— 1329 —
Tapi dasar itoe gadis belon peroentoengannja maoe mati, mendadak itoe waktoe dateng bebrapa blas orang berkoeda, dengen mengiringken satoe kreta besar, dalem mana ada moeat bebrapa orang.
Marika sigra dapet liat perboeatannja Yauw Sian itoe, maka dengen lekas ia orang laloe membri pertoeloengan.
Beroentoeng Yauw Sian belon poetoes djiwa, tapi tiada oeroeng ia soeda djadi pangsan, sedari orang toeroenken sampe lama baroe ia sedar kombali.
la merasa sanget heran meliat ada orang banjak di sitoe, ia tiada taoe siapa jang soeda menoeloeng, djoega tiada taoe sama siapa haroes oetjapken parkata'an trima kasi.
Tiba-tiba lagi bengong memandang pada itoe orang banjak, saorang lelaki toea jang dari tadi tjoema meliatin sadja dari atas kretanja, itoe waktoe lantas toeroen menghamperi.
„Angkau orang dari mana, nona?" begitoe ia mananja. „Dari sebab apa maka kau ambil poetoesan nekat begini roepa?
„Akoe orang dari Tjiauw Boen Koan, she Wie nama Yauw Sian," saoet jang di tanja. „Jang membikin akoe ambil poetoesan nekat, inilah di sebabken akoe soeda poetoes harepan; akoe idoep sebatang karang, ada satoe soedara lelaki, jang piara akoe dari ketjil, sekarang telah tinggalken akoe dan tiada ketaoean di mana adanja."
