Pembalesannja Kawanan Liangsan/Bagian katiga/Bab 19
XIX
Lantaran trima menaloeknja moesoe, persariketan antara Songtiauw dan negri Kimkok mendjadi renggang.
Dengen meninggalken doeloe itoe orang-orang gaga di Tenghoensan, sekarang mari kita mengikoeti pada Boen Hwan-tjiang, jang sesoeda gadisnja berangkat, ia poen lantas bersadia-sedia boeat pergi ka Kota Radja dan tinggalken roemanja jang didjaga oleh satoe boedak toea.
Esoknja pagi orang toea itoe laloe berangkat, liwat bebrapa hari sasampenja di Kota Radja ia teroes ka gedongnja Sioe Thay-wie.
Kedatengannja itoe ditrima dengen baek. Sasoedanja berdoedoek Boen Hwan-tjiang laloe tjeritaken tentang perdjalanannja An To-tjwan jang telah mampir di roemanja, blakangan sampe bertemoe pada Siauw Djian dan Kiem Thay-kian; dan satoe persatoe ditoetoerken terang, hingga pembesar itoe kaliatan girang jang itoe thabib bisa terloepoet dari bahaja besar.
Sasoeda itoe baroe Hwan-tjiang tjeritaken tentang maksoed kadatenganja, jaitoe bagimana Tjiauw Bin-koei maoe mengadoe barang jang tida-tida, sakedar boeat bikin soesa boeat dapet ken gadisnja. Ini djoega ia tjeritaken sampe terang dan tida ada satoe apa jang, disemboeniboeniken.
Sasoedanja mendenger itoe, Thay-wie berdjandji nanti membri toeloengan dan hoekoem itoe orang jang mendakwa.
Boen Hwan-tjiang oetjapken trima kasi dan kamoedian lantas berlaloe.
Sakaloearnja dari gedong Sioe Thay-wie, orang toea itoe lantas pergi ka gredja Thay Siang Kok Sie dan bertemoe pada satoe padri besar. Kerna Titjeng Tianglo telah wafat, maka kadoedoekannja sekarang telah diganti oleh satoe padri laen jang beruama Tjinkong Siansoe.
Ini padri ada saorang jang loewas pengatahoean dan berilmoe tinggi. Segala apa jang dilakoeken ada berdasar pada priboedi, sedang kalakoeannja jang manis, membikin sasoeatoe orang jang ber- kenalan padanja, djadi merasa soeka.
Pada Boen Hwan-tjiang padri ini ada kenal baek Maka waktoe moeridnja kasi taoe atas kadatengannja ini sobat lama, Tjinkong Siansoe laloe kaloear menjamboet dan sasoedanja satoe pada laen membri hormat, masing-masing laloe berdoedoek di pertengahan dalem.
Satoe moerid dateng bawaken thee dan sembari minoem, Tjinkong Siansoe lantas menanja:
„Soeda lama akoe denger Boen Sianseng ting tinggal semboeniken diri di padoesoenan, belon taoe ini hari dateng di kota Radja ada oeroesan apa?"
„Boekan. laen, hanja kerna ada saorang dengki jang maoe menjoesaken dirikoe, maka terpaksa akoe dateng ka mari boeat minta pertoeloengannja Sioe Thay-wie," saoet Boen Hwan-tjiang:
„dan boeat dalem samentara waktoe itoe, akoe hendak menoempang di sini. Apatah itoe tida membikin Siansoe djadi bertamba soesa?"
„Oh, djanganlah Sianseng kata begitoe," saoet itoe kapala padri sambil tertawa:,,djangan poela seperti kaoe, jang memang ada djadi satoe kenalan lama, kendati orang jang tida terkenal poen, akoe nanti trima dengen senang hati."
Hwan-tjiang oetjapken trima kasi.
Kamoedian marika beromong-omong lebi djaoe, dalem mana Tjinkong Siansoe kata: ia poen soeda lama ada niatan boeat asingken diri ka tempat soenji. Kerna tinggal dalem kota jang begini besar dan rame, ampir satiap hari ada sadja perkara-perkara loear biasa jang kadjadian, seperti pada baroe ini.
„Ada perkara apatah ?" tanja Boen Hwan-tjiang dengen merasa heran.
