— 1245 —
tentara di kota Gan Boen Koan jang soeda minggat dari sana lantaran bikin ilang koeda. Ini pelari lebi doeloe akoe kasi makan ratjoen, dengen menoeroet sebagimana akoe poenja pengadjaran ia telah mengatjo di hadepan hakim, toedoe Ko Teng Tjan bikin pesariketan sama Pak An Ong aken menjerang ka kota radja. Kamoedian itoe pelarI telah mati, dengen begitoe perkara djadi gelap boeat fihaknja orang jang di toedoe.“
Koetika denger itoe perkatäan Bong Loan rasaken peroetnja djadi meloeap, tapi sebrapa bisa ia tahan sabar dan dengen tertawa ia kata: „Kombali akoe moesti poedji, sasoenggoenja Gak hoe sanget pande prihal mengatoer perkara soelit. Dan lagi akoe merasa heran, prihal oeroesan di dalem kraton toch tiada berhoeboeng sama Gak-hoe, tapi kenapa begitoe lekas soeda lantas bisa mendapet taoe?“
„Ha, ha, ha, betoel bodo!" kata itoe dorna sembari tertawa keras. „Leng Tjo jang bekerdja di dalem kraton, ada itoe orang jang djadi akoe poenja orang boeat membri kabar jang terdjadi di dalem astana!
„Bong Loan memanggoet. Ia menanja; „Sasoedanja Song Si mati, kasoeda'annja itoe perkara begimana?“
„Ko Teng Tjan lantas di panggil poelang, di mana soeda di hadepken dalem pengadilan Kim le Wie,“ kata itoe dorna poela. „Dalem pepreksa'an
