongos melajani dengen hormat dan sabentar-bentar bawaken lagi makanan jang baroe.
Tida lama hari telah moelai sore. Koetika matahari moelai silem, itoe rahajat dari Tenghoen-san jang djadi Tjioepo laloe anteri Tjio Keng berdoea Bok Tjoen naek ka goenoeng, dengen ambil djalan dari satoe djalanan ketjil jang tertoetoep lebat dengen papoehoenan.
Bagi orang-orang jang tida taoe betoel keadahannja ini goenoeng, pasti tida taoe kaloe di itoe tempat ada satoe djalanan, dimana orang bisa naek ka atas. Begitoelah hal ini telah terdjadi djoega dengen itoe soldadoe-soldadoe politie, jang soeda tida bikin pendjagahan di itoe lampingan.
Di sapandjang itoe djalanan ada soenji. Apa jang terdenger di itoe waktoe tjoema soearanja binatang-binatang ketjil sadja. Itoe Tjioepo berdjalan lebi doeloe dengen terikoet oleh Tjio Keng dan Bok Tjoen, dan waktoe sampe di pinggiran sebla atas, pengoendjoek djalan itoe laloe membri satoe tanda rasia pada liauwlo jang lagi mendjaga.
Itoe berapa liauwlo jang lagi moendar mandir, satelah liat pertandahan jang dibriken dan djoega kenalin pada itoe djongos, lantas boeroe-boeroe naek ka atas dan satoe antaranja laloe pergi ka Tjhigiethia, boeat sampeken perkatahannja Tjioe-po pada Thauanianja.
Satelah mendenger itoe kabar, semoea Hohan laloe kaloear menjamboet.
Waktoe bertemoe moeka, Wie Siauw-tjhit kaliatan girang sekali. Sigra djoega doea tetamoe ini diadjak ka Tjhigiethia, dimana satoe pada laen laloe djalanken peradatan dan kahormatan.
Sasoedanja pada berdoedoek Soen Liep laloe adjar kenal kadoea sobatnja itoe pada Loan Teng-giok dan Houw Seng. Ia tjeritaken bagimana sebabnja maka Loan Teng-giok boleh naek ka ini goenoeng dan diangkat djadi Twako. Djoega kasi taoe, jang Houw Seng ini ada soedara toea dari Ittengtjeng Houw Sam-nio, saorang gaga jang baroe balik dari laen negri dan soeda lama berkoempoel di sini.
Sabaliknja, pada itoe Twako dan Houw Seng poen ada diadjar kenal pada itoe doea orang dan terangken djoega siapa adanja Tjio Keng berdoea Bok Tjoen.
Begitoelah satoe pada laen soeda djadi berkenalan dan laloe beromong-omong.
Wie Siauw-tjhit menjataken girang atas kadatengannja ini doea sobat, jang dikata ada kabetoelan sekali. Kerna ini waktoe Tenghoensan memang perloe dapet bantoeannja orang-orang pande dan gaga
„Di sagala waktoe akoe ada sadia boeat kaloearken tenaga,“ kata Bok Tjoen: apa jang dikerdjaken oleh sakalian soedara-soedara, tentoe sadja akoe haroes toeroet ambil bagian.“
„Itoelah jang memang kita-orang poenja harepan,“ kata Loan Teng-giok.
Kamoedian Soen Liep laloe tjeritaken, bagimana soeda satenga boelan tentara negri dateng menjerang, tapi belon bisa dipoekoel moendoer. Maka kadatengannja Tjio Keng, ia harep nanti bisa dapetken satoe daja jang bagoes boeat moendoeri moesoe.
Sabelonnja Tjio Keng menjaoet, Houw Seng berkata dengen girang:
„Kadatengannja Tjio dan Bok Hengte, sasoenggoenja ada berharga besar boeat daja jang kita lagi ichtiarken.“
Semoea orang laloe memandang dengen heran dan menanja, daja bagimana jang hendak digoenaken.