„Oh, satoe perkara loear biasa jang amat heibat dan ngeri. Apatah Sianseng tida denger ?"
„Tida sekali, kerna akoe poen baroe sampe."
„Ja, boleh djadi kaoe tida taoe, kerna Sian- 53 seng poen ada dateng dari tempat djaoe."
Boen Hwan-tjiang djadi kapingin taoe dan laloe menanja, perkara apa adanja itoe.
Kerna itoe waktoe hari telah malem dan dalem ini gredja soeda tida ada laen orang, maka Siansoe ini rasa, tida halangan boeat tjeritaken itoe perkara. Begitoelah ia lantas berkata:
„Prihal anak-anak jang lagi sedeng berlomba boeat dapetken kakoeasahan dalem kalangan pamerentahan, itoelah troesa ditjeritaken lagi. Dan apa jang akoe maoe toetoerken jalah pada baroe ini, koetika soldadoe-soldadoe dapetken satoe binatang jang mirip seperti oeler naga, dan binatang itoe laloe dikeset koelitnja dan dibikini dengdeng. Berbareng itoe, sigra djoega toeroen oedjan besar sampe toedjoe hari toedjoe malem, hingga saloeroe kota poenja soengei djadi meloewap dan aer telah naek sampe sapoeloe toembak lebi, hingga pendoedoek djadi dapet banjak kasoesahan."
„Hola! itoelah betoel-betoel menakoetin," kata Hoen Hwan-tjiang: kamoedian ?“
„Ada lagi satoe perkara gaib, jaitoe di waktoe menggerib sering orang dapet liat satoe binatang jang roepanja seperti andjing dan saban-saban binatang itoe soeka menerkam anak ketjil boeat didjadiken korban."
„Inilah bener-bener ada satoe perkara loear biasa." „Begitoe sadja belon soeda, hanja masi ada lagi perkara-perkara jang lebi gandjil dari itoe."
Atas pertanjahannja Boen Hwan-tjiang, kapala padri itoe toetoerken lebi djaoe, bagimana dalem kraton baginda, sering-sering ada kaliatan me- ringkoek satoe rase besar jang tida kataoean dari mana datengnja.
Djoega belon lama satoe toekang sajoer jang lagi mendjoealan di depan pintoe Swantekboen, mendadak telah djadi gila dan bertreak-treak seperti orang memaki, katanja: Thaytjouw Hongte dan Sintjong Honte telah kirim padanja boeat membri taoe pada baginda dan semoea pembesar, boeat memperbaeki kesalahannja.......
„Bener-bener heran sekali," kata Boen Hwan- tjiang dengen hati bergontjang: "apatalı itoe semoea kadjadian boekan ada soeatoe alamat apa- apa ?"
„Boleh djadi," kata Tjinkong Siansoe: ,tapi masi ada lagi soeatoe perkara jang terlebi heran dari itoe semoea."
Kamoedian Siansoe itoe tjeritaken, jang berbarengan di itoe waktoe djoega, ada satoe toekang boea orang lelaki telah hamil dan melahirken poetra. Sedeng istrinja toekang waroeng arak saorang she Tjoe, koenjoeng-koenjoeng toemboe koemis, dan brewok. Djenggot itoe pandjangnja ada kira-kira anam atawa toedjoe duim. Itoe perkara-perkara gaib ada terdjadi dengen beroentoen.
Blakangan satoe lelaki moeda, dengen tida taoe apa maksoednja soeda berpake satjara Tosoe prampoean. Samantara pada soeatoe malem bintang Thiankoseng jang lagi mamentjarken sinarnja berboenji begitoe keras, hingga ampir seperti goentoer dan kaloearnja dari kalangan Tjiwiwan; pandjangnja bintang itoe ada bebrapa toembak, mendjoeroes ka sebla Oetara dan melanggar pada kadoedoekannja Keizer, oedjoengnja menjapoe bagian Boentjiang.
Sasoedanja mendenger itoe semoea tjèrita, orang toea itoe djadi merasa bergidig. Kerna kadjadian itoe poen ada amat loear biasa.
