292
Liauw Tjay.
Sin Tjioe Hoe, nama Lie Tian Tjo, maka dia itoe ada terlaloe baik sekali
serta moerah hatinja, dan dari moeda Lie Tian Tjo soeka pergi berdagang
di laen tempat aken mentjari kaoentoengan, sampe oemoernja tiga poeloe
tahon lebi telah mendapet oentoeng beriboe oewang mas. Tetapi antero
hari hatinja kesel kerna dia pikirin kapengen dapet satoe anak lelaki.
Maka adalah satoe orang sobat handenja jang soeka dateng boedjoekin
pada Lie Tian Tjo sembari berkata: oentoeng oewang sama dapat satoe
anak lelaki tiada boli disamain, djika oewang asal maoe berkoewat mentjari oentoeng soedah tentoe bole dapet, kaloe anak itoe memang peroentoengan kita tiada misti dapet, biar piara tiga ataoe ampat istri, djoega
pertjoema sadja, sekarang melainkan kita misti berboeat hati jang baik,
bakal nanti diatas bole trima apa jang kita poenja permintaan ataoe kita
poenja niat didalem hati, maka bolelah kita berharap jang Toehan nanti
kaboelken atas permintaan kita itoe.
Lie Tian Tjo mendengar pengomangan sobatnja itoe laloe berpikir jang itoe sobat poenja bitjara ada betoel, maka dari sebab itoe lantas dia soeka beramal dan toeloeng orang kasoesahan serta tiada saijang oewang.
Tiada lama lagi betoel istrinja orang she Hin djadi hamil, maka Lie Tian Tjo itoe amat soeka hatinja laloe bersoedjoet bagi Toehan jang Mahakoewasa pada siang hari malem, aken soepaija di brieken anak lelaki.
Maka sampe pada koetika jang baik, laloe istrinja itoe bersalin saorang anak lelaki dengan tjakap moekanja serta alisnja itam dan bidji matanja djeli. Lie Tian Tjo meliat jang istrinja beranak letaki, maka iapoen mendjadi girang dan soeka hati, lantas anaknja itoe dikasi nama Lie Tjoen Eng.
Maka Lie Tjoen Eng itoe sampe oemoer delapan tahon lantas di kasi taktje sama satoe senseh jang pinter.
Istrinja Lie Tian Tjo itoe amat saijang pada anaknja, maka sampe anaknja beroemoer 14 tahon tiada di kasi pergi taktje lagi, laloe di soeroeh berladjar di roemah sahadja. Tiada brapa lama istrinja Lie Tian Tjo itoe ada mendapet sakit keras laloe maninggal doenia.
Lie Tian Tjo sahabisnja dia poenja istri maninggal doenia, saban dia pergi berdagang soedah tentoe diadjak anaknja itoe kerna dia tiada tega hati aken tinggalken anaknja di roemah sendiri, lagipoen soepaija anak itoe bole mengarti dari hal berdagang itoe.
Satoe sobat telab boedjoek pada Lie Tian Tjo aken kawin lagi, maka Lie Tian Tjo poenja pikiran, jang djikaloe dia kawin lagi barangkali nanti bole dapet soesah, kerna mah kwalon kabanjakan jang tiada sajang sama anak kwalon, dari sebab itoe djadilah dia tiada maoe kawin lagi.
Pada koetika Lie Tian Tjo oemoernja soedah 51 tahon dan anakuja oemoer 18 tahon, maka dia poenja dagangan ada madjoe sadja dan dapet oentoeng banjak, djoega dia pergi di bilangan Houw Lam soedali belie bebrapa banjak minjak tangijoe dan maoe bawa pergi ka bilangan Boe Houw boeat djoeal disana, serta sekalian dia maoe troes balik poelang ka roemahnja, dari itoe barang-barang sama dia poenja minjak di moeatken ka dalem laen praoe besar dan di soeroeh orangnja nama Lie Koei boeat ikoet dan djaga barang-barangnja itoe.
