— 1467 —
dari laen-laen kawannja, tapi biar begimana maksoed itoe tiada dapet di sampeken, dan saban²
marika kena di bikin moendoer dengen karoesakan besar, kerna tentara negri dari atas kota
goenaken balok, batoe-batoe besar timpa padanja.
Pada satoe hari, selagi itoe ponggawa doedoek di pasanggrahannja lagi pikirin begimana ia moesti bikin penjerangan jang bisa membri asil, koenjoeng-koenjoeng satoe soldadoe dateng membri kabar, bahoea tentara negri soeda dapet bantoean dari kota radja. Djoega itoe soldadoe kasi taoe dari satoe djoeroesan ada mendatengin satoe angkatan prang jang hendak menjerang padanja.
Mendenger begitoe tiada tempo lagi Wa Dji Tjeng sigra berpake-pake, kamodian dengen mengepalaken tiga riboe soldadoe teroes kaloear dari dalem pasanggrahannja.
la liat bener ada satoe panglima prang negri lagi mendatengin, bersama sadjoembla barisan dan gerobak-gerobak. Ini kepala prang asing merasa sanget heran koetika liat moesoe dateng dengen itoe gerobak-gerobak, tapi kamodian ia pikir, berhoeboeng sama itoe tentoe djoega moesoe ada mengandoeng apa-apa.
Barisan jang menjerang ka pintoe sebla Selatan jalah Ouw-jan Peng.
Tiada lama ka doea fihak soeda berhadepan satoe sama laen, Wa Dji Tjeng madjoeken koe-