Menoeroet doegahannja Tjinkong Siansoe, itoe semoea kadjadian gaib jang menoendjoeki roepanja, tentoe ada soeatoe alamat jang negri moesti alamken ini atawa itoe. Tapi kaloe sasoeatoe kadjadian itoe maoe dikata satoe alamat, soenggoe orang tida taoe ada brapa banjak kadjadian gandjil, heibat atawa ngeri, jang anak negri moesti menampak.
Sahabisnja tjerita-tjerita, masing-masing laloe masoek ka dalem kamar tidoer.
Besoknja pagi sasoeda tjoetji moeka dan toekar pakean, Hwan-tjiang laloe pergi ka gedongnja Ko Kioe, boeat minta itoe Thay-wie poenja per toeloengan dalem perkara jang kamaren ia madjoeken. Tapi ini pembesar kata: sekarang pamerenta agoeng lagi repot dalem oeroesan paperangan, hingga tida mempoenjai tempo boeat oeroes sagala perkara tektekbengek begitoe. Tapi boeat oeroesannja Boen Hwan-tjiang ia nanti soeroe sadja orangnja pergi ka kantoornja Kay Hong Hoe le boeat diberesken, maka hal itoe troesa diboeat koeatir.
Dengen hati legah Boen Hwan-tjiang mengoetjap trima kasi dan balik kombali ka gredja tempatnja menoempang.
........................................ ........................................
Pada waktoe paperangan brenti, pemerenta Tay- song telah bikin persariketan pada Kimkok dan tetepken satoe perdjandjian. Samantara Tjo Kie- kiong. bekas minister dari negri Liauw, soeda menaloek pada Kimkok, dengen prenta djoega sakalian rahajatnja pinda ka itoe negri.
Brapa besar kasoesahan dan kamelaratan jang rahajat negri Liauw rasaken, berhoeboeng dengen prentanja itoe pembesar, inilah tida oesah ditjeritaken. Orang-orang jang tida soeka tinggalken tana aernja, laloe pada minggat dengen tinggalken marika poenja anak dan isiri, hingga itoe waktoe banjak sekali orang-orang jang kailangan ajah dan soeami, dan ilang djoega barang miliknja.
Soeara tangis ada terdenger tida poetoesnja.
Dengen satoeroenja anak-anak negri jang boeron itoe pada berdami boeat pergi sadja ka kota Pengtjioe, aken minta pertoeloengannja pembesar di itoe kota, saorang bangsa Liauw aseli jang terkenal ada tjinta pada sasamanja bangsa. Lebi baek lari ka kota terseboet dari pinda ka laen negri.
Sigra djoega jang laen-laen djadi moefakat dan begitoelah itoe rahajat negri Liauw laloe berdjalan dengen tjepet, jang satelah sampe, marika laloe tjeritaken atas prentanja Tjo Kie-kiong jang soeroe marika pinda ka negri Kimkok, tapi iaorang berame tida soeka toeroet itoe prenta dan lantas boeron ka mari, dan achirnja minta pembesar di ini kota soeka trima kadatengannja.
Pembesar itoe ada bernama Thio Gak, satelah denger perkatahannja itoe anak negri jang djadi bangsanja, merasa amat terharoe.
Thio Gak prenta itoe semoea anak negri masoek ka dalem kota. Itoe hari djoega ia boeka persidangan dan berdami pada sakalian panglima-panglima dan pembesar sebla bawahannja, jang sasoedanja berkoempoel, ia lantas kasi taoe atas kadatengannja rahajat negri Liauw jang oleh Tjo Kie-kiong disoeróe pinda ka negri Kimkok. Perboeatannja itoe bekas minister Liauw jang sekarang telah menaloek pada Kimkok, soenggoe amat tida patoet, kata poela ia lebi djaoe, sedeng keadahan kota Pengtjioe sekarang masi boleh dibilang tegoe, kerna soldadoe dan ramsoen ada tjoekoep, panglima poen masi banjak,
„Akoe pikir, dengen mendjaga ini kota, haroes mendjaga djoega kaslamatannja rahajat," kata poela Thio Gak: „atas perboeatannja Tjo Kie-kiong jang begitoe tida bagoes, maka wadjiblah kadatengannja ini anak negri jang mendjadi kita poenja bangsa, dibri perlindoengan satjoekoepnja. Laen dari begitoe akoe ada pikir djoega boeat bangoenken poela kita poenja karadjahan Tay- liauw. Tapi sabelonnja dateng itoe tempo, akoe poenja pikiran hendak menaloek pada pamerenta Songtiauw, belon taoe bagimana kaoe sakalian poenja pikiran?"
