— 1228 —
Semoea orang tiada dapet artiken ia poenja perkata'an
,,Lian Heng bilang kita orang dapet loeka, manatah tandanja?" tanja marika itoe.
,,Tjiongwie tentoe mengarti, dalem ini pertempoeran maloeloe perloenja boeat adoe kepandean, sekali-kali dilarang bikin binasa atawa loekaken orang poenja anggota badan, maka tjara begimana akoe brani melanggar itoe atoeran!" kata Bong Loan terlebi djaoe. ,,Tapi di sini akoe kasi taoe, bilah kau ini ada moesoe-moesoekoe di medan prang, dengen tjara begitoe gampang akoe soeda binasaken kau poenja djiwa satoe persatoe!"
Kombali semoea orang tiada maoe mengarti.
,,Djikaloe Tjiongwie masi tiada pertjaja, tjoba silaken preksa masing-masing poenja sela-koeda, di sitoe tentoe ada terdapet akoe poenja Sin Tjiam (pana djaroem) jang sanget berbahaja." kata Bong Loan poela.
Satoe-satoe orang laloe preksa selanja dan bener sebagimana jang dikata, pada masing-masing poenja sela ada terdapet itoe barang tadjem.
,,Sekarang Tjiongwie haroes mengarti!" kata Bong Loan dengen tersenjoem dan pandang moekanja marika itoe. Seande kau ada akoe poenja moesoe, itoe barang tadjem tentoe siang-siang soeda anterken kau poenja djiwa ka laen doenia!"
