— 190 —
Tjin Siok Po soeda prenta saban pintoe misti di djaga oleh saorang ambtenaar familie dari baginda radja serta 3000 soldadoe, maka waktoe itoe di pintoe jang sebla kidoel terdjaga oleh Souw Teng Hong maka barang Souw Teng Hong menengok kebawa liat malengken Lo Tong sendiri jang dateng ketahoean jang tentoe bala bantoean soeda sampe, maka di dalem hatinja Souw Teng Hong berpikir oleh kerna kemaren dia ada dapet satoe impian, jang dia poenja anak bernama Souw Lin dateng mengadep serta di badannja semoea mandi dara sambil berkata: ja bapa, anak bernama Souw Lin soeda mati dengen sangsara jang tiada pantes sekali. Maka sasoedanja Souw Teng Hong mendenger perkataän anaknja jang demikian itoe, lantas ija mendoesin, maka Souw Teng Hong lantas berpikir: O, ini brangkali orang she Lo jang bikin mati akoe poenja anak, tjobalah sekarang kita tanja padanja.
Maka disitoe Souw Teng Hong lantas menanja: he tjoetjoe ada bawa soldadoe bantoean kemari ?
Satelah Lo Tong denger dia di tanja lantas dia angkat moekanja meliat, maka di dalem hatinja berpikir: he ini bangsat Souw Teng Hong; maka lantas sadja Lo Tong mendjawab kata: — Ja betoel soldadoe bantoean sekarang soeda sampe, harep minta Souw Lope toeloeng lekas boeka pintoe boeat saija lekas masoek.