„Sabagimana Tjiongwie taoe, kata Houw Seng: „Ouw Keng soeda gerakin tigariboe tentara boeat poekoel kita poenja tempat, dengen mendapet djoega bantoeannja tiga kota. Tapi menoeroet kabar jang akoe serepin, Tjengtjioe poenja Tong tjhie ada Oei Sin Koko, jang waktoe dimintaken bantoean boeat madjoeken tentaranja ka mari, telah kasi alesan: dirinja ada sakit. Dan alesan itoe akoe kira boekan dengen sabenernja, hanja doegahankoe tentoe ia inget katjintahan doeloe hari, hingga ia tida maoe gerakin tentara.“
„Dan sekarang,“ kata poela Houw Seng: „dengen datengnja Tjio Hengte ada kabetoelan sekali. Akoe pikir biar soedara Tjio Keng sadja menjaroe djadi Oei Sin Koko boeat kalaboein moesoe, kerna Ouw Keng toch tida kenal pada itoe Thongtjhie di Tjengtjioe, maka kadatengannja tentoe nanti ditrima dengen girang dan soeka hati. ― Nah, dalem waktoe begitoe, Tjio Hengte boleh goenaken tenaganja boeat kaoentoengan fihak kita.“
„Ah, itoelah bener-bener satoe tipoe bagoes sekali!“ kata itoe bebrapa Hohan dengen soeara girang: „ja, Houw Hengte poenja daja bener baek, tapi bagimana moesti djalankennja?“
Houw Seng laloe toetoerken pelahan-pelahan, bagimana Tjio Keng moesti berboeat kaloe soeda bisa akalin moesoe poenja panglima besar. Satoe persatoe ia njataken apa jang telah dipikir.
Semoea orang jang denger tipoenja, djadi girang dan tepok-tepok tangan. Loan Teng-giok sendiri poen telah memoedji. Sedeng Tjio Keng dengen sagala senang hati nanti lakoeken itoe akal jang telah dipikir oleh Houw Seng.
Tida lama barang-barang hidangan jang lesat soeda teratoer di atas medja, dimana Soen Liep dan Siauw-tjhit laloe oendang itoe kawan jang baroe dateng, doedoek berdjamoe pada sakalian soedaranja.
Dalem itoe perdjamoean orang mengasi slamat pada Tjio Keng dan Bok Tjoen, jang trima dengen girang hati dan hatoerken trima kasi.
Pada hari esoknja Houw Seng minta Siauw Djian toelisken satoe soerat jang matjemnja sama betoel dengen Ouw Keng waktoe oendang itoe Thongtjhie di kota Tjengtjoe. Sasoeda itoe ahli penjoerat menoel is selesih, baroe distempel dengen tjap palsoe jang dibikin oleh Kiem Thay-kian, hingga roepanja soerat itoe soeda tida bedah seperti jang toelen.
Semoea orang jang liat itoe djadi girang.
Kamoedian Houw Seng bikini satoe bendera dan limaratoes liauwlo dipakeken seperti pakean soldadoe di itoe kota Sasoeda ini semoea beres, Tjio Keng laloe toeroen dari goenoeng dan dengen ambil laen djalanan ia menoedjoe ka tangsinja Ouw Keng, sembari serahken itoe soerat panggilan jang Oei Sin trima.
Ouw Keng jang dapet kabar Oei Sin telah dateng, djadi amat girang dan bersama doea Tongtjhie dari Tengtjioe dan Laytjioe, laloe menjamboet. Beroentoeng itoe doea Thong-tjhie djoega tida kenal pada Oei Sin, maka marika tida bisa kenalin bahoewa orang jang ada di hadepannja itoe ada, satoe moesoe jang bakal menjerang padanja.
