— 1227 —
Saban-saban ada kadengeran swara tampik soerak dan orang banjak hatoerken poedjian pada itoe orang moeda, jang njatah kepandeannja ada lebi mengagoemken dari jang laen-laen.
Kamodian Bong Loan tahan koedanja di tenga-tenga lapangan, ia berseroe pada marika itoe: ,,Tjiongwie Heng-tiang, baroesan akoe telah oendjoek sedikit kepandeankoe, maka sekarang marilah kita moelai bertanding aken dapetken pahala!"
Perminta'a ini lantas disamboet dengen goembira oleh itoe pamoeda-pamoeda, pertempoeran heibat lantas terdjadin satoe persatoe kaloearken kepandeannja aken djatoken lawanannja.
Satelah bertempoer sedikit lama, koenjoeng-koenjoeng Bong Loan lariken koeda dan oendoerken diri, saola-olah ia tiada sanggoep aken bertempoer lebi lama lagi.
Meliat begitoe tentoe sadja itoe bebrapa orang moeda djadi sanget girang.
,,Ha, njatalah Lian Eng sekarang moesti menjera!" treak marika itoe.
,,Ha, ha, ha, apa akoe menjera kau bilang?" kata Bong Loan sambil balikin koedanja dan pandang marika itoe dengen tertawa.
,,Sala sekali kaloe Tjiongwie bilang akoe soeda kala, sedeng sabenernja angkau sekalian jang soeda kena dibikin loeka oleh akoe poenja barang tadjem!" kata poela itoe nona.