Itoelah ada satoe perniatan jang baek dan bagoes," kata orang-orangnja:, maka kita-orang ada satoedjoe betoeldengen Tjoetjiang poenja perniatan" Kamoedian, dengen panglima-panglimanja Thio Gak berdami boeat tangkep itoe minister Liauw jang soeda berhianat pada laen negri dan membikin soesa pada rahajat sendiri. Kerna Tjo Kie-kiong itoe bakal liwat di ini kota, maka tida soesa boeat djebak padanja.
Begitoelah Thio Gak prenta orang toenggoe liwatnja itoe minister jang hendak berangkat kanegri Kimkok, sedeng roewangan boeat samboet datengnja itoe pembesar hianat soeda diriasken bagoes sekali.
Tida lama orang jang ditoenggoe itoe telah sampe di Pengtjioe, maka Thio Gak bersama bebrapa panglimanja laloe menjamboet dengen hormat dan silaken Tjo Kie-kiong itoe masoek kadalem roewangan jang soeda dihiasken netjis.
Itoe pembesar hianat, satelah liat begitoe, djadi amat girang dan dengen tida menampik laloe doedoek di tempat jang sabla atas.
„Apatah akoe poenja pahala, maka Tjoetjiang soeda begitoe perloe hormatin akoe sampe begini?“ kata Tjo Kie-kiong dengen roepa girang.
„Kerna kita-orang di sini ada perloe dengen Sinsiang poenja pembrian,“ kata Thio Gak: "bolehtah Sinsiang pindjemken akoe saroepa barang ?“
„Oh, tentoe sekali, kaloe sadja barang jang dikahendaki itoe ada kapoenjahankoe sendiri,“ djawab Tjo Kie-kiong dengen tida tjoeriga: katakenlah barang apa adanja itoe?“
„Ja, barang itoe ada kapoenjahanmoe sendiri, Sinsiang,“ kata Thio Gak sambil bersenjoem: „jang sabenernja boekan laen dari kaoe poenja kapala.“
Tjo Kie-kiong djadi terkedjoet, kerna itoe waktoe ia liat roepanja Thio Gak soeda djadi beroba, soeatoe tanda perkatahan jang di oetjapken paling blakang itoe boekannja omongan memaen.
Sabelonnja minister hianat itoe menjaoet, Thio Gak soeda berkata poela:
„Maski kaoe tida kasi, akoe toch moesti ambil djoega, kerna akoe ada perloe dengen kaoe poenja kapala, jang hendak dikirim sabagi barang anteran.“
Sambil kata begitoe ia tjaboet pedangnja, hingga Tjo Kie-kiong jang memang tida bersedia, djadi amat kaget dan kadoea kakinja mendjadi lemas, hingga ia lantas djato di depannja pembesar kota Pengtjioe.
„Maski kaoe briken kapalamoe, toch masi belon tjoekoep boeat kaoe teboes itoe kadosahan,“ kata Thio Gak sambil menoeding: „ah, sajang sekali radja Liauw soeda serahken kakoeasahan dan kabesaran padamoe, orang jang tida mengenal kawadjiban.“
Tjo Kie-kiong tida menjaoet, saloeroe badannja djadi bergoemeter.
„Boekantah kaoe taoe, jang negri Liauw masi ada banjak soldadoe dan panglima boeat melawan moesoe, sedeng ramsoem poen sampe tjoekoep,“ kata poela itoe Tjoetjiang: „mangapatah satelah moesoe dateng, kaoe lantas sadja boeka pintoe kota boeat menaloek dan djoeal ini negri pada radja Kimkok, aken goena kasenanganmoe sendiri, hingga tida pikir bagimana soesanja rahajat“ Lebi djaoe Thio Gak oendjoek bagimana itoe bariboe-riboe rahajat jang disoeroe pinda ka Kim kok telah lari ka ini kota, dan marika itoe ada mananggoeng kasangsarahan jang heibat. Kerna dengen Tjo Kin-kiong poenja perboeatan hianat, anak negri djadi kailangan harta banda dan familie. Maka boeat itoe kadosahan, tida boleh tida kapalanja moesti diambil.