Ouw Keng laloe adjak Oei Sin tetiron itoe masoek ka dalem dan beromong-omong pada itoe doea Thongtjhie. Atas pertanjahannja itoe panglima besar, Oei Sin palsoe kata: lantaran sakit, maka ia tida bisa lantas geraken tentara di itoe hari djoega. Kamoedian bikin pertanjahan, bagimana penjerangan jang dibikin dalem ini doea minggoe poenja lama.
„Tida ada perobahan apa-apa,” saoet Ouw Keng sambil gojang kapala: „tapi, kaoe, Oei Tjiangkoen, kaloe menoeroet pengliatankoe, kaoe bo ekan seperti orang jang baroe baek dari sakit.”
„Apatah boekan lantaran inget perkara jang doeloe. hingga kaoe membri alesan demikian padakoe?” kata poela Ouw Keng sambil bersenjoem. Sedeng itoe doea Thongtjhie jang laen, Yoe Djin dan Yoe Goan-Beng, tinggal berdiam sadja.
„Bener Boattjiang doeloe pernah tinggal di Liangsan, hingga nodaken nama dan menanggoeng kadosahan besar,” kata Tjio Keng dengen soeara tetep dan aer moeka jang tida beroba: „tapi beroentoeng baginda ada satoe djoengdjoengan jang adil, maka dengea sedikit pahala jang Boattjiang diriken, boekan sadja itoe kadosahan telah dikasi ampoen, malah telah dikoerniaken djoega pangkat jang dipangkoe sampe sekarang. Boeat itoe boedi besar jang Sri Baginda oendjoek, maski badan djadi antjoer remoek belon bisa bales itoe kabaekan, maka dimanatah Boattjiang ada mempoenjai hati boeat inget perkara-perkara doeloe; apapoela kawanan itoe sasoenggoenja ada amat djahat dan saban-saban mengganggoe prikeamanan dan kasantausahan negri, maka tida boleh tida moesti dikasi hadjaran.
„Dan tentang datengkoe ka mari maka boleh djadi kablakangan," kata poela Tjio Keng: „sasoenggoenja boekan laen dari penjakit jang mendjadi halangan, jang sabelonnja trima Tjoeswe poenja soerat, kamarennja memang Boattjiang soeda rebah di atas randjang, maka boeat kalambatan itoe harep soedi dimaäfken."
Ouw Keng manggoet-manggoet menjataken senangnja hati. Kamoedian ia kata: kaloe orang soeda seboet Tjiangkoen ini Tiensamsan, sasoenggoenja djoega seboetan itoe tida sala. Boeat ini poedjian, Oei Sin tetiron oetjapken trima kasi.
Kamoedian dibitjaraken lebi djaoe perkara perang.
Ouw Keng laloe kasi taoe, sadari tentaranja menjerang, moesoe tida brani kaloear lagi. menoeroet pengliatannja, itoe semoea begal-begal di Tenghoensan tjoema Loan Teng-giok dan Soen Liep jang mendingan djoega, kerna salaen ilmoe boege, djoega atoeran perang ada mengarti. Boeat jang laen-laen troesa dikoeatir. Kerna marika semoea ada orang-orang tida ternama.
„Dengen Tjiangkoen poenja bantoean, akoe kira sabelonnja liwat satoe minggoe itoe semoea brandal kita bisa dapet tangkep idoep atawa binasaken," kata poela itoe panglima besar dengen. soeara sombong.
Sabelonnja Tjio Keng menjaoet, satoe soldadoe dateng membri taoe, bahoewa moesoe ada kirim satoe oetoesan jang minta bertemoe.
Ouw Keng lantas titahken oetoesan itoe mengadep.
Tida lama orang itoe sampe ka roewangan dalem dan membri hormat pada Ouw Keng, sambil serahken soerat jang dibawa olehnja.
Sasoedanja soerat itoe dibatja, Ouw Keng berdiam sakoetika lama sambil berkata dengen soeara menggerendang, dan perkatahan itoe telah didenger djoega oleh katiga orang jang berada di sampingnja.
