— 1548 —
djadi goesar atawa djatoken hoekoeman bila soeda membatja soeratnja itoe."
Seabisnja kata begitoe Poet Hoa rogo sakoenja dari mana ia kloearken soerat tadi, dan kasiken itoe pada Pak An Ong.
Ini radja asing lantas preksa dan batja itoe soerat, dalem mana ada tertoelis seperti berikoet:—
Di persembahken
Kahadepan Baginda Pak An Ong
jang termoelia.
Dengen segala hormat hamba membri taoe, dari hal Baginda dan Permisoeri ampoenja boedi besar jang hamba telah trima selama
tinggal di dalem astana, itoelah haroes diseboet satoe pertoeloengan jang sanget berharga, jang hamba belon pèrna alamken. Tapi di sini maoe di terangken, hamba ini sabenernja boekan orang prempoean, hanja sa-orang lelaki, jang lantaran mendapet kasoesahan telah terloenta-loenta. Djoega boekan
kaoem familie Bong jang sebagimana hamba telah bilang; hamba poenja she dan nama jang sedjati jailoe Kou Tjan alias In Liong, poetranja Kou Han Lim di Djin Ho Koan.
Hamba menampak banjak kasoesahan ada lantaran perboeatannja iboe tiri jang doerhaka, sama siapa hamba senantiasa ada inget aken bikin pembalesan. Djoega soeda