Panglima-panglima jang ada berdiri di sitoe, lantas bertreak:
„Boeat satoe kapalanja Tjo Kie-kiong tida ada sampe tjoekoep aken teboes kasalahannja jang begitoe besar, maka baeklah kita-orang keset sadja koelitnja dan tjingtjang toeboehnja, soepaja sabelonnja mati, ia bisa merasaken doeloe bagimana sakitnja Dengen begitoe, rahajat negri poen toeroet merasa poewas!“
Laen fihak menjataken kabenerannja, dan itoe bekas minister jang sekarang taoe dirinja telah kadjebak, tida bisa berboeat laen dari pada minta-minta diampoenin, dengen kasi alesan, bagimana ia tida menaloek, kerna moesoe poenja kakoeatan ada melebiken dari Liauw poenja tenaga. ― Tegesnja ia tjoba bikin pembelahan boeat koerangi amaranja itoe Tjoetjiang dan laen-laen panglima.
Tapi maski apa djoega ia kata, orang tida ladenin. Thio Gak laloe membri satoe tanda, jang itoe waktoe djoega lantas dateng lima soldadoe jang memang telah menoeggoe prenta, dengen membawa tali hampirken padanja.
Itoe pembesar hianat djadi bergoemeter dan memandang sakoeliling tempat boeat tjari djalanan lari Tapi sabelonnja dapetken itoe, badannja soeda teriket dan diseret kaloear.
Itoe lima soldadoe lantas djalanken hoekoeman atas dirinja itoe penghianat negri. Dalem tempo sabentaran saija badannja Tjo Kie-kiong djadi bebrapa potong, dan anak negri jang menjaksiken itoe, merasa poewas hati.
Sasoeda pembesar itoe dihoekoem mati, Thio Gak laloe prenta orang toelis satoe soerat menaloek dan anterken itoe pada Tong Koan.
Tatkala itoe djoestroe Tong Koan lagi sedeng berhimpoen pada sakalian ambtenaar-ambtenaar sabawahannja. Satelah denger Thio Gak ada kirim oetoesan boeat serahken soerat menaloek, hatinja djadi amat girang dan prenta oetoesan itoe dateng mengadep.
Orang jang diprenta bawa itoe soerat adalah Lie Pek, jang sasoedanja membri hormat laloe serahken taloeknja ia poenja Tjoetjiang, dimana sahabisnja membatja, Tong Koan itoe berkata
„Thio Tjiangkoen hendak menaloek dengen serahken kota Pengtjioe, tentoe sadja moesti di trima dengen tangan terboeka. Dengen adanja itoe kota, kita bisa kasi djoega perlindoengan pada tana-tana Janhoen boeat djaga bahaja diri Kimkok,“
Tapi Song Tjiauw jang berpangkat Tjosi Long-tiong, satelah denger begitoe lantas kasi pikiran djangan Tong Koan berlakoe gegaba, sebab dengen trima menaloeknja Thio Gak, bisa menimboelken boentoet jang tida enak di kamoedian hari.
„Bagimana, boleh begitoe ?“ tanja Tong Koan. Song Tjiauw kasi taoe: dengen bersariket pada Kimkok aken poekoel negri Liauw, itoe ada satoe perboeatan melempar tetangga, pergi ambil srigala diboeat kawan. Tapi lantaran itoe perkara soeda kadjadian dan contrak jang terteeken tida bisa diroba lagi, maka apa-boleh-boeat.
Tapi sekarang sasoedanja ada perdamian pada Kimkok, kaloe taloeknja pembesar Pengtjioe ditrima, tentoe bisa menerbitken perselisihan pada itoe negri, maka hal ini haroes dipikir lebi djaoe.
Mendenger ini perkatahan, Tong Koan djadi tida senang. Maka dengen moerka ia laloe petjat djabatannja itoe ambtenaar. Kamoedian dengen menoeroet kamaoean sendiri ia sendiri ia lantas trima menaloeknja Thio Gak.