Dalem ini soerat moesoe membri taoe, bahoewa Hohan dari Tenghoensan ingin dateng menaloek.
Kamoedian Ouw Keng kasi taoe maksoednja moesoe dan tanja bagimana itoe tiga Thongthjie poenja pikiran. Boleh ditrima atawa tida.
„Kaloe menoeroet Boattjiang poenja pikiran, pasoekan negri haroes bisa berlakoe moera dengen berdasar pada priboedi," kata Yoe Goanbeng: kaloe moesoe minta menaloek, boleh sekali diloeloesken; kerna doeloe poen baginda telah kaloearken firman boeat senangken hatinja kawanan Liangsan. Dan begitoe dengen sekarang, kaloe Tjoeswe trima permoehoenannja moesoe, ini paperangan bisa lantas brenti dan kita troesa korbanken terlaloe banjak djiwa manoesia."
„Tida! Ini kali kita-orang tida boleh berboeat begitoe!" kata Oei Sin tetiron dengen tjepet; brandal di Tenghoensan ada laen dari kawanan Liangsan tempo doeloe. Kaloe marika itoe memang ada berasal dari negri jang baek, jang lantaran keadabannja ada begitoe memaksa hingga djadi begal, memang boleh sekali ditrima permintahannja. Tapi Tenghoensan poenja orang-orang, semoea ada bekas brandal taloekan jang tida taoe kapok dan sekarang telah berontak kombali, hingga perboeatan begitoe ada melanggar sanget pada wet negri, manatah boleh dikasi ampoen?"
„Djoega brandal di ini tempat djoemblanja tida sabrapa besar," kata poela Oei Sin tetiron: „maka tenaganja poen ada ketjil sekali. Dengen sakali gebrak sadja kita poenja bisa bikin marika itoe djadi moesna, hingga perloe apa moesti ditrima marika poenja permoehoenan?"
Ouw Keng berdiam. Perkatahannja itoe doea panglima perang ia rasa masing-masing ada mempoenjai kabeneran, hingga tida taoe mana jang moesti ditoeroet.
Yoe Djin jang ada moefakat dengen perkatahannja. Yoe Goan-beng, lantas berkata:
„Maski apa jang dibilang oleh Oei Tjangkoen ada berdasar pada atoeran jang sabenernja, tapi djangan loepa, jang ini waktoe pamerenta lagi sedeng hadepin kasoesahan dan bahaja dari loear negri, maka kaloe sateroesnja di dalem negri ada tida aman dan saban-saban terbit paperangan atawa pertempoeran, dikoeatir soeker dapet tenaga tjoekoep boeat toelak itoe bahaja dari loear. ― Djoega Tenghoensan kendati tenaganja lemah, tapi tempatnja ada diatoer begitoe sampoerna dan soeker boeat diserang. Maka hal ini harep Tjoeswe soeka pikir lebi djaoe."
Ouw Keng merasa satoedjoe dengen pikirannja itoe doea Thongtjhie, maka ia laloe berkata pada itoe oetoesan:
Permoehoenannja kaoe poenja Thaunia akoe trima baek. Maka di dalem tempo tiga hari semoea Thaunia-thaunia dari Tenghoensan moesti dateng ka ini tempat dengen tangan terborgol. Kaloe marika tida toeroet apa jang akoe bilang, sigra djoega akoe geraken tentara menjerang naek dan sampe di itoe waktoe tida ada salembar roempoet jang akoe nanti kasi katinggalan.“
„Begitoe lekas permintahan ini ditrima,“ kata itoe oetoesan: „semoea Thaunia laloe bersiap apa jang perloe, maka sekarang harep Tjoeswe kaloearken prenta boeat pertoendahan perang.“
Ouw Keng toeroet itoe permintahan, maka satoe prenta laloe dikaloearken, hingga semoea soldadoe djadi amat girang dan itoe malem masing-masing bitjaraken boeat berangkat poelang.
