Liauw Tjay.
301
Lie Tian Tjo dengar itoe pengomongan, djadi terpoekoel dia poenja diri inget jang dia poenja perkara, dalem hatinja mendjadi sedi inget sampe dia poenja aer mata melele, Pouw Seng menanja: Lo Heng apa sebab bole djadi begitoe sedi dengar saja poenja pengomongan.
Begitoe djoega Lie Tian Tjo lantas bilang satoe persatoe dia poenja hal, jang dia poenja praoe terbalik poenja perkara, kerna sebab itoe di inget mendjadi sedi.
Lantas Pouw Seng sahoetin berkata: sobat sampe begini poenja moera hati dan tebel poenja Tek Heng, masa diatas langit tiada pajoengin, seperti sobat boekan orang jang poetoes toeroenan poenja manoesia, barang kali djoega ada orang jang toeloengin belon bole tane, sehabis lantas saling menanja Gemoer ada sama-sama 51 taoen (tangui) poenja oemoer, lantas Lie Tian Tjo berkata: ia kita sama-sama jang soedah terbilangan setengah ratoes lebi poenja orang, dan jang soedah kita poenja perdjalanan semoea kita soedah kataboei, melainkan nanti di blakangkali apa jang kita bole boeat pengharepan, dengan sebab kita soedah tiada ada poenja toeroenan, dan berlaksa perkara soedah mendjadi dingin, belon taoe nanti di blakang kita poenja hari toewa, ada siapa jang bole toeloeng rawatin.
Pouw Seng berkata: Lo Heng ada sa-orang jang besar poenja redjaki masi bole di boeat pengharepan, djika Lo Heng kombali maoe samboeng piara bini lagi, jang tentoe masi bole dapet anak, kaloe boeat seperti saija, jang sebagini poenja oemoer, dengan badan sebatang karang mentjok sana kemari belon tentoe dia poenja tempat, ini hari saja bisa sampe disini, melainkan boeat harep toekaran badjoe dan souwhwi makan, laen saija tinda ada poenja pikiran lagi, asal bole liwat hari soedali bae.
Lie Tian Tjo tengok ini Pouw Seng poenja pengomongan bisa dan pinter, djadi itoe dia kesian maoe adjak sama-sama bocat teman lantas dia berkata: kaloe sobat sampe begitoe soesa, tiada bisa dapet kelebihan, akoe memang tiada orang jang bole di boeat teman, lebi bae bole tinggal sama-sama saija sadja disini, kita bole siang malem mengomong boeat liboerin hati.
Pouw Seng dengar Lie Tian Tjo kata begitoe djadi girang dan merasa enak di dalem hati, kerna siapa lah tiada mendjadi girang, lantas ia manggoet dia poenja kepala sembari boeka soewara dan berkata: trima kasi Lo Heng (soedara toewa) jang sampe begitoe tjinta pada saija, begitoe djoega pergi ambil dia poenja pauwhok bawa datang akan mondok sama-sama satoe tempat, dia berdoea pagi sore doedoek minoem bersama-sama mendjadi akoer seperti kaija soedara, apa djoega perkara di adjak berdami sama-sama, begitoe dengan begitoe sampe liwat satoe taoen lebi, kaget dapet kabar orang bilang di Souw Tjioe minjak tangijoe ada naik harga, dia poenja modal di dalem 600 tahil perak bole di djoeal sampe 1000 tahil perak lebi, dan dia pikirin maoe sampe di bilangan Boe Houw boeat pergi moewat, jang setingalnja separo itoe minjak boeat pergi keloear djoeal, tiada doega dia poenja orang Lie Koei mendapet sakit berat tiada bisa pergi, dia sendiri inget maoe boeat pergi salempang pergi poelang djalanan keliwat djaoe, dari itoe lantas dia adjakin Pouw Seng berdami dan berkata: ia kapan bole dapet satoe orang jang pergi bakal liat ada bae.
