— 372 —
atawa Loja troesa koeatir jang ini pengliatan mendjadi sala.”
„Kaloe begitoe, njatalah ini ada sabagi koerniaanja Toehan,” kata Kwe Keng dengen girang: „boekantah Tjoenkhwa telah denger, bahoewa dalem waktoe jang blakangan ini di sana sini ada terbit kariboetan jang diperboeat oleh orang-orang dari kawannja Liangsan, dan boeat membikin kaadahan tempat-tempat djadi lebi santausa, maka oleh Sri Baginda telah dikaloearken firman boeat tangkep sagala orang jang berasal dari brandal itoe poenja kaoem. Nah inilah ada kabetoelan sekali. Roepa-roepanja itoe Oan Swie, jang tadi siang soeda bikin maloe akoe poenja diri di hadepan orang banjak, ada sala satoe dari moeridnja itoe bajingan Kong Soen-sin di Liangsan.”
Sambil kata begitoe, Kwe Keng memandang pada Liang-sih, dan waktoe liat itoe moerid seperti orang jang merasa koeatir atawa tida maoe lakoeken itoe penangkepan, maka ia berkata poela:
„Inilah ada satoe waktoe jang baek boeat Tjoen-khwa berdoea dapetken pahala. Troesa pergi ka Tayliauw, hanja dengen serahken sadja itoe orang orang jang memang lagi ditjari, kaoe poen bisa beroleh gandjaran besar.”
Ini perkatahan jang paling blakang telah menggeraken sanget hatinja itoe pembesar jang temaha pangkat. Maka sasoedanja Kwe Keng brenti berkata, Liang-sih laloe menjaoet:
„Siantiang poenja bitjara ada bener sekali. Tjoe-