Satoe soerat laloe dikirim ka kota Radja boeat membri taoe pada Sri Baginda, jang satelah meliat rapportnja Tong Koan, djadi amat girang. Baginda laloe kaloearken firman, dalem mana ada dinjataken aken trima menaloeknja pembesar kota Pengtjioe, sedeng Thio Gak diangkat djadi Tjengtang Tjiangkoen, dengen digandjarken mas dan soetra berkembang. Sedeng laen-laen panglima pembantoenja, diangkat ka djabatan jang lebi tinggi satoe tingkat.
Thio Gak dengen sakalian panglimanja, satelah denger boenjinja itoe firman, lantas mengoetjap trima kasi pada baginda dan itoe hari djoega benderanja kota Pengtjioe lantas diganti dengen bendera merk Songtiauw.
Ini perkara menaloek tida lama kamoedian telah sampe ka negri Kimkok, hingga membikin Kim Tjoe jang denger ini kabar, djadi amat goesar.
Ini radja laloe prenta Kan Li-poet bawa doeapoeloe riboe soldadoe pergi ka kota Pengtjioe, prenta mana laloe didjalanken dengen sigra.
Satelah sampe di itoe tempat, Kan Li-poet laloe bikin penjerangan heibat. Kerna tentara Kimkok ada sanget gaga dan berperang dengen tida mengenal tjape, maka sasoedanja melawan brapa hari dan tarnjata tida bisa moendoerin angkatan perangnja moesoe, Thio Gak rasa ia tida sanggoep lindoengken lebi lama ini kota, maka pada soeatoe malem, dengen diam-diam ia laloe adjak kadoea anaknja bersama sakalian familie berangkat ka tempatnja Tong Koan. Kerna itoe kota soeda tida ada kapalanja, maka waktoe diserang lagi sakali, sigra djoega Pengtjioe terdjato dalem tangannja itoe panglima dari Kimkok, kamoedian Kan Li-poet bikin pengedjeran lebi djaoe pada moesoe jang merat.
Koetika sampe, Kan Li-poet laloe berdiriken tangsi dan prenta soldadoenja madjoe ka depan sambil bertreak-treak, boeat minta Tong Koan lekas serahken itoe panglima Liauw jang boeron, kaloe tida maoe jang ini kota dipoekoel petja.
Djoega dengen soeara mengantjem dan kalakoean keren, Kan Li-poet kasi bangkitan pada Tong Koan, jang dengen menerima taloeknja kota Pengtjioe, Songtiauw soeda bikin renggang persarikatannja pada Kimkok.
Mendenger itoe antjeman, Tong Koan djadi amat kaget dan dengen tergoepoe-goepoe ia laloe prenta orang boenoe Thio Gak bersama doea anaknja, kamoedian ini tiga kapala disoeroe anteri ka pasanggrahannja orang Kimkok.
Dengen berlakoe begitoe, Tong Koan djadi oendjoek pengetjoetnja. Sedeng Songtiauw poen djadi koerang pamoernja, kerna soeatoe tanda ini negri besar ada takoet pada Kimkok.
Ah, soenggoe apes betoel keadahannja ini negri, jang doeloe di waktoe masi Baginda Keizer Song Tay-tjouw ada begitoe angker dan keren, sekarang satelah karadjahan itoe toeroen pada anak tjoetjoenja, djadi kaliatan begitoe lemah.
Tapi Kan Li-poet belon merasa poewas dengen menerima itoe kapala, hanja ia kapingin soepaja Tong Koan sendiri dateng padanja dengen hatoerken maäf. Tapi Tong Koan jang meliat keangkerannja moesoe, djadi keder. Kamoedian berangkat ka kota Radja.
Tatkala itoe Kwe Yok-soe ada pegang kakoeasahan di atas tigapoeloe riboe djiwa balatentara, satelah denger itoe kadjadian laloe berpikir:
„Hm, itoe Kan Li-poet njatalah ada satoe panglima jang gaga perkasa Sakali poekoel sadja Pengtjioe lantas terdjato dalem tangannja. Begitoe ia minta kapalanja itoe orang taloekan, begitoe lantas diserahken. ― Dan kaloe kamoedian ia minta djoega akoe poenja kapala, manatah tida dibriken ?“
Kerna koeatir nanti terdjadi begitoe roepa, maka dengen tjepet ia ambil poetoesan boeat menaloek sadja pada Kimkok, dengen begitoe dirinja bisa terloepoet dari bahaja.