Itoe oetoesan sasampenja di Tjhigiethia laloe kasi taoe apa jang ia liat di tangsinja moesoe, lebi djaoe tjeritaken bagimana Ouw Keng soeda trima permintahan itoe dengen girang hati.
„Kaloe begitoe, kenalah kita poenja akal," kata Loan Teng-giok dengen girang, jang sigra prenta bersiap boeat menjerang sabentar malem.
Orang-orang jang menjerang ditetepken: Soen Liep poekoel tangsi jang sebla Wetan, Wie Siauw tjhit poekoel tangsi jang sebla Koelon, Soen Sin berdoea Khouw Thay-so semboeni di djalanan jang ka Tengtjioe, sedeng Tjo Loen dan Bok Tjoen semboeni di djalanan jang ka Laytjioe, 'soepaja itoe doea Thongtjhie jang maoe lari atawa bergerak, tida bisa liwat dari itoe djalanan.
Sedeng Houw Seng dengen sendirian nanti menjerang tangsi tenga.
Sorenja dari itoe hari, sahabisnja santap semoea koeda dilolosken kerintjingannja, soepaja di waktoe berdjalan tida kadengeran apa-apa. Persadiahan lantas diatoer dengen tjepet, aken menoenggoe sampe dateng itoe waktoe jang telah ditetepken.
Koetika sampe waktoenja, semoea liauwlo dan orang-orang gaga laloe toeroen goenoeng dan moesoe itoe waktoe lagi tidoer dengen senang, kerna besok atawa noesa sasoeda beres oeroesan trima moesoe poenja menaloek marika hendak berangkat poelang.
Tapi salagi orang-orang itoe mengimpi enak, Loan Teng-giok lantas membri satoe tanda dan semoea Hohan laloe menjerang pada tempat-tempat jang telah ditentoeken.
Dalem sedikit tempo banjak kapala pada menggelinding dari atas poendak. Houw Seng menjerang dengen heibat ka tenga-tenga, Wie Siauw-tjhit dengen kalakoean seperti matjan menerobos dan hantem siapa jang dikatemoeken.
Tangsinja tentara negri itoe waktoe djadi kaloet betoel.
Ouw Keng jang lagi poeles njenjak, djadi tersedar lantaran kaget.
Dengen goegoep ia berlontjat dari tempat tidoerdan boeroe-boeroe ambil gegamannja boeat lawan moesoe. Di loear kadengeran soeara soerak begitoe rioeh. Dalam itoe saät ia mengarti jang dirinja kena ditipoe moesoe.
Sasampenja di loear Ouw Keng dapet liat soldadoenja lagi diboenoe boenoein, banjak koeda soeda tida kaboeroe diselain, moesoe kaliatan menjerang begitoe heibat.
Waktoe maoe kaloear ia berpapasan pada Loan Teng-giok, jang lantas angkat sendjatanja dan di sitoe terbitlah satoe pertempoeran heibat.
Tapi, lantaran tida toenggang koeda dan djoega tida pake badjoe perang, maka Ouw Keng merasa tida tahan dan lantas lari. Tapi belon sabrapa djaoe ia katemoe Oei Sin jang lagi mengamoek boenoe-boenoein soldadoenja.
Sekarang baroe panglima besar ini taoe, bahoewa ia telah ditipoe.
Meliat soldadoenja banjak jang binasa, Ouw Keng djadi samingkin bingoeng. Tapi tida kira goloknja Loan Teng-giok telah sampe, hingga panglima itoe laloe roeboe.
Tjio Keng jang menjamar djadi Oei Sin laloe boeroe-boeroe menjerang ka djoeroesannja itoe doea Thongtjhie, jang lagi maoe melariken diri, hingga keadahan di fihak moesoe kaliatan kaloet betoel.