— 1619 —
„Boeat dapet itoe kamoeli'an, inilah sama sekali akoe tiada inginken," saoet Joe Siotjia sambil gojang kapala, „akoe tjinta Kou Kongtjoe dari masi ketjil, masing-masing soeda berdjandji mati-idoep aken mendjadi swami istri, maka tjara begimana akoe brani melanggar perdjandjian, dan bikin ilang kapertjaja'an sendiri. Sekarang begini sadja, baeklah anterken akoe kaloear dari ini tempat, soepaja akoe bisa poelang kombali ka tempat di mana akoe ada tinggal."
Satelah denger begitoe, maoe tiada maoe dalem hatinja Bong Loan mamoedji, bahoea sasoenggoenja Joe Siotjia itoe ada saorang jang berhati toeloes dan soetji.
„Djikaloe Nio Tjoe tiada soeka menoeroet, akoe poen tiada aken memaksa," kata ia, „tapi toeroet akoe poenja pengliatan dari pada kau moesti toempangken diri dalem roemanja sembarangan orang, ada lebi baek toeroet padakoe pergi ka kota radja, di mana akoe nanti berdaja oepaja boeat ketemoeken kau poenja Kou Kongtjoe."
„Trima kasi atas Taij Djin ampoenja niatan jang begitoe moelia," saoet Joe Si. „Akoe soeda mengambil satoe poetoesan jang tiada dapet di roba lagi. Akoe tiada nanti seraken diri pada laen orang, selaennja pada akoe poenja toendangan jang sedjati, seande akoe tiada bisa bertemoe kombali padanja, dengen segala senang hati
