— 1631 —
serta soeda sapoe bikin bresi itoe kawanan pendjahat di goenoeng Yauw Taij. Lebi djaoe itoe orang moeda lantas seraken boekoe Kong Lo Pouw, berikoet djoega soeratnja Kioe Tjianswe, dalem mana ada ditoelis prihal djasanja Ko Teng Tjan, dan minta Baginda Keizer poenja pertimbangan atas dirinja itoe orang bangsawan, jang sebenernja tiada mempoenjai sala satoe apa.
"Kami merasa girang sekali Keng soeda dapet bikin aman keada'an di Kang Lam," kata Baginda pada Tjo Goanswe. „Dari hal Ko Teng Tjan berdosa soeda dapet hoekoeman, itoelah kami soeda dapet ketrangan tjoekoep. Kami djoega baroe hendak toelis soerat boeat ambil ia poelang dari Leng Lam, serta seraken poela ia poenja djabatan jang lama. Sekarang Keng moendoer doeloe dan silaken mengaso sampe hari esok, di mana kami nanti anoegraken pangkat pada orang-orang jang berdjasah."
Tjo Goanswe membilang trima kasi dan sigra moendoer.
Baginda lantas prenta sala satoe pembesar astana, pergi panggil Ko Kong masoek dan berdjoempa padanja. Begitoe djoega itoe orang bangsawan soeda dateng berdjoempa dengen mengoetjoer aer mata.
Sri Baginda dapet kenjata'an, keada'annja itoe panglima soeda djadi begitoe toea: moekanja
