— 1630 —
panggil itoe orang moeda dan adjak masoek ka dalem astana.
Samentara itoe Hauw Kiong Taijkam dateng mendjoera di hadepan Baginda dan mengasi taoe: Kok Bo Nio-Nio minta bertemoe sama Peng Pak Taij Goanswe, kerna katanja itoe Iboe-soeri merasa sanget heran Peng Pak Taij Goanswe ada saorang prempoean.
Baginda loeloesken itoe perminta'an dan prenta Bong Loan ikoet masoek ka dalem kraton.
Tiada lama orang jang diprenta panggil Kou Kongtjoe soeda balik kombali dengen mengadjak itoe orang moeda, jang sigra membri hormat dengen berloetoet. Baginda merasa girang sekali meliat sikep dan kelakoeannja itoe pamoeda, maka padanja lantas dibriken pangkat Han Lim serta dikasi slamet dengen tiga tjawan arak.
Kou Tjan bilang trima kasi.
Koetika itoe orang moeda permisi berlaloe, pengawal astana dateng membri lapor, Peng Lam Taij Goanswe menoenggoe Baginda poenja panggilan.
Di itoe waktoe Baginda kaliatan ada dioeroeki dengen kasenangan hati jang tiada terhingga, kerna koetika Tjo Kongtjoe soeda dateng mengadep ia dapet kenjata'an, bahoea itoe kapala prang soeda beroleh kamenangan dan soeda beresken kekaloetan jang terbit di sebla Selatan,
