— 1330 —
„Oh, begitoe!" kata itoe empe toea. Tapi toeroet akoe poenja pikiran, boeat oeroesan jang begitoe ketjil tiada tjoekoep aken nona mengambil poetoesan mati, dirimoe masi begitoe moeda, djoega parasmoe tiada haroes di tjela, soenggoe sajang sakali kaloe kau binasa dalem keada'an begini. Sekarang paling baek kau toeroet sadja akoe pergi ka kota radja: akoe bikin kau sebagi akoe poenja anak, nanti pelahan-pelahan boleh tjari di mana adanja kau poenja soedara. Begimana, apa kau soeka atawa tiada?"
„Djika Lo-pe ada begitoe moera hati, soeda tentoe itoe perminta'an akoe trima dengen segala soeka hati," saoet Yauw Sian dengen sanget girang. Itoe orang toea sigra pegang tangannja itoe gadis, naekin di atas kreta, doedoek bersama-sama istrinja.
Siapa adanja itoe orang jang soeda menoeloeng pada Wie Siotjia? la itoe boekan laen, jalah Gak Loija dari Lioe Hong Tjhung.
Ini bekas pembesar ada dalem perdjalanan ka kota radja, aken menengokin ia poenja adé, jang soeda beroleh pangkat Kong Pouw Siangsi. Kereta tadi ada moeat ia poenja anak dan istri.
