— 1411 —
Sioe Tji seraja berkata: „Sekarang akoe inget, ini orang boekantah Si gagoe?..... tapi, eh nanti doeloe akoe kwatir keliroe! Kenapa orang gagoe bisa mengomong!“
Sioe Tji tertawa.
„Semoea tiada sala!“ kata Ko Kong, jang sateroesnja lantas tjeritaken begimana di dalem pesta ia soeda dapet bertemoe pada poetranja, begimana lantaran makan pil jang moestadjab Sioe Tji djadi bisa bitjara dan laen laen hal jang terdjadi di waktoe tadi.
„Adjaib!“ treak Nio Si dengen sanget gegetoen. „Di sini sasoenggoe ternjata, bahoea Allah selaloe melindoengken pada machloeknja jang berhati baek.“
Sebaliknja The Koen lantas tjeritaken Bong Loan soeda dapet pangkat Goanswe, dan sedeng memaloemken prang ka Oetara, serta kasi taoe djoega, bahoea dalem bebrapa hari lagi Ko Kong dan ia orang semoea aken poelang ka kota radja. Ini hal teroetama mengirangken sanget hatinja Nio Si.
„Oh, soenggoe kliroe kaloe orang bilang, anak prampoean tiada bisa menoeloeng pada orang toea!“ kata Nio Si. Seperti apa jang terdjadi atas dirinja akoe poenja nona, sasoenggoenja hal itoe aken mengasi satoe Hikajat bagoes dan haroes terpoedji!“
