— 1606 —
Dari masi djaoe Tjhia Si soeda berloetoet dengen tangisnja.
Atas pertanja'annja Tek Lo Ya, satoè persatoe Tjhia Si lantas kasi denger pengadoeannja, kamodian ia seraken djoega soerat kelakan jang di ditoelis olehnja sendiri, dalem mana ada ditoetoerken tentang Bauw Si dan Joe Kong poenja perboeatan-perboeatan binatang, dan laen-laen lagi jang berhoeboeng dengen oeroesan itoe.
Tek Lo Ya sasoedanja batja itoe soerat lantas berpaling pada Goanswe seraja berkata: "Menilik pengadoean dalem ini soerat, sasoenggoenja ini oeroesan kita orang tiada boleh tinggal diam, maka dari itoe begimana dengen Goanswe ampoenja pikiran?"
,,Djikaloe Lo Ya rasa ada sampe tjoekoep aken ditoentoet, patoetlah hal itoe moesti lantas dioeroes begimana moestinja," saoet Bong Loan. Lagi toeroet akoe poenja pengliatan, itoe perboeatan ada melanggar kasopanan dan meroesakin orang poenja oeroesan roema tangga, maka haroeslah dipreksa dengen terang, soepaja siapa jang bersala di kasi hoekoeman pantes bagi perboeatannja."
Sebab dalem itoe soerat pengadoean ada di toelis djoega namanja Peng Pak Taij Goanswe, maka Tek Loija minta itoe kepala prang soeka ambil taoe djoega itoe oeroesan.
