— 224 —
dia poenja kadosahan soeda berdjoestaken baginda.
Sjahadan maka waktoe itoe baginda radja Lie Sie Bin lantas loenasken Thia Kauw Kim poenja hoekoeman, serta Thia Kauw Kim denger lantas mendjawab kata : djikaloe hamba tiada dapet pangkat Peng Kian Ong ija soeda tiada djadi apa : Maka sehabisnja lantas semoea ambtenaar Boen Boe Pek Kwah troes pada boebar.
Tjerita pada besok harinja, Thia Kauw Kim inget hendak kawinken Lo Tong maka Thia Kauw Kim lantas hendak mengadep pada radja, lebih dahoeloe Thia Kauw Kim ketemoeken pada Lo Tong lantas di kasi tjerita : - He tjoetjoe, sekarang kami hendak ketemoe baginda boeat melapor akan kasi tjoetjoe kawin kapada To Louw Kiongtjoe.
Lo Tong : - ja Thia Pehoe, saija harep djangan, oleh kerna itoe To Louw Kiongtjoe dia soeda boenoe saija poenja soedara masa saija maoe kawin padanja.
Thia Kauw Kim. - Djikaloe angkau tiada maoe niat kawin padanja kenapa koetika di tempat medan perang angkau soeda bersoempah padanja, djikaloe mendjadi orang misti dengen toeloes hati (Tjin Tiong), dan djikaloe tadinja angkau maoe, Po Wansoe boeat apa berdjangdji padanja, djikaloe mendjadi orang misti inget satoe anak laki-laki kaloe soeda bitjara djangan moendoer lagi, aken sekarang kami hendak mendjadi tjomblang (Tjoehoen) boeat kasi angkau berdoewa kawin.
