— 373 —
ma sadja apa kita-orang nanti sanggoep tangkep padanja? Oh, boeat akoe tentoe merasa amat girang, kaloe bisa serahken itoe doea orang boeron pada pamerenta agoeng, kerna dengen begitoe, ini ada djalan satoe-satoenja boeat kita-orang mengangkat diri ka tangga doenia.”
„Mengapa tida bisa tangkep pada Tjoa leng?” tanja Kwe Keng.
„Tjoa leng brangkali tida brapa soesa,” saoet Liang-sih: „hanja jang akoe bitjaraken adalah itoe Oan Swie ?”
„Nah dia kenapa?”
„He, apa Siantiang leopa, jang orang itoe poenja kasaktian ada begitoe tinggi? Djangan kata kaja kita-orang, sedeng Siantiang sendiri masi tida sanggoep alahken itoe orang berilmoe.”
„Ah, boeat itoe tida oesah koeatir!” kata Kwe Keng dengen sombong: „sekarang sadiaken sadja barang-barang kotor, seperti dara andjing, dara babi, kentjing dan kakotoran manoesia, kamoedian adoek djadi satoe boeat poenaken ilmoenja.”
Mendenger begitoe, Liang-sih lantas memanggoet, kamoedian sasoedanja hal itoe didamiken sakoetika lamanja, sigra djoega itoe pembesar prenta orangnja sadiaken barang-barang jang terseboet.
„Kaloe itoe barang kotor soeda sadia,” kata Liang-sih pada orangnja: „kaoe berame moesti lantas sapoe kamarnja itoe doea orang. Perkara ini tida soesa dikerdjaken, kerna marika poenja