— 1318 —
poetjet. Sekali poen kita aken terloepoet dari ini bahaja, tapi laen bahaja jang lebi keras aken dateng menerdjang! Goedang padi telah ambles, isinja telah anjoet!"
Soen Nio tiada bisa berkata-kata selaennja mengoeroet dada.
Beroentoen tiga hari lamanja itoe bahaja bandjir telah menjerang dengen heibat sekali, dan sampe di itoe waktoe aer masi tinggal seperti pada bebrapa hari jang soeda. Ini katjilaka'an kita tjoema meloekisken di pemandangan satoe fihak sadja, sadeng kaloe maoe di tjari taoe pada tempat-tempat laen jang berdamping dengen kampoeng Kie Lin Tjoan, tentoe tiada koerang djoemblanja orang jang soeda kena mendjadi korban.
Pada hari jang keampat Hong Dji toeroen dari atas loteng, ia melongok ka loear, di mana sigra ia dapet liat doea peti mengambang di moeka aer, roepanja, itoe peti anjoet dari laen tempat dan sampe di sitoe,
Hong Dji jang berhati temaha meliat begitoe djadi sanget girang, dan doega itoe peti tentoe djoega ada berisi oewang. Ia lantas boeroe-boeroe naek ka atas loteng panggil Djimpo, sama siapa ia kata; „Kaloe kita maoe beroentoeng ini sekali!"
„Apa?" menanja itoe prempoean toea.
„Itoe di loear ada doea peti anjoet, itoe peti roepanja ada berisi oewang," kata Hong Dji.
