— 1226 —
dan Tjiauw Eng, masing-masing dengen pegang sendjata lantas bertempoer satoe sama laen aken adoe kepandeannja.
Marika itoe tiada pandang sobat atawa soedara, hanja bertempoer dengen seroe sebagi bertempoer sama moesoe di medan prang.
Golok, toembak, kampak dan laen-laen sendjata jang di goenaken dalem itoe pertandingan saban- saban mengasi liat bergrilapan, menjabet, menoesoek dan menimpa ka sana kemari, tapi sebegitoe lama blon kliatan ada jang menjera.
Masing-masing poenja kepandean sanget bagoes hingga Baginda dan orang banjak toeroet memoedji.
Tiada antara lama kaliatan sa-orang moeda madjoeken koeda, toembaknja melintang di atas sela.
Semoea orang lantas brentiken pertempoerannja dan membri hormat pada itoe pamoeda jang baroe sampe. Dan orang itoe poen boekan laen, jalah kita poenja Bong Loan.
,,Lian Heng tentoe tiada merasa kaberatan boeat bertempoer pada kita orang rame-rame!" berseroe marika itoe dengen berbareng.
Siotjia kita tersenjoem, sasoedanja njataken moefaket ia lantas lariken koedanja mengider bebrapa kali di tenga lapangan, sedeng toembaknja di poeter pergi dateng hingga sebagi terpoeternja titiran jang katioep angin.