Sigra djoega ia bawa itoe sakalian tentara jang ada dalem pegangannja dan pergi menaloek, kadatengan mana ditrima oleh itoe panglima Kim dengen senang, jang kamoedian lantas toelis soerat pada Kim Tjoe, aken kasi taoe jang kota Pengtjioe soeda dapet diambil dan Kwe Yok-soe telah menaloek padanja. Radja Kimkok jang denger ini kabar djadi amat girang. Dan dari itoe negri lantas dikirim lagi saratoes riboe balatentara boeat poekoel Tiong-goan, dengen alesan jang pamerenta Songtiauw soeda berlakoe tjoerang.
Ini angkatan jang blakangan ada dikapalaken oleh Nam Mo-wat, sedeng Kwe Yok-soe jang menaloek, oleh Kan Li-poet didjadiken barisan pengoendjoek djalan.
Sigra djoega itoe perkara-perkara telah sampe di koepingnja baginda, jang satelah denger itoe djadi amat. bingoeng dan katakoetan. Baginda tida taoe bagimana moesti berboeat, maka sigra djoega dikoempoelken sakalian ambtenaar besar dan ketjil boeat berdami.
Mantri-mantri jang berhadlir semoea ampir boleh bilang ada kawanan dorna, jang tjoema perloeken sadja kaoentoengan dan kasenangan boeat diri sendiri. Sedeng pikiran boeat membela negri, tida ada sama sekali. Ada mantri jang djoedjoer dan loewas peng atahoean tapi kala soeara.
Waktoe Sri Baginda bikin permoesjawaratan dalem sidang mantri, banjak ambtenaar besar laloe madjoeken voorstel ini dan itoe, boeat menoelak datengnja moesoe. Tapi jang paling gila adalah itoe voorstel boeat Keizer Song toeroen dari tachta karadjahannja, sedeng boeat penggantinja dioendjoek poetra makota. Kerna dalem ini voorstel ada diberikoeti djoega alesan ini dan itoe, hingga baginda djadi satoedjoe.
Begitoelah persidangan laloe ditoetoep dan oepatjara boeat mengangkat Keizer baroe lantas disadiaken. Hari jang baek boeat poetra makota naek ka atas singgasana laloe ditjari, dan kamoedian dikasi taoe pada itoe djoengdjoengan.
Koetika hari jang ditetepken itoe sampe, sigra djoega oepatjara kamoeliahan laloe didjalanken. Hong Taytjoe laloe diangkat djadi Keizer jang mamerenta itoe negri dan baginda toea diangkat djadi Thaysiang Hongte dan bertempat di astana Liongtekkiong.
Keizer jang baroe ada bergelar Song Kim-tjong, nama taon diroba djadi Tjeng Kong Gwan Lian (dan menoeroet itoengan Masehi terdjato kira-kira taon 1126, atawa 786 taon sabelonnja berdiri Republiek Tiongkok). Kamoedian Sri Djoeng-djoengan laloe angkat Lie Kong djadi Pengpouw Silong, dengen berkoeasa pada sapoeloe tangsi poenja balatentara berkoeda dan sakalian officier-officiernja.
Kamoedian titah itoe sakalian Tjihoeisi (officier-officier atawa panglima) masing-masing membawa doeariboe balatentara boeat mendjaga di tempat-tempat penting dalem bilangan Leeyang, kerna dikoeatir pasoekan Thaykimkok nanti menjerang dengen ambil djalan dari soengei Hongho.
Demikianlah lantaran trima menaloeknja Thio Gak jang menjeraken kota Pengtjioe, persariketan antara Songtiauw dengen negri Kimkok djadi renggang, hingga paperangan poen lantas moelai oendjoek kombali roepanja. Tjoba kaloe itoe waktoe Tong Koan toeroet sadja perkatahannja Song Tjiauw, jang membri advies djangan trima taloeknja moesoe, tentoe perkara tida enak jang samatjem ini, tida tertampak.
Tapi perkara soeda kadjadian, apatah maoe dibikin?