— 1605 —
Kombali Bong Loan oetjapken perkata'an-perkata'an jang merendaken dirinja.
Selagi itoe doea orang doedoek beromong- omong, mendadak di loear kadengeran swara orang menangis, hingga bikin Tek Lo Ya djadi kaget.
„Orang apa itoe?" begitoe ia lantas menanja.
Sabelonnja Bong Loan menerangken apa-apa satoe pengawal pintoe masoek membri taoe, bahoea di loear ada saorang prempoean setenga toea jang katanja hendak minta keadilan atas perboeatan saorang laen jang soeda berboeat perkara jang tiada pantes atas dirinja dan ia poenja swami. Maka dari itoe ia maoe mengadep sama Goanswe dan Tek Lo Ya, soepaja itoe perkara bisa diberesken dan orang jang bersala dapet hoekoeman.
Bong Loan lantas mengarti bahoea orang prempoean itoe Tjhia Si sendiri, maka ia lantas prenta pengawalnja silaken ia masoek ka dalem.
Tiada lama itoe njonja soeda dateng mengadep, di mana ia dapetken Tek Lo Ya lagi doedoek berdoea sama itoe kapala prang. Ia dapet kenjata'an, pamoeda jang kemaran beromong- omong padanja sekarang ada berpakean dienst dan roepanja begitoe angker, laen sekali seperti lagi kemaren, di waktoe mana ia tjoema berpakean particulair sadja.
